ଲଣ୍ଡନ,୧୭ା୫- ଇଂଲଣ୍ଡ ଓ ଓ୍ବେଲ୍ସରେ ହେବାକୁ ଥିବା ବିଶ୍ୱକପ୍ ଲାଗି ଶୁକ୍ରବାର ଆଇସିସି ପକ୍ଷରୁ ଭାଷ୍ୟକାରଙ୍କ ତାଲିକା ପ୍ରକାଶ ପାଇଛି। ଏଥିରେ ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲି ଓ ସଞ୍ଜୟ ମଞ୍ଜରେକର ସ୍ଥାନ ପାଇଛନ୍ତି। ୨୦୧୫ ବିଶ୍ୱକପ୍ ଚାମ୍ପିୟନ ଅଷ୍ଟ୍ରେଲିଆ ଦଳର ଅଧିନାୟକ ମାଇକେଲ କ୍ଲାର୍କ, ଇଂଲଣ୍ଡର ନାସିର ହୁସେନ, ଓ୍ବେଷ୍ଟଇଣ୍ଡିଜର ଇଆନ ବିଶପ, ଶ୍ରୀଲଙ୍କାର କୁମାର ସଙ୍ଗକାରା, ମାଇକେଲ ଆଥର୍ଟନ, ନ୍ୟୁଜିଲାଣ୍ଡର ବ୍ରେଣ୍ଡନ ମ୍ୟାକୁଲମ, ଦକ୍ଷିଣ ଆଫ୍ରିକାର ଗ୍ରେମ୍ ସ୍ମିଥ ଓ ପାକିସ୍ତାନର ଓ୍ବାସିମ ଆକ୍ରମ ମଧ୍ୟ ସାମିଲ ହୋଇଛନ୍ତି। ଏମାନଙ୍କ ବ୍ୟତୀତ ତାଲିକାରେ ଅଭିଜ୍ଞ ଭାଷ୍ୟକାର ଶନ ପୋଲକ, ମାଇକେଲ ସ୍ଲାଟର, ମାଇକେଲ ନିକୋଲାସ, ମାଇକେଲ ହୋଲ୍ଡିଂ, ଇସା ଗୁଆ, ପୋମି ଏମ୍ବାଙ୍ଗ୍ବା, ହର୍ଷ ଭୋଗଲେ, ସାଇମନ ଡଲ, ଇଆନ ସ୍ମିଥ, ରମିଜ ରାଜା, ଅଲିସନ ମିଚେଲ, ଆର୍ଥର ଅଲି ଖାଁ ଓ ଇଆନ ଓ୍ବାର୍ଡ ମଧ୍ୟ ରହିଛନ୍ତି। କ୍ରିକେଟ ମହାକୁମ୍ଭ ଲାଗି ସମଗ୍ର ଇଂଲଣ୍ଡ ଓ ଓ୍ବେଲ୍ସ ବହୁ ଉତ୍ସାହିତ। କ୍ରିକେଟ ବିଶ୍ୱକପ୍ର ଏହି ସଂସ୍କରଣ ବହୁ ମଜାଦାର ହେବ। ମୁଁ ପ୍ରସାରଣ ଦାୟିତ୍ୱରେ ଥିବା ଚ୍ୟାନେଲ ଓ ଇତିହାସର ଅଂଶ ହେବା ପାଇଁ ବ୍ୟଗ୍ର ବୋଲି ପୂର୍ବତନ ଇଂଲଣ୍ଡ ଅଧିନାୟକ ନାସର ହୋସେନ କହିଛନ୍ତି। ସେହିଭଳି ଶ୍ରୀଲଙ୍କାର ପୂର୍ବତନ ଅଧିନାୟକ ସଙ୍ଗକାରା ପ୍ରକାଶ କରିଛନ୍ତି, ଇଂଲଣ୍ଡରେ ଏହି ସମର ସ୍ବତନ୍ତ୍ର ହେବାକୁ ଯାଉଛି। ସମ୍ଭବତଃ ଆଇସିସି ବିଶ୍ୱକପ୍ର ଦ୍ୱାଦଶ ସଂସ୍କରଣ ସବୁଠୁ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ହେବ। ଆୟୋଜକ ଇଂଲଣ୍ଡ ନିକଟରେ ଭଲ ଦଳ ରହିଛି। କିନ୍ତୁ ଆଉ କିଛି ଶକ୍ତିଶାଳୀ ଦଳ ରହିଛିନ୍ତି। ବହୁତ ଭଲ ପ୍ରଦର୍ଶନ ଦେଖିବାକୁ ମିଳିବ।
