ଭବାନୀପାଟଣା,୬।୮(ଉତ୍ତମ କୁମାର ଦାଶ): କେନ୍ଦ୍ର ସରକାର ଅମୃତ ଭାରତ ଷ୍ଟେଶନ ଯୋଜନାରେ ରବିବାର କଳାହାଣ୍ଡି ଜିଲା ଭବାନୀପାଟଣା ରେଳ ଷ୍ଟେଶନକୁ ସାମିଲ କରିଛନ୍ତି। ଫଳରେ ଷ୍ଟେଶନର ପୁନଃନିର୍ମାଣ ସହ ସୌନ୍ଦର୍ଯ୍ୟକରଣ ସକାଶେ ୨୧ କୋଟି ଟଙ୍କା ଖର୍ଚ୍ଚ ହେବ। ଏଥିରେ ଉନ୍ନତମାନର ଯାତ୍ରୀ ପ୍ରତୀକ୍ଷାଳୟ, ଫୁଟ୍ ବ୍ରିଜ, ଅତ୍ୟାଧୁନିକ ଶୌଚାଳୟ, ଷ୍ଟେଶନର ପ୍ରବେଶ ଦ୍ୱାର ଓ ବାହ୍ୟ ଦ୍ୱାର, ଟ୍ରାଫିକ ପାଇଁ ଉନ୍ନତ ସଞ୍ଚାଳନ କ୍ଷେତ୍ର, ପାର୍କିଂ, ଉଜ୍ଜ୍ୱଳ ଆଲୋକ, ସବୁଜ ଶକ୍ତି ବ୍ୟବହାର କରି ପରିବେଶ ଅନୁକୂଳ ପ୍ଲାଟଫର୍ମ, ଉନ୍ନତମାନର ବିଲ୍ଡିଂ ନିର୍ମାଣ କରାଯିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭର୍ଚୁଆଲ ମୋଡ୍ରେ ଯୋଗଦେଇ ଏହାର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଭବାନୀପାଟଣା ରେଳ ଷ୍ଟେଶନରେ ଆୟୋଜିତ କାର୍ଯ୍ୟକ୍ରମରେ କଳାହାଣ୍ଡି ଏମ୍ପି ବସନ୍ତ ପଣ୍ଡା, ଭବାନୀପାଟଣା ବିଧାୟକ ପ୍ରଦୀପ୍ତ ନାଏକ, ପଦ୍ମଶ୍ରୀ ପଟ୍ଟାୟତ ସାହୁଙ୍କ ସମେତ ସମ୍ବଲପୁର ରେଳ ଡିଭିଜନର ଏଡିଆର୍ଏମ୍ ଓ ଅନ୍ୟ ରେଳ ଅଧିକାରୀ ପ୍ରମୁଖ ଉପସ୍ଥିତ ଥିଲେ।
