ମୁମ୍ବାଇ,୨୮।୭: ରାଷ୍ଟ୍ରବାଦୀ କଂଗ୍ରେସ ପାର୍ଟି(ଏନ୍ସିପି) ଅଧ୍ୟକ୍ଷ ଶରଦ ପାଓ୍ବାର କେନ୍ଦ୍ରର ଭାଜପା ସରକାରଙ୍କ ଉପରେ ଗମ୍ଭୀର ଅଭିଯୋଗ ଆଣିଛନ୍ତି। ପାଓ୍ବାର କହିଛନ୍ତି ମହାରାଷ୍ଟ୍ର ନିର୍ବାଚନ ପୂର୍ବରୁ ଭାଜପା ନିଜ ଶକ୍ତିର ଦୂରୁପଯୋଗ କରୁଛି। ଯେଉଁନେତାମାନେ ଭାଜପାରେ ସାମିଲ ହେବାକୁ ରାଜି ନୁହେଁ ସେମାନଙ୍କ ଉପରେ ଭାଜପା ଚାପ ପକାଉଛି ବୋଲି ପାଓ୍ବାର କହିଛନ୍ତି। ସେ ଆହୁରି କହିଛନ୍ତି ମହାରାଷ୍ଟ୍ର ନିର୍ବାଚନ ପୂର୍ବରୁ ଏନ୍ସିପି ଓ କଂଗ୍ରେସ ମଧ୍ୟରେ ପାଖାପାଖି ୨୪୦ ଆସନକୁ ନେଇ କଥାବାର୍ତ୍ତା ସରିଛି। ଅନ୍ୟ ଆସନ ଗୁଡିକ ପାଇଁ ଅନ୍ୟ ଦଳମାନଙ୍କ ସହ ମଧ୍ୟ କଥାବାର୍ତ୍ତା ଚାଲିଛି। ଆସନ୍ତା ୮-୧୦ଦିନ ମଧ୍ୟରେ ସବୁ ଆସନକୁ ନେଇ କଥାବର୍ତ୍ତା ହୋଇଯିବ ବୋଲି ସେ କହିଛନ୍ତି। ଅନ୍ୟପଟେ ଶରଦ ପାଓ୍ବାରଙ୍କ ବୟାନର ଉତ୍ତର ଦେଇ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିଶ କହିଛନ୍ତି ଏନ୍ସିପି ଓ କଂଗ୍ରେସର ବହୁ ନେତା ଭାଜପାରେ ସାମିଲ ହେବାକୁ ଇଚ୍ଛା ପ୍ରକାଶ କରିଛନ୍ତି। ହେଲେ ସେମାନଙ୍କ ମଧ୍ୟରୁ ବଛାବଛା ନେତାଙ୍କୁ ଭାଜପା ଗ୍ରହଣ କରିବ ବୋଲି ଫଡନବିଶ କହିଛନ୍ତି। ଯେଉଁମାନଙ୍କ ନାଁ ଇଡି କିମ୍ବା ଅନ୍ୟ କୌଣସି ଯାଞ୍ଚ ଏଜେନ୍ସି ତାଲିକାରେ ଅଛି ସେମାନଙ୍କୁ ଗ୍ରହଣ କରାଯିବ ନାହିଁ ବୋଲି ସେ କହିଛନ୍ତି। ଭାଜପା କେବେବି କାହା ଉପରେ ଦଳରେ ସାମିଲ ହେବାକୁ ନେଇ ଚାପ ପକାଇ ନାହିଁ ଲୋକେ ଆପଣାଛାଏଁ ଭାଜପାରେ ସାମିଲ ହେବାକୁ ଆସୁଛନ୍ତି। ତେଣୁ ପାଓ୍ବାର ନିଜ ଦଳକୁ ନେଇ ଆତ୍ମସମୀକ୍ଷା କରନ୍ତୁ ବୋଲି ଫଡନବିଶ କହିଛନ୍ତି।
