ଢାକା,୧୯।୨- ବାଂଲାଦେଶ କ୍ରିକେଟ ବୋର୍ଡ (ବିସିବି) ସ୍ପିନ ବୋଲିଂ ପରାମର୍ଶଦାତା ଡାନିଏଲ ଭିଟୋରିଙ୍କ ସହ ଥିବା ଚୁକ୍ତିରେ ପରିବର୍ତ୍ତନ କରିବାକୁ ଯୋଜନା କରୁଛି। ବାଂଲାଦେଶ ସ୍ପିନରଙ୍କୁ ଭିଟୋରିଙ୍କ ପର୍ଯ୍ୟାପ୍ତ ସମୟ ଦେବା ଲାଗି ବୋର୍ଡ ଉଦ୍ୟମ କରୁଛି। ବର୍ତ୍ତମାନ ଚୁକ୍ତି ଅନୁଯାୟୀ ପୂର୍ବତନ ନ୍ୟୁଜିଲାଣ୍ଡ ଅଧିନାୟକ ଅଷ୍ଟ୍ରେଲିଆରେ ହେବାକୁ ଥିବା ଟି୨୦ ବିଶ୍ୱକପ୍ ପୂର୍ବରୁ ବାଂଲାଦେଶ ସ୍ପିନରଙ୍କ ସହ ୧୦୦ ଦିନ କାର୍ଯ୍ୟ କରିବେ। ଏଥିନେଇ ପ୍ରତ୍ୟେକ ଦିନ ଭିଟୋରିଙ୍କୁ ଅଢ଼େଇ ହଜାର ଆମେରିକୀୟ ଡଲାର ମିଳୁଛି। କୋଚ୍ଙ୍କ ସହ ଚୁକ୍ତିରେ ପରିବର୍ତ୍ତନ କରିବାକୁ ଉଦ୍ୟମ କରୁଥିବା ବିସିବି ମୁଖ୍ୟ କାର୍ଯ୍ୟକାରୀ ନିଜାମୁଦ୍ଦିନ ଚୌଧାରୀ କହିଛନ୍ତି। ଭିଟୋରିଙ୍କ ହାତରେ ସମୟ ଅଛି। ଡ୍ରେସିଂ ରୁମ୍ରେ ତାଙ୍କ ଉପସ୍ଥିତି ଦଳ ଉପରେ ସକାରାତ୍ମକ ପ୍ରଭାବ ପକାଇବ। ତାଙ୍କ ଅଭିଜ୍ଞତାର ସମ୍ପୂର୍ଣ୍ଣ ଫାଇଦା ଉଠାଇବାକୁ ଚାହୁଁ ବୋଲି ସେ କହିଛନ୍ତି। ଗତବର୍ଷ ଜୁଲାଇରେ ସୁନିଲ ଜୋଶୀଙ୍କ ସ୍ଥାନରେ ଭିଟୋରି ନିଯୁକ୍ତ କରାଯାଇଥିଲା।
