ଆଟଲାଣ୍ଟା,୨୬।୭- ଜୋନାଥନ ଏର୍ଲିଚଙ୍କୁ ସାଥୀ କରି ଖେଳୁଥିବା ଡିଭିଜ ଶରନ ଏଠାରେ ଚାଲିଥିବା ଏଟିପି ଆଟଲାଣ୍ଟା ଓପନର ପୁରୁଷ ଡବଲ୍ସ ବର୍ଗର କ୍ୱାର୍ଟର ଫାଇନାଲରେ କିମ୍ବଦନ୍ତୀ ଯୋଡ଼ି ମାଇକ ଓ ବବ୍ ବ୍ରାୟନଙ୍କ ସହ ମୁକାବିଲା କରିବେ। ଶରନ ଓ ଏର୍ଲିଚ ଏଟିପି ୨୫୦ ଇଭେଣ୍ଟର ପ୍ରଥମ ରାଉଣ୍ଡରେ ମିଓମିର କେମାନୋଭିକ୍ ଓ ରବର୍ଟ ଲିଣ୍ଡଷ୍ଟେଡଙ୍କୁ ୨-୬, ୬-୩, ୧୩-୧୧ ସେଟରେ ହରାଇଥିଲେ। ଏପର୍ଯ୍ୟନ୍ତ ୧୦୦ରୁ ଅଧିକ ଏଟିପି ଟାଇଟଲ ଜିତିସାରିଥିବା ବ୍ରାୟନ ବ୍ରଦର୍ସ ନିଜ ଦେଶର ଖ୍ରିଷ୍ଟଫର ଇବ୍ୟାଙ୍କ୍ସ ଓ ଡୋନାଲ୍ଡ ୟଙ୍ଗଙ୍କୁ ୬-୪, ୬-୨ ସେଟ୍ରେ ପରାସ୍ତ କରିଛନ୍ତି। ଅନ୍ୟପକ୍ଷରେ ଭେଟେରାନ ଲିଆଣ୍ଡର ପେସ ଓ ତାଙ୍କ ସାଥୀ ମାରିଅସ କପିଲ ପ୍ରଥମ ରାଉଣ୍ଡରୁ ପରାଜୟ ସହ ବିଦାୟ ନେଇଛନ୍ତି।
