ବେଙ୍ଗାଲୁରୁ,୨୮।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପରେ ସାଉଥ ସୁପରଷ୍ଟାର ରଜନୀକାନ୍ତ ବିୟର ଗ୍ରୀଲ୍ସଙ୍କ ‘ମ୍ୟାନ ଭର୍ସେସ ଓ୍ବାଇଲ୍ଡ’ରେ ନଜର ଆସିବେ। ମଙ୍ଗଳବାର କର୍ନାଟକ ବାନ୍ଦିପୁରର ଟାଇଗର ରିଜର୍ଭ ଆଣ୍ଡ ନ୍ୟାଶନାଲ ପାର୍କରେ ବିୟରଙ୍କ ସହ ରଜନୀକାନ୍ତଙ୍କ ଶୁଟିଂ ଆରମ୍ଭ ହୋଇଛି। ଏନେଇ କର୍ନାଟକ ଜଙ୍ଗଲ ବିଭାଗ ପକ୍ଷରୁ ସୂଚନା ମିଳିଛି। ଶୁଟିଂ ହେଉଥିବା ସ୍ଥାନର ଏକ ଭିଡିଓ ସାମ୍ନାକୁ ଆସିଛି। ଯେଉଁଥିରେ ରଜନୀକାନ୍ତ ନିଜ ଟିମ୍ଙ୍କ ସହ ଯାଉଥିବାର ଦେଖିବାକୁ ମିଳିଛି। ସୂଚନା ମୁତାବକ ଏହି ଶୁଟିଂ ଦୀର୍ଘ ୩ ଦିନ ଧରି ଚାଲିବ। ଏଥିରେ ରଜନୀକାନ୍ତ ଓ ବିୟର ବାନ୍ଦିପୁର ଜଙ୍ଗଲ ଓ ପ୍ରାକୃତିକ ପରିବେଶ ବିଷୟରେ ଆଲୋଚନା କରିବେ। ଏହି ଶୁଟିଂ ପାଇଁ ସୋମବାର ରାତିରେ ବିୟର ନିଜର ୧୮ଜଣ କ୍ରିୟୁ ମେମ୍ବର ସହ ଗୁଣ୍ଡଲୁପେଟ ଟାଉନ୍ରେ ପହଞ୍ଚିଥିଲେ। ସେହିପରି ରଜନୀକାନ୍ତ ମଧ୍ୟ ବାନ୍ଦିପୁରର ଏକ ହୋଟେଲରେ ରହିଥିବା ଜଣାପଡ଼ିଛି। ଜଙ୍ଗଲ ବିଭାଗ ପକ୍ଷରୁ ସମସ୍ତଙ୍କ ପାଇଁ ଗାଡିର ବ୍ୟବସ୍ଥା କରାଯାଇଛି। ଏହା ପୂର୍ବରୁ ଏହି ଶୋ’ରେ ପ୍ରଧାନମନ୍ତ୍ରୀ ମୋଦି ନଜର ଆସିଥିଲେ। ୨୦୧୯ ଅଗଷ୍ଟ ୧୨ରେ ଡିସ୍କଭରି ଚ୍ୟାନେଲର ପପୁଲାର ଶୋ’ ‘ମ୍ୟାନ ଭର୍ସେସ ଓ୍ବାଇଲ୍ଡ’ରେ ବିୟରଙ୍କ ସହ ମୋଦିଙ୍କୁ ଦେଖିବାକୁ ମିଳିଥିଲା। ତାଙ୍କର ଏହି ଶୋ’କୁ ଉତ୍ତରାଖଣ୍ଡର ଜିମ୍ କାର୍ବେଟ ନ୍ୟାଶନାଲ ପାର୍କରେ ଶୁଟିଂ କରାଯାଇଥିବା ବେଳେ ଏଥିରେ ମୋଦି ନିଜର ଆଡ୍ଭେଞ୍ଚର ଓ କେତେକ ଅନୁଭୂତିକୁ ଶେୟାର କରିଥିଲେ। ତେବେ ରଜନୀକାନ୍ତ ହେଉଛନ୍ତି ଦ୍ୱିତୀୟ ଭାରତୀୟ ଯିଏ ଏହି ଶୋ’ରେ ନଜର ଆସିବେ। ଏଥିରେ ତାଙ୍କ ସହ ଜଡିତ ଥିବା କେତେକ କୌତୁହଳ ଅନୁଭୂତି ବିଷୟରେ ଜାଣିବାକୁ ମିଳିବ।
