ବ୍ରହ୍ମପୁର ଅଫିସ,୧୧।୪: ଗଞ୍ଜାମ ଜିଲା ବଡ଼ବଜାର ଥାନା ଅନ୍ତର୍ଗତ ଲକ୍ଷ୍ମୀନୃସିଂହ ସାହିରେ ଶୁକ୍ରବାର ରାତିରେ ଜଣେ ବ୍ୟବସାୟୀଙ୍କୁ ଦାଦାବଟି ମାଗିବା ସହ ଆକ୍ରମଣ ହୋଇଛି। ଏପରିକି ଦୁର୍ବୃତ୍ତମାନେ ତାଙ୍କ ସୁନା ଚେନ୍ଟି ମଧ୍ୟ ଲୁଟି ନେଇଛନ୍ତି। ପୋଲିସ ବ୍ୟବସାୟୀ ବି. ହାଡୁ ପାତ୍ରଙ୍କ ଅଭିଯୋଗ କ୍ରମେ ୮୫/୨୦ରେ ଏକ ମାମଲା ରୁଜୁ କରି ଘଟଣାର ଅନୁସନ୍ଧାନ ଚଳାଇଛି। ଲୁଟେରାମାନେ ଗଣେଶ ନଗରର ପ୍ରଦୀପ ସାହୁ ଓ ତାଙ୍କ ସହଯୋଗୀ ହଳଦିଆପଦରର କାଳିଆ ସାହୁ ବୋଲି ପୋଲିସ ଚିହ୍ନଟ କରିଛି। ପୂର୍ବରୁ ଏକ ଆକ୍ରମଣ ଘଟଣାରେ ପ୍ରଦୀପ ସାହୁ ଗିରଫ ହୋଇ ଜେଲ ଯାଇଥିଲେ। ନିକଟରେ ସେ ଜେଲରୁ ଜାମିନରେ ଆସି ପୁଣି ଥରେ ଅପରାଧ ଘଟାଇଛନ୍ତି ବୋଲି ଥାନାଧିକାରୀ ପ୍ରଶାନ୍ତ ଭୂପତି ସୂଚନା ଦେଇଛନ୍ତି। ଖୁବ୍ଶୀଘ୍ର ଅପରାଧୀମାନଙ୍କୁ ଗିରଫ କରାଯିବ ବୋଲି ସେ କହିଛନ୍ତି ।
