ସମ୍ବଲପୁର,୧୫ା୪(ବ୍ୟୁରୋ): ସମ୍ବଲପୁର ଜିଲା ମୁଖ୍ୟ ଚିକିତ୍ସାଳୟରେ କୋଭିଡ-୧୯ ମେଡିକାଲ ନିର୍ମାଣ କରାଯାଉଛି। ଏଣୁ ଏଠାରେ ରୋଗୀ ସେବା ବନ୍ଦ କରି ଦିଆଯାଇଛି। ଅଇଁଠାପାଲି ଓ ଡା. ଜନାର୍ଦ୍ଦନ ପୂଜାରୀ ମାତୃମଙ୍ଗଳ କେନ୍ଦ୍ରରେ ବିକଳ୍ପ ବ୍ୟବସ୍ଥା କରାଯାଇଛି ବୋଲି ଖୋଦ୍ ଜିଲା ପ୍ରଶାସନ ଓ ଜିଲା ସ୍ବାସ୍ଥ୍ୟ ବିଭାଗ କହୁଛି। ହେଲେ ଏହା ମିଛ ବୋଲି ପ୍ରମାଣିତ ହୋଇଛି। ବାସ୍ତବରେ ଉପରୋକ୍ତ ଦୁଇ ଜାଗାରେ ରୋଗୀସେବା ଠିକ୍ ଭାବେ ଆରମ୍ଭ ହୋଇ ନ ଥିବା ସ୍ପଷ୍ଟ ହୋଇଛି। ବୁଧବାର ହୀରାକୁଦ ଅଞ୍ଚଳର ଜଣେ ଗର୍ଭବତୀ ମହିଳା ଜିଲା ମୁଖ୍ୟ ଚିକିତ୍ସାଳୟକୁ ଆସି ହଇରାଣ ହେବା ପରେ ପ୍ରଶାସନର ଏହି ମିଛ ଧରା ପଡିଛି। ତାଙ୍କୁ ଭିମସାର ନେବାକୁ ପରାମର୍ଶ ଦିଆଗଲା। ଯଦି ଅଇଁଠାପାଲି ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ଓ ଡା. ଜନାର୍ଦ୍ଦନ ପୂଜାରୀ ମାତୃମଙ୍ଗଳ କେନ୍ଦ୍ରରେ ବିକଳ୍ପ ବ୍ୟବସ୍ଥା କରାଯାଇଛି ବୋଲି ଖୋଦ୍ ଜିଲା ପ୍ରଶାସନ ଓ ଜିଲା ସ୍ବାସ୍ଥ୍ୟ ବିଭାଗ କହୁଛି ତେବେ ଏହି ଦୁଇ ମେଡିକାଲକୁ ରୋଗୀକୁ ନ ପଠାଇ ବୁର୍ଲା ପଠାଯିବାର କାରଣ କ’ଣ ବୋଲି ପ୍ରଶ୍ନ ଉଠିଛି। ପ୍ରକାଶଯୋଗ୍ୟ, ଏପ୍ରିଲ ୧୭ ତାରିଖ ତାଙ୍କୁ ପ୍ରସବ ପାଇଁ ସମୟ ଦିଆଯାଇଥିଲା। ହେଲେ ଯନ୍ତ୍ରଣା ଆରମ୍ଭ ହେବାରୁ ସେ ଅଟୋରେ ଆଶା କର୍ମୀଙ୍କ ସହ ମେଡିକାଲ ଆସିଥିଲେ। ହେଲେ କୋଭିଡ ମେଡିକାଲ ପାଇଁ କାମ ଚାଳୁଥିବାରୁ ଏଠାରେ ଚିକିତ୍ସା ହୋଇ ପାରିବ ନାହିଁ ବୋଲି ଉପସ୍ଥିତ ସ୍ବାସ୍ଥ୍ୟ କର୍ମଚାରୀ କହିଥିଲେ। ପରେ ମେଡିକାଲର ଉଚ୍ଚ ପଦସ୍ତ ଅଧିକାରୀଙ୍କୁ ଆଶାକର୍ମୀ ଜଣକ ସମସ୍ୟା ଉପରେ ଅବଗତ କରିବାରୁ ବୁର୍ଲା ଭିମସାର ନେଇଯିବାକୁ ସମ୍ପୃକ୍ତ ଉଚ୍ଚ ଅଧିକାରୀ ଆଶାକର୍ମୀଙ୍କୁ ପରାମର୍ଶ ଦେଇଥିଲେ। ଏଣୁ ୧୦୨ ଆମ୍ବୁଲାନ୍ସରେ ରୋଗୀଙ୍କୁ ବୁର୍ଲା ନିଆଯାଇଥିଲା। ରୋଗୀଙ୍କ ପରିବାର ବର୍ଗଙ୍କ ଅଭିଯୋଗ କ୍ରମେ ଯଦି ଏଠାରେ ଚିକିତ୍ସା ବନ୍ଦ ହୋଇଯାଇଛି ତାହା ହେଲେ ଲୋକମାନେ ଜାଣିବା କଥା। ଏ ନେଇ ସର୍ବସାଧାରଣରେ ଅବଗତ ମଧ୍ୟ କରିବା ଆବଶ୍ୟକ।
