ତାଳଚେର, ୬ା୮(ନି.ପ୍ର.)
ଅନୁଗୋଳ ଜିଲା ତାଳଚେରସ୍ଥିତ ଏମ୍ସିଏଲ୍ର ଭରତପୁର କୋଇଲା ଖଣିରେ ଚାଲିଥିବା ଉଦ୍ଧାର କାର୍ଯ୍ୟ ବେଳେ ସୋମବାର ଏକ ମୁଣ୍ଡବିହୀନ ଗଳିତ ମୃତଦେହ ଉଦ୍ଧାର କରାଯାଇଛି। ମୃତକଙ୍କ ପରିଚୟ ଜଣାପଡି ନାହିଁ। ବଲଣ୍ଡା ପୋଲିସ ମୃତଦେହ ଜବତ କରି ତାଳଚେର ଉପଖଣ୍ଡ ଡାକ୍ତରଖାନା ଶବାଗାରରେ ରଖିଛି ା ଚିହ୍ନଟ ପରେ ତାହାକୁ ବ୍ୟବଚ୍ଛେଦ କରାଯିବ ବୋଲି ପୋଲିସ କହିଛି।
ପ୍ରକାଶ ଯେ, ଏମ୍ସିଏଲ୍ ପକ୍ଷରୁ ଘରୋଇ କମ୍ପାନୀ ସିକଲକୁ ଭରତପୁର ଖଣିରୁ କୋଇଲା ଉତ୍ତୋଳନ ଦାୟିତ୍ୱ ଦିଆଯାଇଛି। ଗତ ମାସ ୨୩ ତାରିଖ ରାତିରେ କୋଇଲା ଖନନ ଚାଲିଥିବା ବେଳେ ଖଣି ଭିତରକୁ ବିରାଟ ମାଟି ଓ କୋଇଲା ଅତଡ଼ା ଖସି ପଡ଼ିବାରୁ ଡ୍ରାଇଭର ପିପୁନ ବିଶ୍ୱାଳ, ସୁପରଭାଇଜର ରଶ୍ମିରଞ୍ଜନ ବେହେରା, ସିକ୍ୟୁରିଟି ଗାର୍ଡ ରମେଶ ଦାସ ଓ ପମ୍ପ ଖଲାସୀ ରାଜକିଶୋର ମହାପାତ୍ର ପୋତି ହୋଇଯାଇଥିଲେ। ଅନ୍ୟ ୯ଜଣ ଦୂରକୁ ଛିଟିକି ପଡ଼ିବାରୁ ସେମାନଙ୍କୁ ପ୍ରଥମେ ଉଦ୍ଧାର କରାଯାଇ ସେଣ୍ଟ୍ରାଲ ହସ୍ପିଟାଲରେ ଭର୍ତ୍ତି କରାଯାଇଥିଲା। ୨୪ ତାରିଖ ଅପରାହ୍ନରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା। ପ୍ରଥମେ ପିପୁନଙ୍କ ମୃତଦେହ ଉଦ୍ଧାର କରାଯାଇଥିଲା। ଏହାପରେ ୨୬ ତାରିଖରେ ଖଲାସୀ ରାଜକିଶୋର ମହାପାତ୍ର ଓ ସୁପରଭାଇଜର ରଶ୍ମିରଞ୍ଜନ ବେହେରାଙ୍କ ମୃତଦେହ ମିଳିଥିଲା। ହେଲେ ସିକ୍ୟୁରିଟି ଗାର୍ଡ ରମେଶଙ୍କ ମୃତଦେହ ମିଳି ନ ଥିଲା। ପରେ ଖଣି ଭିତରୁ ଗୋଟିଏ ହାତ ଓ ଗୋଡ଼ ସହ ପେଟର କିଛି ଅଂଶ ଉଦ୍ଧାର କରାଯାଇଥିଲେ ବି ତାହା କାହାର ଜଣାପଡ଼ି ନ ଥିଲା। ପରେ ରମେଶଙ୍କ ପରିବାର ଲୋକେ ତାହାକୁ ଚିହ୍ନଟ କରିବାରୁ ବ୍ୟବଚ୍ଛେଦ କରାଯାଇଥିଲା। ସୋମବାର ମୁଣ୍ଡବିହୀନ ଗଳିତ ମୃତଦେହ ଉଦ୍ଧାର ହୋଇଥିଲେ ବି ଖଣିରୁ ମାଟି କାଢ଼ିବା କାର୍ଯ୍ୟ ଜାରି ରହିଛି।
ଅପରପକ୍ଷରେ ଦୁର୍ଘଟଣା ପରଠାରୁ ଖଣି ବନ୍ଦ ଆନ୍ଦୋଳନ ଚାଲିଛି। ପ୍ରଥମେ ଭାଜପା ପକ୍ଷରୁ ଆନ୍ଦୋଳନ କରାଯାଇଥିଲା। ହେଲେ ତାହା ପ୍ରତ୍ୟାହାର ପରେ ମୃତକଙ୍କ ପରିବାର ଓ ଗ୍ରାମବାସୀ ଆନ୍ଦୋଳନ ଚଳାଇଛନ୍ତି। ଏଥିଯୋଗୁ କୋଲ୍ ଫିଲ୍ଡସରେ ଥିବା ସମସ୍ତ କୋଇଲା ଖଣି ବନ୍ଦ ରହିଛି। ଖଣି ଚାଲୁ କରିବାକୁ ଏମ୍ସିଏଲ୍ ପକ୍ଷରୁ ଅନୁରୋଧ କରାଯାଇଥିଲେ ମଧ୍ୟ ସେ ଦିଗରେ କିଛି ଅଗ୍ରଗତି ହୋଇ ନ ଥିବା ବେଳେ ଆଜି ତାଳଚେର କୋଲ ଫିଲ୍ଡସ୍ର ସମସ୍ତ କର୍ମଚାରୀ ବନ୍ଦ ରହିଥିବା ଖଣି ଚାଲୁ କରାଯିବା, ମୃତକଙ୍କ ପରିବାରକୁ ନିଯୁକ୍ତି, କ୍ଷତିପୂରଣ ପ୍ରଦାନ ଦାବିରେ ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ଶ୍ରମିକ ନେତା ସୌଭାଗ୍ୟ ପ୍ରଧାନ, ଶଙ୍କର ବେହେରା, ସଞ୍ଜୟ ମାଝି, ଚର୍ତୁଭୂଜ ଦାସଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳୀ ଉପଜିଲାପାଳଙ୍କୁ ଦାବିପତ୍ର ପ୍ରଦାନ କରିଥିଲେ।
