ସମ୍ବଲପୁର/ଧମା,୧୪ା୬(ବ୍ୟୁରୋ/ଡି.ଏନ.ଏ.)-ସମ୍ବଲପୁର ଜିଲା ଧମା ଥାନା ଅର୍ଡା ଗାଁରେ ଶନିବାର ଏକ ଅଭାବନୀୟ ଘଟଣା ଘଟିଛି। ପରିବାର ମଧ୍ୟରେ ସାମାନ୍ୟ ମନମାଳିନ୍ୟ ଯୋଗୁ ଏକ ପରିବାର ଛାରଖାର ହୋଇଯାଇଛି। ୨ ବର୍ଷର ଶିଶୁ ପୁତ୍ରର ମୁହଁକୁ ନ ଚାହିଁ ଏକ ଦମ୍ପତ୍ତି ଆତ୍ମହତ୍ୟା କରିଛନ୍ତି। ମୃତକ ହେଲେ ଗାଁର ହେମନ୍ତ ବାଗ (୩୩) ଓ ତାଙ୍କ ସ୍ତ୍ରୀ ବେବି (୩୦)। ରବିବାର ପୋଲିସ ମୃତଦେହ ବ୍ୟବଚ୍ଛେଦ କରାଇ ତାଙ୍କ ପରିବାର ବର୍ଗଙ୍କୁ ହସ୍ତାନ୍ତର କରିଛି। ଗାଁ ନିକଟ ସାହସପୁର ମଶାଣିରେ ଏକାଠି ସ୍ବୀମୀ, ସ୍ତ୍ରୀଙ୍କ ଜୁଇ ଜଳିଛି। ତେବେ ବେବିଙ୍କ ବାପା ଝାଙ୍କରପାଲି ଗାଁର ଗିରିଶଙ୍କର ଭୋଇ ଥାନାରେ ଅଭିଯୋଗ କରିଛନ୍ତି ଯେ, ତାଙ୍କ ଝିଅଙ୍କୁ ଜ୍ୱାଇଁ, ଶ୍ୱଶୁର ଓ ନଣନ୍ଦ ମିଶି ହତ୍ୟା କରିଛନ୍ତି। ଏଣୁ ଧମା ଥାନା ପୋଲିସ ଏକ ହତ୍ୟା ମାମଲା (ନଂ. ୧୧୬/୨୦)ରୁଜୁ କରି ଘଟଣାର ତଦନ୍ତ କରୁଛି। ସେହିଭଳି ହେମନ୍ତଙ୍କ ମୃତ୍ୟୁକୁ ନେଇ ଏକ ଅପମୃତ୍ୟୁ ମାମଲା (ନଂ.୫/୨୦)ରୁଜୁ ହୋଇଛି । ଏହି ଘଟଣାରେ ଅର୍ଡା ଗ୍ରାମ ଓ ଆଖ ପାଖରେ ଶୋକର ଛାୟା ଖେଳି ଯାଇଛି।
୨୦୧୭ରେ ହେମନ୍ତ ଓ ବେବିଙ୍କ ବାହାଘର ହୋଇଥିଲା। କିଛି ଦିନ ପରେ ସେମାନେ ଅଲଗା ରୋଷେଇ କରି ଖାଉଥିଲେ। ହେମନ୍ତ ସମ୍ବଲପୁର ସହରର ଏକ ଇଲୋକ୍ଟ୍ରୋନିକ୍ସ ଦୋକାନରେ କାମ କରୁଥିଲେ। ଗତ ଗୁରୁବାର ସନ୍ଧ୍ୟାରେ ବେବି ବାପ ଘରୁ ଫେରିଥିଲେ । ସାଙ୍ଗରେ ରାତ୍ରିଭୋଜନ ପାଇଁ ଖାଇବା ନେଇ ଆସିଥିଲେ। ଏଣୁ ଖାଦ୍ୟ ଆଣିବା କ’ଣ ଆବଶ୍ୟକ ଥିଲା ବୋଲି ହେମନ୍ତ ଓ ତାଙ୍କ ପରିବାର ଲୋକେ ବେବିଙ୍କୁ ପଚାରି ଥିଲେ। ଶନିବାର ସକାଳେ ହେମନ୍ତ କାମକୁ ଯାଇଥିଲେ । ବେବି ଶିଶୁପୁତ୍ର ସହ ମଧ୍ୟାହ୍ନରେ ଖାଇପିଇ ଶୋଇବାକୁ ଯାଇଥିଲେ। ପୁଅ ଉଠିବା ପରେ କାନ୍ଦିବାକୁ ଲାଗିଥିଲା। ଦୀର୍ଘ ସମୟ ଧରି କାନ୍ଦ ବନ୍ଦ ନ ହେବାରୁ ଘର ଲୋକେ ବେବିଙ୍କୁ ଡାକିଥିଲେ। ହେଲେ ସେ ଶୁଣି ନ ଥିଲେ। ଏଣୁ ସନ୍ଦେହ ହେବାରୁ ପରିବାର ସଦସ୍ୟ ଘରର ତାଲା ଭାଙ୍ଗିଥିଲେ। ଦେଖିଲାବେଳେକୁ ବେବି ଘରର ଫ୍ୟାନ୍ରେ ଲୁଗା ଦେଇ ଝୁଲୁଥିଲେ। ସେମାନେ ତାଙ୍କୁ ତଳକୁ ଆଣି ଧମା ଥାନାକୁ ଖବର ଦେଇଥିଲେ। ପୋଲିସ ପହଞ୍ଚତ୍ ମୃତଦେହ ଜବତ କରିବା ସହ ବ୍ୟବଚ୍ଛେଦ ଲାଗି ଭିମ୍ସାର ପଠାଇଥିଲା। ଏହି ଖବର ପାଇ ହେମନ୍ତ ଘରକୁ ଫେରିଥିଲେ । ସେ ସବୁ ଘଟଣା ଦେଖି ନିଜକୁ ସମ୍ଭାଳି ପାରି ନ ଥିଲେ। ସ୍ତ୍ରୀଙ୍କ ଆତ୍ମହତ୍ୟା ତାଙ୍କ ମାନସିକ ସନ୍ତୁଳନ ବିଗାଡ଼ି ଦେଇଥିଲା। ୨ ବର୍ଷର ପୁଅକୁ ସେ ମନ ଭରି ଆଲିଙ୍ଗନ କରିଥିଲେ। ପୁଅର ମୁହଁ ଆଉ ଦେହରେ ବାପାର ଆବେଗ ଭରା ଚୁମ୍ବନ ଦେଇଥିଲେ । ମୁଁ ଆସୁଛି କହି ଚାଲି ଯାଇଥିଲେ। ହେଲେ ଆଉ ଫେରି ନ ଥିଲେ। ସନ୍ଧ୍ୟା ୬ଟାରେ ଗାଁ ମନ୍ଦିର ନିକଟରେ ହେମନ୍ତ ଗୁରୁତର ଅବସ୍ଥାରେ ପଡ଼ିଥିବା ଜଣା ପଡ଼ିଥିଲା। ପୋଲିସ ତାଙ୍କୁ ଉଦ୍ଧାର କରି ବୁର୍ଲା ଭିମ୍ସାର ପଠାଇଥିଲା। ହେଲେ ସେଠାରେ ଚିକିତ୍ସିତ ଅବସ୍ଥାରେ ରବିବାର ସେ ଆଖି ବୁଜିଥିଲେ।
