କୋକସରା,୧।୧(ଡି.ଏନ୍.ଏ.):କଳାହଣ୍ଡି ଜିଲା କୋକସରା ବ୍ଲକର ବିଭିନ୍ନ ମଣ୍ଡିରେ ଧାନକିଣା ପ୍ରକ୍ରିୟାରେ ଅଚଳାବସ୍ତା ଯୋଗୁ ଚାଷୀମାନେ ବିଭିନ୍ନ ସମୟରେ ଆନ୍ଦୋଳନ କରି ବିକ୍ଷୋଭ ପ୍ରଦର୍ଶନ କରୁଛନ୍ତି। ଏପରିସ୍ଥିତିରେ ମଙ୍ଗଳବାର କୋକସରା ମଣ୍ଡିର ଚାଷୀମାନେ ଧାନ ଉଠାଣ ଦାବି କରି ଭବାନୀପାଟଣା-ନବରଙ୍ଗପୁର ୨୬ ନମ୍ବର ଜାତୀୟ ରାଜପଥ ଅବରୋଧ କରି ଆନ୍ଦୋଳନ କରିଥିଲେ। ଫଳରେ ରାସ୍ତାର ଉଭୟ ପାର୍ଶ୍ୱରେ ଯାନବାହନ ଅଟକ ରହି ଟ୍ରାଫିକ ସମସ୍ୟା ସୃଷ୍ଟି ହୋଇଥିଲା। ଏନେଇ ଜନସାଧାରଣ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। କୋକସରା ପୋଲିସ ଅଧିକାରୀ ବାସୁଦେବ ଛତ୍ରିଆ ଘଟଣାସ୍ଥଳରେ ପହଞ୍ଚତ୍ ଚାଷୀଙ୍କ ସହ ଆଲୋଚନା କରି କଳାହାଣ୍ଡି ଯୋଗାଣ ବିଭାଗ ଅଧିକାରୀଙ୍କ ସହ ମୋବାଇଲ ଫୋନରେ ଯୋଗାଯୋଗ କରିଥିଲେ। ପରେ ଟୋକନ ପାଇଥିବା ଚାଷୀଙ୍କ ଧାନ ତୁରନ୍ତ କିଣାଯିବ ବୋଲି ପ୍ରତିଶ୍ରୁତି ଦେଇଥିଲେ। ଏପରି କି ପେକ୍ସ ସମ୍ପାଦକ ନିରନ ବାଗ ଚାଷୀଙ୍କୁ ଧାନ କିଣିବା ନେଇ କହିବା ପରେ ଚାଷୀମାନେ ଆନ୍ଦୋଳନରୁ ହଟିଥିଲେ ା
ଅନ୍ୟପକ୍ଷେ ଜାନୁୟାରୀ ୧ତାରିଖରୁ ୩ତାରିଖ ପର୍ଯ୍ୟନ୍ତ ରାଜ୍ୟର ବିଭିନ୍ନସ୍ଥାନରେ ବର୍ଷା ହେବା ନେଇ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ଏପରି କି ଜିଲା ପ୍ରଶାସନ ପକ୍ଷରୁ ମଣ୍ଡିକୁ ଧାନ ନ ଆଣିବାକୁ ଡାକବାଜି ଯନ୍ତ୍ରରେ ଗା ଁଗାଁ ବୁଲି ଚାଷୀମାନଙ୍କୁ ଅବଗତ କରାଯାଉଛି। ହେଲେ ଜିଲାର ମଣ୍ଡିଗୁଡିକରେ ବର୍ତ୍ତମାନ ହଜାର ହଜାର ବସ୍ତା ଧାନ ପଡିରହିଛି। ସେନେଇ ଚାଷୀ ଚିନ୍ତାରେ ପଡିଛନ୍ତି। ପେକ୍ସ କର୍ମଚାରୀଙ୍କ ଓ ମିଲର୍ସଙ୍କ ଦ୍ୱାରା ନିୟୋଜିତ ଏଜେଣ୍ଟମାନେ ବିଭିନ୍ନ ଆଲ ଦେଖାଇ ଚାଷୀଙ୍କୁ ହଇରାଣ ହରକତ କରାଯାଉଥିବା ଚାଷୀମାନେ ଅଭିଯୋଗ କରିଛନ୍ତି।
କୋକସରା ପେକ୍ସ ଅଧୀନରେ ମାଝିଗଡ଼ା, ରେଙ୍ଗାଲପାଲି ଓ କୋକସରା ପଞ୍ଚାୟତର ୧୦ଟି ଗ୍ରାମର ପାଖାପାଖି ୨୫୦୦ କୁଇଣ୍ଟାଲ ଧାନ ବିକ୍ରି ନ ହୋଇ ମଣ୍ଡିରେ ପଡି ରହିଥିବା ସୂଚନା ମିଳିଛି। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେଇ ତୁରନ୍ତ ଚାଷୀଙ୍କ ସମସ୍ୟା ସମାଧାନ କରିବାକୁ ଚାଷୀମାନେ ଦାବି କରିଛିନ୍ତି। ଦାବି ପୂରଣ ନ ହେଲେ ଆନ୍ଦୋଳନକୁ ଜୋର୍ଦାର କରାଯିବ ବୋଲି ଚାଷୀମାନେ ଚେତାବନୀ ଦେଇଛନ୍ତି।
