ଲୋଇସିଂହା,୧୩।୭(ଡି.ଏନ୍.ଏ): – ବଲାଙ୍ଗୀର ଜିଲା ଲୋଇସିଂହା ବ୍ଲକ ବାଦିବାହାଲ ପଁଚେତ୍ ସଦର ଗଁ। ର ଦୁଇ ଦିବ୍ୟାଙ୍ଗ ବହେନ୍ ଚାର ଭୋଇ(୪୫) ଆର ସୁଦ୍ରା(୪୦)। ବ୍ଲକ ପରଶାସନ ତରଫୁ ମଧୁବାବୁ ପେନସନ ଯୋଜନାରେ ସାମିଲ କରି ଲୋଇସିଂହା ବିଡିଓ ରାମଚନ୍ଦ୍ର ଖାଡ଼ିଆ ସେମାନକୁ ଗୁଟେ ମାସର ଭତା ଦେଇଛନ୍। ଭତା ଟଁକା ପାଏଲା ଉତାରୁ ଦୁଇ ବହେନ୍ ଖୁସିରେ ଗଦ୍ଗଦେଇ ଯାଇଥିଲେ।
ପୂରବର ସୂଚନା ହିସାବେ ବାଦିବାହାଲ ଗଁ। ର ବେହେରା ପଡ଼ାର ଅମର ଭୋଇ (୯୦)। ୧୫ ବଛର ଆଗରୁ ତାକର ମାଏକିନାର ମୁରତୁ ହେଇଛେ। ବୁରୁଧ୍ ଅମର ବଏସ୍ ଅଧ୍କା ହେବାର ଲାଗି ଏହେଦ୍କା ଅପାରୁ ହେଇଯାଇଛନ୍। ଇଆଡ଼େ ଦୁଇ ଦିବ୍ୟାଙ୍ଗ ଝି’ ଚାର ଆର ସୁଦ୍ରା କେହେନ୍ସି କାମ୍ବୁତା ନାଇଁ କରିପାରବାର। ଇଆଡ଼େ ଇ ଦୁଖି ପରିବାର ଆଏଜ୍ତକ ସରକାରକଁର ଆବାସ ଯୋଜନାରୁ ବଁଚିତ୍ ହେଇ ରହିଛନ୍। ସେନ୍ତା ଦିବ୍ୟାଙ୍ଗ ଦୁଇ ବହେନ୍ ଚାର ଆର ସୁଦ୍ରା ଭତା ଯୋଜନାରୁ ବଁଚିତ୍ ହେଇ ରହିଥିଲେ। ଇ ବାବ୍ଦେ ଗଲା ୭ ତାରିଖ ଧରିତ୍ରୀ ସମ୍ବଲପୁର ସଂସ୍କରଣରେ ‘ବୁରୁଧ୍କଁର ଉପରେ ଦୁଇ ଦିବ୍ୟାଙ୍ଗ ଝି’ର ବୋଝ୍’ ଶୀରଷକ୍ରେ ଖବର ବାହାରିଥିଲା। ଖବର ବାହାରଲା ଉତାରୁ କେତେ ସାମାଜିକ ସଂଗଠନ, ନିରବାଚିତ ଜନ ପରତିନିଧି ଆର ପରଶାସନ ତତ୍ପରତା ଦେଖେଇଥିଲେ। ଗୁରୁବାର ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗ ବାଦିବାହାଲ ଗଁାର ଦୁଇ ଦିବ୍ୟାଙ୍ଗ ବହେନ୍କେ ଯେତେ ଜଲଦି ହେବା ଭତା ଯୋଜନାରେ ସାମିଲ କରବାକେ ବିଡିଓ ରାମଚନ୍ଦ୍ର ଖାଡ଼ିଆକୁଁ ନିରଦେଶ ଦେଇଥିଲେ। ଶୁକୁରବାର ବାଦିବାହାଲର ଯୁବମୋର୍ଚ୍ଚା ସଦସ୍ୟ ସୁନୀଲ ଦାସ, ଗୋପବନ୍ଧୁ ବଗର୍ତ୍ତି ଆର ମାହେଶ୍ୱରୀ ସଂଗଠନର କରମକରତାକଁର ଉପସ୍ଥିତିରେ ଦୁଇ ଦିବ୍ୟାଙ୍ଗ ବହେନ୍କେ ବିଡିଓ ଖାଡ଼ିଆ ପହେଲା ମାସର ଭତା ଦେଇଥିଲେ। ଇ ଦୁଖି ପରିବାରକେ ଯେତେ ଜଲଦି ହେବା ଅନ୍ତ୍ୟୋଦୟ ଅନ୍ନପୂର୍ଣ୍ଣା ଯୋଜନାରେ ଚାଉଲ ଆର ପକାଘର ଖଁଡ଼େ ଯୁଗେଇ ଦେବାକେ ଦୁଇ ସଂଗଠନ୍ର କରମକରତା ଦାବି କରିଥିଲେ।
