ଲଣ୍ଡନ,୧୨।୪ (ଏଏଫ୍ପି)-ମୋଟରସ୍ପୋଟର୍ସର କିମ୍ବଦନ୍ତୀ ଷ୍ଟର୍ଲିଂ ମୋସ୍ ୯୦ ବର୍ଷ ବୟସରେ ମୃତ୍ୟୁବରଣ କରିଛନ୍ତି। ଦୀର୍ଘ ଦିନର ଅସୁସ୍ଥତା ପରେ ଏହି ବ୍ରିଟିଶ ଡ୍ରାଇଭରଙ୍କ ଦେହାନ୍ତ ହୋଇଛି ବୋଲି ତାଙ୍କ ସ୍ତ୍ରୀ ରବିବାର ଘୋଷଣା କରିଛନ୍ତି। ମୋସ କେବେବି ଫର୍ମୁଲା-୧ ଟାଇଟଲ ହାସଲ କରି ନ ଥିଲେ। ତେବେ ସେ ୪ଥର ରନର୍ସଅପ୍ ହୋଇଥିଲେ ଓ ଏହା ସତ୍ତ୍ୱେ ସେ ମହାନ ଡ୍ରାଇଭର ବିବେଚିତ ହେଉଥିଲେ। ଦୀର୍ଘ ୧୪ ବର୍ଷର କ୍ୟାରିୟରରେ ସେ ଦୃଷ୍ଟାନ୍ତମୂଳକ ସଫଳତା ପାଇଛନ୍ତି। ୧୯୪୮ ମସିହାରେ ସେ କ୍ୟାରିୟର ଆରମ୍ଭ କରିଥିଲେ। ୫୨୯ଟି ରେସ୍ରେ ସେ ଅଂଶଗ୍ରହଣ କରି ୨୧୨ଟିରେ ବିଜୟ ହାସଲ କରିଥିଲେ। ସେତେବେଳେ ଡ୍ରାଇଭରମାନେ ଭିନ୍ନ ଭିନ୍ନ ବର୍ଗରେ ଅଂଶଗ୍ରହଣ କରୁଥିଲେ। ୧୯୫୦ରୁ ୧୯୬୦ ମଧ୍ୟରେ ସେ ବେଶ୍ ସକ୍ରିୟ ଥିଲେ। ସେ ୧୯୫୧ରୁ ଫର୍ମୁଲା-୧ ରେସିଂରେ ଅଂଶଗ୍ରହଣ କରିଆସୁଥିଲେ। ୧୯୬୨ ଏପ୍ରିଲ୍ରେ ଗୁଡଉଡ୍ରେ ଏକ ଦୁର୍ଘଟଣାର ସମ୍ମୁଖୀନ ହେବା ପରେ ସେ ଗୋଟିଏ ମାସ କୋମା ଅବସ୍ଥାକୁ ଚାଲିଯାଇଥିଲେ। ଏହାପରେ ୬ମାସ ଆଂଶିକ ପକ୍ଷାଘାତର ଶିକାର ହୋଇଥିଲେ। ଶେଷରେ ସେ ଅବସର ଘୋଷଣା କରିଥିଲେ।
ଫର୍ମୁଲା-୧ଓ୍ବାଲର୍ଡ ଚାମ୍ପିୟନଶିପ୍ରେ ସେ ୬୭ଟି ଷ୍ଟାର୍ଟ କରିଥିଲେ। ୧୬ଟି ରେସ୍ରେ ସେ ବାଜି ମାରିଥିବା ବେଳେ ୧୬ଟି ପୋଲ ପୋଜିଶନ ଓ ୨୪ ଥର ପୋଡିୟମ ଫିନିଶ୍ କରିଥିଲେ। ସେ ୧୯୨୯ ସେପ୍ଟେମ୍ବର ୧୭ରେ ଲଣ୍ଡନର ଓ୍ବେଷ୍ଟ କେନ୍ସିଂଟନରେ ଜନ୍ମ ଗ୍ରହଣ କରିଥିଲେ। ସେ ମର୍ସିଡିଜ୍ ବେଞ୍ଚ୍, ମାସେରାଟି, ଭାନ୍ଓ୍ବାଲ, ରବ୍ ଓ୍ବାକରଙ୍କ ପ୍ରାଇଭେଟ କୁପର ଟିମ୍ ଓ ଲୋଟସ ତରଫରୁ ରେସ୍ରେ ପ୍ରତିନିଧିତ୍ୱ କରିଥିଲେ। ୧୯୯୦ ଅନ୍ତର୍ଜାତୀୟ ମୋଟରସ୍ପୋଟର୍ସ ହଲ୍ ଅଫ୍ ଫେମ୍ରେ ତାଙ୍କୁ ସାମିଲ କରାଯାଇଥିଲା। ୨୦୦୦ ତାଙ୍କୁ ପ୍ରିନ୍ସ ଚାଲର୍ସ ନାଇଟ୍ହୁଡ୍ ସମ୍ମାନ ପ୍ରଦାନ କରିଥିଲେ। ମୋଟର ସ୍ପୋଟର୍ସରେ ଅତୁଳନୀୟ ଅବଦାନ ପାଇଁ ତାଙ୍କୁ ଏଫ୍ଆଇଏ ଗୋଲ୍ଡ ମେଡାଲ ପ୍ରଦାନ କରାଯାଇଥିଲା।
