ଭିଏନା: ଅଷ୍ଟ୍ରିଆର ଜଣେ ପାଇଲଟ୍ କୋରନା ଭାଇରସ୍ ମହାମାରୀ ସମୟରେ ଘରେ ରହିବା ପାଇଁ ଆକାଶମାର୍ଗରୁ ଲୋକଙ୍କୁ ସଚେତନତା ବାର୍ତ୍ତା ଲେଖିଛନ୍ତି। ଏକ ରିପୋର୍ଟ ଅନୁଯାୟୀ, ‘ଷ୍ଟେ ହୋମ୍’ ବା ଘରେ ରହିବା ପାଇଁ ବାର୍ତ୍ତା ଲେଖିବାକୁ ପାଇଲଟ୍ ଫ୍ଲାଇଟ୍ ରାଡାରର ବ୍ୟବହାର କରିଥିଲେ। ପାଇଲଟ୍ ଭିଏନାରୁ ୫୦ ମାଇଲ୍ ଦୂର ଓ୍ବିନର ନେଷ୍ଟାଇଡ୍ ଏୟାର ପୋର୍ଟରୁ ସୋମବାର ଉଡ଼ାଣ କରିଥିଲେ। କେବଳ ‘ଷ୍ଟେ ହୋମ୍’ ବାର୍ତ୍ତା ଲେଖିବା ପାଇଁ ତାଙ୍କୁ ୨୪ ମିନିଟ୍ ସମୟ ଲାଗିଥିଲା।
ଗୁରୁବାର ସୁଦ୍ଧା ଅଷ୍ଟ୍ର୍ରିଆରେ କରୋନା ଭାଇରସ୍ ଆକ୍ରାନ୍ତଙ୍କ ସଂଖ୍ୟା ୧୮୪୩ରେ ପହଞ୍ଚିଥିଲା। ପାଇଲଟ୍ ତାଙ୍କ ନାମ ଘୋଷଣା କରିନାହାନ୍ତି। ସେ କହିଛନ୍ତି, ଲୋକଙ୍କୁ ଜାଗ୍ରତ କରିବା ପାଇଁ ମୁଁ ଏମିତି କରିଛି। କରୋନା ମହାମାରୀ ସମୟରେ ଆମେ ସମସ୍ତେ ଘରେ ରହିବା ଜରୁରୀ ଅଟେ। ଯାହା ଫଳରେ ଲୋକେ ସଂକ୍ରମଣରୁ ରକ୍ଷା ପାଇବେ। ମୁଁ ‘ଦ ଲାଇଟ୍ ଏୟାରକ୍ରାଫ୍ଟ ଡାଏମଣ୍ଡ ଡିଏ ୪୦’ରୁ ଉଡ଼ାଣ କରିଥିଲି। ୨୪ ମିନିଟ୍ରେ ଆକାଶରେ ଏହି ‘ଷ୍ଟେ ହୋମ୍’ ବାର୍ତ୍ତା ଲେଖିଥିଲି ବୋଲି ପାଇଲଟ୍ କହିଛନ୍ତି।
