ବାଲେଶ୍ୱର ଅଫିସ, ୨୯।୧-ବାଲେଶ୍ୱର ସହର ମୁଖ୍ୟରାସ୍ତା ଓଟିରୋଡ୍କୁ ସମ୍ପ୍ରସାରଣ ଲାଗି ଆଇଟିଆଇସ୍ଥିତ ଲକ୍ଷ୍ମୀନାରାୟଣ ମନ୍ଦିର ଭଙ୍ଗାଯିବା ପାଇଁ ଜିଲା ପ୍ରଶାସନ ପକ୍ଷରୁ ଦୀର୍ଘଦିନ ହେଲା ମନ୍ଦିର ପରିଚାଳନା କମିଟିକୁ ନୋଟିସ୍ ଦିଆଯାଇଥିଲା। ପୂର୍ବରୁ ଲୋକଙ୍କ ବିରୋଧ ଯୋଗୁ ପ୍ରଶାସନ ବିଫଳ ହୋଇ ଫେରୁଥିବା ବେଳେ ମଙ୍ଗଳବାର ଏହାର ଉଚ୍ଛେଦ ପାଇଁ ପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବାଧ୍ୟ ହୋଇଥିଲା। ଏହା ଜାଣିପାରି ସ୍ଥାନୀୟ ଲୋକ, ମନ୍ଦିର ପରିଚାଳନା କମିଟି ଓ ଅଟଳ ବିହାରୀ ସ୍ମୃତି କମିଟି ପକ୍ଷରୁ ମନ୍ଦିର ସମ୍ମୁଖରେ ନାମଯଜ୍ଞ, ସଙ୍କୀର୍ତ୍ତନ, ହୋମଯଜ୍ଞ କାର୍ଯ୍ୟକ୍ରମ ପୂର୍ବାହ୍ନ ୭ଟାରେ ଆରମ୍ଭ କରାଯାଇଥିଲା। ପ୍ରଶାସନ ପକ୍ଷରୁ ସଦର ତହସିଲଦାର ପଞ୍ଚାନନ ପାତ୍ର, ଉପଜିଲାପାଳ ନୀଲୁ ମହାପାତ୍ର, ଅତିରିକ୍ତ ଜିଲା ଆରକ୍ଷୀ ଅଧୀକ୍ଷକ ତପନ କୁମାର ପଟ୍ଟନାୟକ, ଏସ୍ଡ଼ିପିଓ ପ୍ରଭାସ ଚନ୍ଦ୍ର ପାଲ, ଡିଏସ୍ପି ମନୋଜ ରାଉତ, ଆଇଆଇସି ପରେଶ ରାଉତଙ୍କ ସମେତ ୩ ପ୍ଲାଟୁନ ଫୋର୍ସ ଏବଂ ଜେସିବି ସହିତ ଘଟଣାସ୍ଥଳରେ ପହଞ୍ଚିଥିଲେ। ପରେ ଲୋକମାନେ ମନ୍ଦିର ଭଙ୍ଗାଯିବା ପ୍ରକ୍ରିୟାକୁ ବିରୋଧ କରି ଧାରଣାରେ ବସିଥିଲେ। ପ୍ରଶାସନ ପକ୍ଷରୁ ଧାରଣାକାରୀଙ୍କ ସହ ଆଲୋଚନା କରାଯିବା ସୂତ୍ରରେ ମଧ୍ୟାହ୍ନ ୧୨ଟାରେ ଉଭୟପକ୍ଷଙ୍କ ମଧ୍ୟରେ ଆଲୋଚନା ହୋଇଥିଲା। ରାସ୍ତାର ପ୍ରଶସ୍ତିକରଣ ସହିତ ମନ୍ଦିର ସୁରକ୍ଷିତ ରଖିବା ସୂତ୍ରରେ କେବଳ ମନ୍ଦିର ତୋରଣ ଓ ଗରୁଡ଼ଖମ୍ଭକୁ ଭଙ୍ଗାଯିବାର ନିଷ୍ପତ୍ତି ହୋଇଥିଲା। ମନ୍ଦିର ପରିଚାଳନା କମିଟି ସଭାପତି ହିମାଂଶୁ ଦାସ, ଅଟଳ ବିହାରୀ ସ୍ମୃତି କମିଟିର କାର୍ଯ୍ୟକାରୀ ସଭାପତି ପର୍ଶୁରାମ ବେହେରା, ରେମୁଣାର ପୂର୍ବତନ ବିଧାୟକ ଗୋବିନ୍ଦ ଚନ୍ଦ୍ର ଦାଶ, ଯୁବନେତା ଗୌରାଙ୍ଗ ଦାସ, ସମାଜସେବୀ ସୀତାକାନ୍ତ ସ୍ବାଇଁ, ସୁଜିତ ଦେବ ପ୍ରମୁଖ ଆଲୋଚନାରେ ସାମିଲ୍ ଥିଲେ।
