କୁଆମରା,୨୭।୭(ଡି.ଏନ.ଏ)- ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକ ଅନ୍ତର୍ଗତ ପୁରୁଣା ବାରିପଦା ପଞ୍ଚାୟତର ମାଙ୍କଡ଼କେନ୍ଦା ଗ୍ରାମରେ ବୁଧବାର ରାତିରେ ଭୋଜି ଖାଇ ୮୦ରୁ ଊର୍ଦ୍ଧ୍ୱ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି। ଗ୍ରାମର ଜଣେ ବ୍ୟକ୍ତିଙ୍କ ନୂତନ ଘର ପ୍ରତିଷ୍ଠା ଲାଗି ବୁଧବାର ଭୋଜି ଖାଇବାକୁ ଗ୍ରାମ ଲୋକଙ୍କୁ ନିମନ୍ତ୍ରଣ କରିଥିଲେ। ଭୋଜି ଖାଇଥିବା ବ୍ୟକ୍ତିଙ୍କ ମଧ୍ୟରୁ ଗୁରୁବାର ରାତିରେ ପ୍ରାୟ ୮୦ରୁ ଊର୍ଦ୍ଧ୍ୱ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ। ଆକ୍ରାନ୍ତଙ୍କ ମଧ୍ୟରେ ୩୫ ଜଣ ମହିଳା, ୩୬ ଜଣ ପୁରୁଷ ଓ ୧୧ଜଣ ଶିଶୁ ଅଛନ୍ତି। ଝାଡାବାନ୍ତି ଅଧିକ ବ୍ୟାପିବାର ସମ୍ଭାବନା ଥିବାରୁ ଶୁକ୍ରବାର ମଧ୍ୟାହ୍ନରେ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ଡ. ଅରୂପ ଅଭିଷେକ, ରାଜୀବ ଲୋଚନ ବାରିକ, ପର୍ଶୁରାମ ପାତ୍ର, ପଙ୍କଜ ସାହୁ, ସୁବୁନାଥ ସେଠୀ, ଗଣେଶ୍ୱର ବେହେରା, ରାଜେଶ ମହାନ୍ତି ତଥା ଖୁଣ୍ଟା ଡାକ୍ତରଖାନାର ସୁପରଭାଇଜର ମହେନ୍ଦ୍ର ନାଥ ସେଠୀଙ୍କ ସମେତ ଭ୍ରାମ୍ୟମାଣ ସ୍ବାସ୍ଥ୍ୟ ଟିମ ଗ୍ରାମରେ ପହଞ୍ଚି ପ୍ରାଥମିକ ଚିକିତ୍ସା ଆରମ୍ଭ କରିଛନ୍ତି। ଆକ୍ରାନ୍ତମାନଙ୍କୁ ମାଗଣା ଔଷଧ ବଣ୍ଟନ କରାଯାଇଛି। ସ୍ବାସ୍ଥ୍ୟ ବିଭାଗ ପକ୍ଷରୁ ଆକ୍ରାନ୍ତଙ୍କ ମଳ ଓ ସ୍ଥାନୀୟ ନଳକୂପ ଜଳର ନମୂନା ପରୀକ୍ଷା ପାଇଁ ନିଆଯାଇଛି। ଆକ୍ରାନ୍ତଙ୍କ ସଂଖ୍ୟା ବଢିବାର ସମ୍ଭାବନା ଥିବାରୁ ଆଶା, ଅଙ୍ଗନଓ୍ବାଡି କର୍ମୀ, ଏଏନଏମ ଓ ପୁରୁଷ ସ୍ବାସ୍ଥ୍ୟ କର୍ମୀଙ୍କୁ ନେଇ ଏକ ଟିମ ସ୍ଥାନୀୟ ଡାକ୍ତରଖାନାରେ ସଜାଗ ରହିଛନ୍ତି।
