ମୁନିଗୁଡା,୧।୫(ଡି.ଏନ୍.ଏ.): ସାରା ରାଜ୍ୟରେ ଏବେ କରୋନା(କୋଭିଡ-୧୯)କୁ ଭୟର ମାହୋଲ। ଏପରିସ୍ଥଳେ ରାୟଗଡା ଜିଲା ମୁନିଗୁଡ଼ାର ଟିକରପଡ଼ା ବସ୍ତିରେ ଡେଙ୍ଗୁ ରିପୋର୍ଟ ପଜିଟିଭ୍ ଆସିବା ପରେ ମୁନିଗୁଡ଼ା ଅଞ୍ଚଳରେ ଆତଙ୍କ ଖେଳିଯାଇଛି।
ସୂଚନାନୁଯାୟୀ, ଟିକରପଡ଼ାରେ ଡେଙ୍ଗୁ ରୋଗୀ ଚିହ୍ନଟ ହେବା ଏବଂ ଅଜଣା ରୋଗରେ ଲୋକଙ୍କ ମୃତ୍ୟୁ ହେଉଥିବା ଖବର ପାଇ ଜିଲା ସ୍ବାସ୍ଥ୍ୟ ବିଭାଗରୁ ରାୟଗଡା ସିଡିଏମ୍ଓଙ୍କ ସହ ଅନ୍ୟ ଅଧିକାରୀ ମାନେ ପରିଦର୍ଶନରେ ଆସିଥିଲେ। ଏହାପରେ ସିଡିଏମ୍ଓଙ୍କ ନିର୍ଦ୍ଦେଶ କ୍ରମେ ସପ୍ତାହେ ଧରି ବସ୍ତିରେ ଏକ ଅସ୍ଥାୟୀ ମେଡିକାଲ କ୍ୟାମ୍ପ ଖୋଲି ଲୋକଙ୍କୁ ସଚେତନ କରିବା ସହ ଲୋକଙ୍କଠାରୁ ରକ୍ତ ସଂଗୃହିତ କରାଯାଇଥିଲା। ସେଥିମଧ୍ୟରୁ ୪୦ଜଣଙ୍କ ରକ୍ତ ନମୁନା ପଜିଟିଭ୍ ମିଳିଛି ବୋଲି ରାୟଗଡ଼ାର ଅତିରିକ୍ତ ଜିଲା ଚିକିତ୍ସାକାରୀ ବି.ଲକ୍ଷ୍ମୀନାରାୟଣ ପୃଷ୍ଟି ସୂଚନା ଦେଇଛନ୍ତି।
ଗତ କିଛି ଦିନ ମଧ୍ୟରେ ବହୁ ଜଣଙ୍କ ରକ୍ତ ନମୁନା ସଂଗ୍ରହ କରାଯାଇଥିଲା। ସେଥିମଧ୍ୟରୁ ୪୦ଟି ରକ୍ତ ନମୁନା ଡେଙ୍ଗୁ ପଜିଟିଭ୍ ରହିଛି। ଏହି ରିପୋର୍ଟ ଆସିବା ପରେ ରୋଗୀଙ୍କୁ ଆବଶ୍ୟକ ପରାମର୍ଶ ଓ ଔଷଧ ଦିଆ ଯାଉଥିବା ଜଣାପଡିଛି।
ଗତ ୨ ମାସ ମଧ୍ୟରେ ଟିକରପଡ଼ାରେ ୧୦ରୁ ଊର୍ଦ୍ଧ୍ୱ ଜଣ ଅଚିହ୍ନା ରୋଗରେ ମୃତ୍ୟୁବରଣ କରିସାରିଛନ୍ତି। ଏ ସମ୍ପର୍କରେ ମୁନିଗୁଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଚିକିତ୍ସକ ଡା.ସଞ୍ଜୟ କୁମାର କହିଛନ୍ତି ଯେ ଗତ କିଛିଦିନ ଧରି ସେହି ବସ୍ତିରେ ଅସ୍ଥାୟୀ ମେଡିକାଲ କ୍ୟାମ୍ପ ଖୋଲାଯାଇଛି। ବସ୍ତିରେ ଡାକ୍ତର ଓ ଅନ୍ୟ ମେଡିକାଲ କର୍ମଚାରୀ ମାନେ ସଚେତନ କରୁଛନ୍ତି ।
