ଲାଠୋର, ୨୦ା୬ (ଡି.ଏନ୍.ଏ): କେନ୍ଦ୍ର ଆର ରାଏଜ୍ ସରକାର ଇନ୍ଦିରା ଗାନ୍ଧୀ, ମଧୁବାବୁ ପେନସନ ଯୋଜନାରେ ବୁଢ଼ାବୁଢ଼ି, ବିଧବା, ଛାର୍ରି, ଦିବ୍ୟାଙ୍ଗମାନକୁ ଭତା ଯୁଗେଇ ଦେଉଛନ୍। ସେନ୍ତା ଗରିବ୍ ଦୁଖି, ନିଅଁାସିମାନକୁ ଆବାସ ଯୋଜନାରେ ପକାଘର ଯୁଗେଇ ଦେଉଛନ୍। ହେଲେ ଅନେକ ଜାଗାରେ ଭିନେ ଭିନେ କାରନ୍ରୁ ହକ୍ଦାର ହିତାଧିକାରୀ ଯୋଜନାର ସୁଫଲ ପାଏବାରୁ ବଁଚିତ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ମାଲପଡ଼ା ପଁଚେତ୍ ଅଧୀନ କନ୍ଦେଇଛାପର ଖଇରାପଡ଼ାରେ।
ସୂଚନା ଅନ୍ସାରେ ଖଇରାପଡ଼ାରେ ସ୍ବର୍ଗତ ଗୋପିନାଥ ଭୋଇକଁର ଘର। ସେ ୫ ବଛର ଆଗରୁ ଆରପାରକେ ଚାଲିଯାଇଛନ୍। ଏହେଦେ ତାକର ପରିବାରରେ ବିଧବା ମାଏକିନା ଉର୍ବଶୀ ଭୋଇ ଆର ପୁଓ ବେଣୁ ରହିଛନ୍। ଗୁଟେ ବଲି ଝି’ ପଦ୍ମିନୀ ବିହାଚୁରା ହେଇ ଶାଶ୍ ଘରେ ଖଟୁଛନ୍। ପରିବାରଟା ନିହାତି ଗରିବ୍ ହେଇଥିଲାବେଲେ ଜମିବାଡ଼ି, ଘରଡ଼ିହ ବଲି କିଛି ନାଇଁ। ଗୋଚର ଆର ପତରା ଜାଗାରେ ଛୁଟିଆମୁଟିଆ ଚାଷ୍ ଟିକେ କରି ମା’ପୁଓ ବଡ଼ା ଦୁଖେ ଚଲୁଛନ୍। ଜାଗାବାଡ଼ି ଅଭାବୁ ସରକାରୀ ଜାଗାରେ ଗୁଟେ ମାଏଟ୍ କୁରିଆରେ ଖପର ଛାଉନି କରି ମୁଡ଼ଗୁଁଜିଛନ୍। ବହୁତ୍ ସମିଆରେ ଅଭାବ ଅନାଟନ ଲାଗି ମା’ପୁଓ ପାସର ଜଂଗଲରୁ ସରଗି ପତର ଆନି ଖଲିଦନା ଟିପି ବିକାଭଂଗା କରୁଛନ୍। ସେଥ୍ରୁ ଯାହା ପାଉଛନ୍ ତାକର ତେଲନୁନ୍ ଯଥରକଥର ଚଲୁଛେ। ଇଆଡ଼େ ଗୋପିନାଥ ଆରପାରକେ ଚାଲିଯିବାର ପଁାଚ୍ ବଛର ବିତିଯାଇଥିଲେ ବି ଉର୍ବଶୀ ବିଧବା ଭତା ପାଏବାରୁ ବଁଚିତ୍ ହେଇ ରହିଛନ୍। ସେନ୍ତା ପରିବାରଟା ନିହାତି ଗରିବ୍ ଶ୍ରେଣୀର ହେଇଥିଲେ ବି ଆଏଜ୍ତକ ଆବାସ ଯୋଜନାରେ ସାମିଲ ହେଇ ନାଇଁପାରି। ସରକାରୀ ଯୋଜନାରେ ମାସିକ ପାଉଥିବାର ୧୦ କେ.ଜି. ଚାଉଲକେ ଛାଡ଼ିଦେଲେ ପରିବାରଟା ଆର କେହେନ୍ସି ପରକାର ସାହାଯ୍ ନାଇଁ ପାଏବାର। ଥାନୀୟ ପରଶାସନ ଇ ଦୁଖି ପରିବାର ଉପରେ ଖାସ ଦୁରୁଷ୍ଟି ଦେଇ ଉର୍ବଶୀକୁଁ ଭତା ଆର ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ପଡ଼ାବାସୀ ଦାବି କରିଛନ୍।
