ଢେଙ୍କାନାଳ ଅଫିସ,୧୮ା୫- ଚଳିତ ସାଧାରଣ ନିର୍ବାଚନର ଫଳାଫଳ ପାଇଁ ଆସନ୍ତା ୨୩ ତାରିଖରେ ଭୋଟ ଗଣତି ହେବ। ଏଥିପାଇଁ ପ୍ରଶାସନ ପକ୍ଷରୁ ଜୋରସୋରରେ ପ୍ରସ୍ତୁତି ଚାଲିଛି। ଏହାକୁ ନେଇ ପ୍ରାର୍ଥୀମାନଙ୍କ ମଧ୍ୟରେ ଉତ୍କଣ୍ଠା ବଢିବାରେ ଲାଗିଛି ା ବିଭିନ୍ନ ରାଜନୈତିକ ଦଳର ନେତୃବୃନ୍ଦ ଓ କର୍ମୀମାନଙ୍କ ମଧ୍ୟରେ ସହରର ଚା ଖଟି ଓ ଜନଗହଳି ସ୍ଥାନମାନଙ୍କରେ ବିଜୟ ଓ ପରାଜୟକୁ ନେଇ ଜୋରଦାର ହିସାବ ଚାଲିଛି। ସମସ୍ତ ଦଳର ପ୍ରାର୍ଥୀ ନିଜ ବିଜୟକୁ ନେଇ ଆଶାବାଦୀ ଅଛନ୍ତି ା ଭୋଟ ଗଣତି ପାଇଁ ନିୟୋଜିତ ହୋଇଥିବା କର୍ମଚାରୀମାନଙ୍କୁ ଜିଲା ପ୍ରଶାସନ ପକ୍ଷରୁ ତାଲିମ ପ୍ରଦାନ କରାଯାଉଥିବା ବେଳେ ପ୍ରାର୍ଥୀମାନେ ମଧ୍ୟ ଗଣତି ସମୟରେ ନିୟୋଜିତ ହେବାକୁ ଥିବା ନିଜର ଏଜେଣ୍ଟମାନଙ୍କୁ ମଧ୍ୟ ନିଜ ପକ୍ଷରୁ ତାଲିମ ଦେଉଥିବା ଜଣାପଡିଛି। ଏହାକୁ ନେଇ ରାଜନୈତିକ ଦଳଗୁଡିକ ମଧ୍ୟରେ ଉଷ୍ମତା ପ୍ରକାଶ ପାଇଛି ା ଏହି ନିର୍ବାଚନରେ ୯-ଢେଙ୍କାନାଳ ଲୋକ ସଭା ପାଇଁ ୯ ଜଣ ପ୍ରାର୍ଥୀ, ୫୫-ଢେଙ୍କାନାଳ ବିଧାନସଭା ଆସନ ପାଇଁ ୧୧ ଜଣ, ୫୬-ହିନ୍ଦୋଳ ସଂରକ୍ଷିତ ବିଧାନସଭା ପାଇଁ ୬ ଜଣ, ୫୭-କାମାକ୍ଷାନଗର ବିଧାନସଭା ନିର୍ବାଚନ ମଣ୍ଡଳୀ ପାଇଁ ୭ ଜଣ ଓ ୫୮-ପରଜଙ୍ଗ ବିଧାନସଭା ନିର୍ବାଚନ ମଣ୍ଡଳୀ ପାଇଁ ୬ ଜଣ ମୋଟ ୩୯ଜଣ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବ। ଢେଙ୍କାନାଳ ସହରସ୍ଥିତ ମହିଷାପାଟଠାରେ ଥିବା ଇଭିଏମ୍ ଓୟାରହାଉସରେ ଢେଙ୍କାନାଳ ବିଧାନସଭା ସମେତ ଲୋକ ସଭା, ହିନ୍ଦୋଳ ହାଇସ୍କୁଲଠାରେ ଲୋକ ସଭା ସମେତ ହିନ୍ଦୋଳ ବିଧାନସଭା, କାମାକ୍ଷାନଗର କଲେଜଠାରେ କାମାକ୍ଷାନଗର ଓ ପରଜଙ୍ଗ ବିଧାନସଭା ସମେତ ଲୋକ ସଭାର ଭୋଟଗଣତି ପାଇଁ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି ା ସକାଳ ୮ଟାରୁ ଭୋଟ ଗଣତି ଆରମ୍ଭ ହେବ। ଭୋଟ ଗଣତି କେନ୍ଦ୍ରକୁ ସମ୍ପୂର୍ଣ୍ଣ ଭାବେ କ୍ୟାମେରା ଓ ମୋବାଇଲ ନିଷେଧ କରାଯାଇଛି। ଗଣତି ସ୍ଥାନରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଥିବା ଜିଲା ପ୍ରଶାସନ ସୂତ୍ରରୁ ଜଣାପଡିଛି ା
