ଢେଙ୍କାନାଳ ଅଫିସ/ରାସୋଳ (ଡି.ଏନ୍.ଏ.), ୨୯।୫- ମାସିକିଆ ବଟି ନେଉଥିବାବେଳେ କଟକ ଭିଜିଲାନ୍ସ ସେଲ୍ ହାତରେ ଧରାପଡ଼ିଛନ୍ତି ଢେଙ୍କାନାଳ ଜିଲା ରାସୋଳ ଥାନାଧିକାରୀ ତଥା ଏସ୍ଆଇ ସନ୍ତୋଷ କୁମାର ପ୍ରଧାନ। ୫୦ହଜାର ଟଙ୍କା ସହ ଭିଜିଲାନ୍ସ ଅଧିକାରୀମାନେ ତାଙ୍କୁ କାବୁ କରିବାରେ ସକ୍ଷମ ହୋଇଛନ୍ତି। ସନ୍ତୋଷ ଏପରି ଅନେକ ବେଆଇନ କାର୍ଯ୍ୟରେ ଲିପ୍ତ ଥିବା ଅଭିଯୋଗ ହୋଇଛି। ତାଙ୍କ କଳାକାରନାମାର ଚିଠା ହାତେଇବାକୁ ଅଧିକାରୀମାନେ ଖୋଳତାଡ଼ ଆରମ୍ଭ କରିଛନ୍ତି।
ଭିଜିଲାନ୍ସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଅଞ୍ଚଳର କ୍ରଶର ମାଲିକ ଆଶୁତୋଷ ମହାନ୍ତିଙ୍କଠାରୁ ମାସିକିଆ ବଟି ଆଦାୟ କରୁଥିଲେ ସନ୍ତୋଷ। ନିର୍ବାଚନ ପରେ ସେ ୨ ଲକ୍ଷ ଟଙ୍କା ମାଗିବାରୁ ଏ ନେଇ ଅସହାୟତା ପ୍ରକାଶ କରିଥିଲେ ସମ୍ପୃକ୍ତ କ୍ରଶର ମାଲିକ। ତଥାପି ନିଜ ଜିଦ୍ରୁ ହଟି ନ ଥିଲେ ଥାନାଧିକାରୀ। ଏହାପରେ ଆଶୁତୋଷ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଯୋଜନା ଅନୁଯାୟୀ ମଙ୍ଗଳବାର ଅପରାହ୍ନରେ ଆଶୁତୋଷ ୫୦ହଜାର ଟଙ୍କା ଦେଉଥିବାବେଳେ ପୂର୍ବରୁ ଲୁଚି ରହିଥିବା ଭିଜିଲାନ୍ସ ଟିମ୍ ସ୍ଥାନୀୟ ଟୋଲ୍ ଗେଟ୍ ନିକଟରେ ଥାନାଧିକାରୀଙ୍କୁ କାବୁ କରିଥିଲେ। ଏହି ସମୟରେ ଧସ୍ତାଧସ୍ତି ହୋଇଥିଲା। ସାଦାପୋଷାକଧାରୀ ଭିଜିଲାନ୍ସ ଅଧିକାରୀଙ୍କୁ ଠେଲାପେଲା କରି ଖସି ପଳାଇଯିବାକୁ ଉଦ୍ୟମ କରୁଥିବାବେଳେ ଅଭିଯୁକ୍ତଙ୍କୁ ମାଡ଼ି ବସିଥିଲେ କର୍ମଚାରୀ। ଏହାପରେ ଥାନାଧିକାରୀଙ୍କ ସରକାରୀ ବାସଭବନରେ ଯାଞ୍ଚ କରାଯାଇଛି। ଟିମ୍ର ଅନ୍ୟ ସଦସ୍ୟମାନେ ସନ୍ତୋଷଙ୍କୁ କଟକସ୍ଥିତ ଭିଜିଲାନ୍ସ ସେଲ କାର୍ଯ୍ୟାଳୟକୁ ନେଇ ପଚରାଉଚୁରା ଚଳାଇଥିବା ଜଣାପଡ଼ିଛି। ଭିଜିଲାନ୍ସ ଡିଏସ୍ପି ପ୍ରଫୁଲ୍ଲ ପଟେଲଙ୍କ ନେତୃତ୍ୱରେ ଏହି ଚଢ଼ାଉ କରାଯାଇଥିଲା।
