ବାଲେଶ୍ୱର ଅଫିସ, ୨୦।୬- ବାଲେଶ୍ୱର ଜିଲା ରେମୁଣା ବ୍ଲକ ତୁଣ୍ଡୁରା ପଞ୍ଚାୟତରେ କୋଷ୍ଟ କେନାଲ ଉପରେ ଥିବା ୪୫ବର୍ଷର ପୁରୁଣା ପାଦଚଲା ପୋଲ ଗତ ୧୭ ତାରିଖରେ ଭୁଶୁଡ଼ି ପଡ଼ିଥିଲା। ଏହି ପୋଲ ଉପରେ ପ୍ରାୟ ୩ହଜାର ଲୋକ ନିର୍ଭର କରୁଥିବାରୁ ଜଳପ୍ରଚଳ ଏକପ୍ରକାର ଠପ୍ ହୋଇଯାଇଛି। ଏଠାରେ ନୂତନ ପୋଲ ନିର୍ମାଣ ପାଇଁ ଗ୍ରାମବାସୀ ଶୁକ୍ରବାର ପୂର୍ବାହ୍ନ ସମୟରେ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କୁ ଭେଟି ଦାବି କରିଥିଲେ। ଜିଲାପାଳଙ୍କ ନିର୍ଦ୍ଦେଶରେ ଜଳସେଚନ ବିଭାଗର ନିର୍ବାହୀଯନ୍ତ୍ରୀ ଅଭିମନ୍ୟୁ ବେହେରା, ସହକାରୀ ଯନ୍ତ୍ରୀ ନିର୍ମଳକାନ୍ତି ଜେନା, କନିଷ୍ଠଯନ୍ତ୍ରୀ ହରେକୃଷ୍ଣ ଧଳ ଘଟଣାସ୍ଥଳରେ ପହଞ୍ଚତ୍ ସ୍ଥିତି ଅନୁଧ୍ୟାନ କରିବା ସହ ନୂତନ ପୋଲ ନିର୍ମାଣ ନିମନ୍ତେ ପ୍ରକଳ୍ପ ଆରମ୍ଭ କରିଛନ୍ତି।
ଏହି କୋଷ୍ଟକେନାଲ ପୋଲ ଉପରେ ପଞ୍ଚାୟତର ଖଡୁପାହି, କଣ୍ଟର୍ଦ୍ଦା, ଦେଉଳବାଡ଼, ତୁଣ୍ଡୁରାପାହି ୪ଟି ରାଜସ୍ବ ଗ୍ରାମର ୩ହଜାର ଲୋକ ସହରକୁ ଯା’ଆସ କରିଥାନ୍ତି। ପୋଲର ରକ୍ଷଣାବେକ୍ଷଣ ଅଭାବରୁ ପିଲରଗୁଡ଼ିକ ନଷ୍ଟ ହୋଇଯାଇଥିଲା। ବିପଦସଙ୍କୁଳ ଅବସ୍ଥାରେ ଏହି ପୋଲ ଦେଇ ସ୍କୁଲ ଓ କଲେଜ ଛାତ୍ରୀଛାତ୍ର, ରାଶନ ହିତାଧିକାରୀ, ଭତ୍ତାଧାରୀ, ବ୍ୟାଙ୍କ, ପଞ୍ଚାୟତ କାର୍ଯ୍ୟାଳୟ ଓ ଚାଷଜମିକୁ ଯାତାୟାତ କରୁଥିଲେ। ଗତ ବୁଧବାର ହଠାତ୍ ଉକ୍ତ ପୋଲ ଭୁଶୁଡ଼ିଯାଇଥିଲା। ଫଳରେ ଯାତାୟାତରେ ବ୍ୟାଘାତ ସୃଷ୍ଟି ହୋଇଛି। ଅଧିକ ବର୍ଷା ହେଲେ ୪ଟି ଗ୍ରାମର ଲୋକେ ଜଳଘେରରେ ରହିବା ସହ ସହରଠାରୁ ବିଚ୍ଛିନ୍ନ ହୋଇଯିବେ। ଯଥାଶୀଘ୍ର ପୋଲ ନିର୍ମାଣ ପାଇଁ ଗ୍ରାମବାସୀଙ୍କ ସମେତ ସରପଞ୍ଚ ଅଜୟ ବାରିକ ଦାବି କରିବା ସହ ପ୍ରଥମେ ଅସ୍ଥାୟୀ ପୋଲ ନିର୍ମାଣ କରାଯିବାକୁ ଜିଲାପାଳଙ୍କୁ ଆବେଦନ କରିଛନ୍ତି।
ଏ ସମ୍ପର୍କରେ ଜଳସେଚନ ବିଭାଗର ନିର୍ବାହୀଯନ୍ତ୍ରୀ ବେହେରାଙ୍କୁ ଯୋଗାଯୋଗ କରାଯିବାରୁ ସେ କହିଛନ୍ତି ଭୁଶୁଡିଥିବା ପୋଲ ମରାମତି କରିବା ସମ୍ଭବ ନୁହେଁ। ଉକ୍ତ କୋଷ୍ଟ କେନାଲ ଉପରେ ନୂତନ ପୋଲ ନିର୍ମାଣ କରାଯିବ। କିନ୍ତୁ ତାଙ୍କ ବିଭାଗ ଠାରେ ଅର୍ଥ ନ ଥିବା କାରଣରୁ ପୂର୍ତ୍ତ ବିଭାଗର ରୁରାଲ ଡେଭେଲପ୍ମେଣ୍ଟ ଏବଂ ଡ୍ରେନେଜ୍ ବିଭାଗକୁ ଉକ୍ତ ପୋଲ ନିର୍ମାଣ ପାଇଁ ଜିଲାପାଳଙ୍କ ସହ ଆଲୋଚନା କରିବେ ବୋଲି ପ୍ରକାଶ କରିଛନ୍ତି।
