ମହାକାଳପଡ଼ା.୧୮.୬(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ାରେ ମଙ୍ଗଳବାର ଅପରାହ୍ନରେ କାଳବୈଶାଖୀ ପ୍ରଭାବରେ ବର୍ଷା, ପବନ ସାଙ୍ଗକୁ ଘଡ଼ଘଡି ଓ ବଜ୍ରପାତ ହୋଇଛି। ଏଥିରେ ଜଣେ ଚାଷୀଙ୍କ ମୃତ୍ୟୁ ଘଟିଛି। ମୃତକ ହେଲେ ମହାକାଳପଡ଼ା ବ୍ଲକ ଅଧୀନ ନାଞ୍ଜୁର ପଞ୍ଚାୟତ ଭୋପାଳ(ଓସ୍ତିଆ) ଗ୍ରାମର ନିତ୍ୟାନନ୍ଦ ଦାସ(୪୦)। ନିତ୍ୟାନନ୍ଦ ଧାନ ତଳି ପକାଇବା ପାଇଁ ବିଲକୁ ଯାଇଥିବା ବେଳେ ଏହି ଅଘଟଣା ଘଟିଥିବା ଜଣାପଡ଼ିଛି। ଖବର ପାଇଁ ବ୍ଲକ ଅଧ୍ୟକ୍ଷା ସସ୍ମିତା ବରାଳ ପହଞ୍ଚିି ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି। ମୃତଦେହ ବ୍ୟବଚ୍ଛେଦ ପାଇଁ କେନ୍ଦ୍ରାପଡ଼ା ମୁଖ୍ୟ ମେଡିକାଲକୁ ପଠାଯାଇଛି। ମହାକାଳପଡ଼ା ବିଧାୟକ ଅତନୁ ସବ୍ୟସାଚୀ ନାୟକ ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି।
ସେହିପରି କାଳବୈଶାଖୀରେ ସ୍ଥାନୀୟ ବଉଳକଣି ପଞ୍ଚାୟତ ଆମ୍ବବେଲାରୀ ଗ୍ରାମର ମାନୁ ମଣ୍ଡଳଙ୍କ ୪ ବଖରା ଘର ଜଳିଯାଇଛି। ମହାକାଳପଡ଼ା ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି। ବ୍ଲକ ବିଡିଓ ରମେଶ ଚନ୍ଦ୍ର ସେଠୀ କ୍ଷତିଗ୍ରସ୍ତ ପରିବାରକୁ ତଦନ୍ତ ପରେ ସରକାରୀ ନିୟମ ଅନୁସାରେ ସହାୟତା ପ୍ରଦାନ କରାଯିବ ବୋଲି କହିଛନ୍ତି।
