ଯୋଧପୁର,୫।୬: କିଛି ଦିନ ତଳେ ଆମେରିକାରେ ପୋଲିସର ବର୍ବରତା ଯୋଗୁ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିଲା। କିଛି ପୋଲିସକର୍ମୀ ଜର୍ଜ ଫ୍ଲୋଏଡ୍ ନାମକ ବ୍ୟକ୍ତିଙ୍କ ମୁଣ୍ଡକୁ ଆଣ୍ଠୁରେ ଚାପିଦେଇଥିଲେ। ଫଳରେ ଅଣନିଃଶ୍ୱାସୀ ହୋଇ ଜର୍ଜଙ୍କ ମୃତ୍ୟୁ ହୋଇଥିଲା। ତେବେ ଆମେରିକା ଭଳି ଏକ ଘଟଣା ରାଜସ୍ଥାନର ଯୋଜଧପୁରରେ ଦେଖିବାକୁ ମିଳିଛି। ଗୁରୁବାର ଯୋଧପୁରରେ ପୋଲିସର ବର୍ବରତାର ଚିତ୍ର ସାମ୍ନାକୁ ଆସିଛି। ଯାହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ଚୌପାସନି ହାଉସିଂ ବୋର୍ଡ ନିକଟରେ ମୁକେଶ ପ୍ରଜାପତ ନାମକ ଜଣେ ବ୍ୟକ୍ତି ମାସ୍କ ନ ପିନ୍ଧି ଠିଆ ହୋଇଥିଲେ। ସେହି ସମୟରେ ପୋଲିସ ଚଢ଼ାଉ କରି ଆଇନ ଉଲ୍ଲଂଘନ ଅଭିଯୋଗରେ ତାଙ୍କର ଚାଲାଣ କାଟିବାକୁ ଯାଉଥିଲେ। ସେହି ସମୟରେ ଉକ୍ତ ବ୍ୟକ୍ତି ସେଠାରୁ ପଳାଇବାକୁ ଉଦ୍ୟମ କରିବା ସହିତ ପୋଲିସ ସହ ମାରପିଟ୍ କରିଥିଲେ। ବହୁ ଚେଷ୍ଟା ପରେ ପୋଲିସକର୍ମୀ ତାଙ୍କୁ କାବୁ କରିଥିଲେ ଏବଂ ଉକ୍ତ ବ୍ୟକ୍ତିଙ୍କୁ ନିଜ ଆଣ୍ଠୁରେ ବେକକୁ ଚାପି ଦେଇଥିଲେ। ୪୪ ଡିଗ୍ରୀ ତାପମାତ୍ରାରେ ରାସ୍ତାରେ ମୁକେଶଙ୍କ ବେକକୁ ଚାପି ଧରିବା ପୋଲିସର ଏଭଳି କାର୍ଯ୍ୟକୁ ନେଇ ଏବେ ସବୁ ମହଲରେ ନିନ୍ଦା କରାଯାଇଛି। ଏତଦ୍ ବ୍ୟତୀତ ପୋଲିସ ସହ ମାରପିଟ୍ ଓ ଆଇନ ଉଲ୍ଲଂଘନ ଅଭିଯୋଗରେ ମୁକେଶଙ୍କ ନାଁରେ ଦେବନଗର ଥାନାରେ ମାମଲା ରୁଜୁ କରାଯାଇଥିବା ଜଣାପଡ଼ିଛି। ଅପରପକ୍ଷେ ଏହି ଘଟଣାକୁ ନେଇ ଯୋଧପୁର ଡିସିପି ପ୍ରୀତି ଚନ୍ଦ୍ରା ସ୍ପଷ୍ଟୀକରଣ ରଖିଛନ୍ତି। ସେ କହିଛନ୍ତି, ପୋଲିସ ନିଜ ଆତ୍ମରକ୍ଷା ପାଇଁ ଏଭଳି ପଦକ୍ଷେପ ଗ୍ରହଣ କରିଥିଲା।
