ଇସ୍ଲାମାବାଦ,୧୪।୧୨: ନିଜର ବେକାବୁ ବୟାନକୁ ନେଇ ସବୁବେଳେ ଚର୍ଚ୍ଚାକୁ ଆସି ପରିହାସର ଶିକାର ହେଉଥିବା ପାକିସ୍ତାନର ରେଳମନ୍ତ୍ରୀ ଶେଖ ରସିଦ ଏଥର ମଧ୍ୟ ସେମିତି ଏକ ବୟାନ ଦେଇ ଆସିଛନ୍ତି ଚର୍ଚ୍ଚାକୁ। ଜମ୍ମୁ-କଶ୍ମୀରରୁ ୩୭୦ ଉଚ୍ଛେଦ ପରେ ହଡବଡେଇ ଯାଇଥିବା ପାକିସ୍ତାନ ଏଥର ପୁଣିଥରେ ନାଗରିକତା ସଂଶୋଧନ ବିଲ୍କୁ ନେଇ ହଡବଡେଇ ଯାଇଛି। ଏହାକୁ ନେଇ ଶେଖ ରସିଦ କହିଛନ୍ତି ପ୍ରଧାନମନ୍ତ୍ରୀ ମୋଦି ଭାରତୀୟ ମୁସଲମାନଙ୍କ ପାଇଁ ସମସ୍ୟା ସୃଷ୍ଟି କରୁଛନ୍ତି। ନାଗରିକତା ସଂଶୋଧନ ବିଲ୍ର ବିରୋଧ ସତ୍ତ୍ୱେ ଏହାକୁ ପାସ୍ କରିବାର ଅର୍ଥ ହେଉଛି ଭାରତୀୟ ମୁସଲମାନଙ୍କୁ ଅଣଦେଖା କରିବା। ତେଣୁ ମୋଦି ହିଟଲର ବୋଲି ମଧ୍ୟ ସେ କହିଛନ୍ତି। ଏତିକି ନୁହେଁ ଉକ୍ତ ବିଲ୍କୁ ନେଇ ଭାରତ-ପାକିସ୍ତାନ ମଧ୍ୟରେ ଯୁଦ୍ଧ ହେବ ବୋଲି ମଧ୍ୟ ସେ ଇଙ୍ଗିତ କରିଛନ୍ତି। ତେବେ ଜମ୍ମୁ-କଶ୍ମୀର ଓ ଭାରତର ମୁସଲମାନଙ୍କ ସହ ପାକିସ୍ତାନ ରହିଛି ବୋଲି ମଧ୍ୟ ସେ କହିବାକୁ ଭୁଲି ନାହାନ୍ତି।
