ବ୍ରହ୍ମପୁର ଅଫିସ,୬ା୧-ବ୍ରହ୍ମପୁର ବିଶ୍ୱବିଦ୍ୟାଳୟ ପରିସରରେ ଥିବା ହରିଣ ପାର୍କ ସ୍ଥାନାନ୍ତର ହେବା ନିଶ୍ଚିତ ହୋଇଛି ା ସେଣ୍ଟ୍ରାଲ ଜୁ ଅଥରିଟି ଅଫ ଇଣ୍ଡିଆ ନିର୍ଦ୍ଦେଶନାମାର ୯ ବର୍ଷ ପରେ ଏହି ପାର୍କକୁ ସ୍ଥାନାନ୍ତର କରାଯିବା ଉପରେ ବନ ବିଭାଗ ଗୁରୁତ୍ୱ ଦେଇଛି ା ଜାନୁୟାରୀ ଶେଷରେ ପାରଳାଖେମୁଣ୍ଡିର ଲଖାରି ଅଞ୍ଚଳକୁ ଏହି ଉଦ୍ୟାନ ହରିଣଙ୍କୁ ସ୍ଥାନାନ୍ତର କରାଯିବା ନେଇ ସୂଚନା ମିଳିଛି। ଲଖାରି ଅଞ୍ଚଳର ୫ ଏକର ପରିମିତ ଜମିରେ ହରିଣଙ୍କ ପାଇଁ ସ୍ବତନ୍ତ୍ର ଏନ୍କ୍ଲୋଜର ନିର୍ମାଣ କରାଯିବା ପରେ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହେବ ବୋଲି ବ୍ରହ୍ମପୁର ଡିଏଫଓ ଅମ୍ଳାନ କୁମାର ନାୟକ ସୂଚନା ଦେଇଛନ୍ତି ା
ପୁର ବିଶ୍ୱବିଦ୍ୟାଳୟ ପରିିସରରେ ଥିବା ହରିଣ ପାର୍କକୁ ସ୍ଥାନାନ୍ତର କରିବା ନେଇ ବହୁବାର ବିଶ୍ୱବିଦ୍ୟାଳୟ ପକ୍ଷରୁ ଚିଠି କରାଯାଇଥିଲା। ଏନେଇ ୨୦୧୭ ମାର୍ଚ୍ଚ ୩୧ରେ ବିଶ୍ୱବିଦ୍ୟାଳୟ ପକ୍ଷରୁ ସ୍ଥାନାନ୍ତର ଖର୍ଚ୍ଚ ବାବଦକୁ ୧୦ ଲକ୍ଷ ଟଙ୍କା ପ୍ରଦାନ କରାଯାଇଥିଲା। ସରକାର ଓ ବନ ବିଭାଗର ଅବହେଳା ଯୋଗୁ ବିଶ୍ୱବିଦ୍ୟାଳୟ ପକ୍ଷରୁ ଖର୍ଚ୍ଚ ଦିଆଯିବା ସତ୍ତ୍ୱେ ମଧ୍ୟ ସ୍ଥାନାନ୍ତର ଦିଗରେ ବନବିଭାଗ ପକ୍ଷରୁ ପ୍ରକ୍ରିୟା ଆରମ୍ଭ କରାଯାଇ ନ ଥିଲା। ଏନେଇ ବହୁବାର ବିଶ୍ୱବିଦ୍ୟାଳୟ ପକ୍ଷରୁ ଚିଠି ପରେ ଚଳିତ ମାସ ଶେଷ ସୁଦ୍ଧା ପାର୍କରେ ଥିବା ହରିଣଙ୍କୁ ସ୍ଥାନାନ୍ତର କରାଯିବାକୁ ନିଷ୍ପତ୍ତି ନିଆଯାଇଛି। ବ୍ରହ୍ମପୁର ଡିଏଫଓଙ୍କ ସୂଚନା ପ୍ରକାରେ, ଏନେଇ ଡିସେମ୍ବରରେ ନନ୍ଦନକାନନର ଏକ ବିଶେଷଜ୍ଞ ଦଳ ହରିଣଙ୍କ ସ୍ବାସ୍ଥ୍ୟ ପରୀକ୍ଷା କରିଛନ୍ତି। ପାରଳାଖେମୁଣ୍ଡି ଡିଏଫଓଙ୍କ ପକ୍ଷରୁ ଲଖାରିରେ ନିର୍ମାଣ ଚାଲିଥିବା ଏନ୍କ୍ଲୋଜର କାର୍ଯ୍ୟ ଶେଷ ହେବା ପରେ ଜାନୁୟାରୀ ଶେଷରେ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହେବା ନେଇ ଡିଏଫଓ କହିଛନ୍ତି। ଅନ୍ୟପକ୍ଷରେ ଏନେଇ ପାରଳାଖେମୁଣ୍ଡି ଡିଏଫଓ ବିବେକ କୁମାରଙ୍କ କହିବାନୁଯାୟୀ, ହରିଣଙ୍କ ରହିବା ସକାଶେ ଲଖାରି ଅଞ୍ଚଳରେ ପ୍ରାୟ ୫ ଏକର ଜମିରେ ଏନ୍କ୍ଲୋଜର ନିର୍ମାଣ କରାଯାଉଛି। ଜାନୁୟାରୀ ୩୦ ମଧ୍ୟରେ ନିର୍ମାଣ କାର୍ଯ୍ୟ ଶେଷ ହେବାକୁ ଲକ୍ଷ୍ୟ ରଖାଯାଇଥିବା ସେ ସୂଚାଇଛନ୍ତି ା
ବ୍ରହ୍ମପୁର ବିଶ୍ୱବିଦ୍ୟାଳୟର ସୌନ୍ଦର୍ଯ୍ୟ ବୃଦ୍ଧି ତଥା ପ୍ରାଣୀ ବିଜ୍ଞାନରେ ଅଧ୍ୟୟନରତ ଗବେଷିକା ଗବେଷକଙ୍କର ଗବେଷଣା କ୍ଷେତ୍ରରେ ସହାୟତା ଉଦ୍ଦେଶ୍ୟ ନେଇ ୧୯୯୧ରେ ବିଶ୍ୱବିଦ୍ୟାଳୟ ପରିସରରେ ହରିଣ ପାର୍କ ଆରମ୍ଭ ହୋଇଥିଲା ା ତତ୍କାଳୀନ ପ୍ରଶାସକ ପ୍ରଫେସର ସିସି ଦାଶଙ୍କ ସମୟରେ ରାଜ୍ୟପାଳଙ୍କ ହରିଣ ଉଦ୍ୟାନରୁ ୨ଟି ହରିଣ ଅଣାଯାଇ ୨.୦୨ ଏକର ଅଞ୍ଚଳରେ ଏହି ପାର୍କ ଆରମ୍ଭ କରାଯାଇଥିଲା। ବର୍ତ୍ତମାନ ଏହି ଉଦ୍ୟାନର ହରିଣଙ୍କ ସଂଖ୍ୟା ବୃଦ୍ଧି ପାଇ ୫୦ରେ ପହଞ୍ଚିିଛି। ସେମାନଙ୍କ ରକ୍ଷଣା ବେକ୍ଷଣ ଦାୟିତ୍ୱ ବିଶ୍ୱବିଦ୍ୟାଳୟ ପ୍ରାଣୀ ବିଜ୍ଞାନ ବିଭାଗ ଉପରେ ନ୍ୟସ୍ତ ରହିଛି । ଅନ୍ୟପକ୍ଷରେ ୨୦୧୦ରେ ସେଣ୍ଟ୍ରାଲ ଜୁ ଅଥରିଟି ଅଫ ଇଣ୍ଡିଆ ପକ୍ଷରୁ ଶିକ୍ଷାନୁଷ୍ଠାନ ପରିସରରେ ଥିବା ସମସ୍ତ ମିନି ଜୁ ଓ ବିଶ୍ୱବିଦ୍ୟାଳୟ ପରିସରରୁ ଏହି ଉଦ୍ୟାନକୁ ଉଠାଇବାକୁ ନିଷ୍ପତ୍ତି ନିଆଯାଇଥିଲା। ଏହି ପାର୍କକୁ ଅନ୍ୟତ୍ର ସ୍ଥାନାନ୍ତର କରାଯିବାକୁ ବିଶ୍ୱବିଦ୍ୟାଳୟ ପକ୍ଷରୁ ବନ ବିଭାଗକୁ ଚିଠି କରାଯାଇଥିଲା ା ଏହାପରେ ୨୦୧୭ ମାର୍ଚ୍ଚ ୩୧ରେ ସ୍ଥାନାନ୍ତର ଖର୍ଚ୍ଚ ବାବଦକୁ ବିଶ୍ୱବିଦ୍ୟାଳୟ ପକ୍ଷରୁ ବନ ବିଭାଗକୁ ୧୦ ଲକ୍ଷ ଟଙ୍କା ପ୍ରଦାନ କରାଯାଇଥିଲା ା
କିନ୍ତୁ ଆନ୍ତରିକତା ଅଭାବରୁ ଏହାର ସ୍ଥାନାନ୍ତର ପାଇଁ ନିଷ୍ପତ୍ତି ନିଆଯାଇଥିଲେ ମଧ୍ୟ ତାହା ହୋଇପାରୁ ନ ଥିଲା ା ଫଳରେ ସେମାନଙ୍କ ଖାଦ୍ୟ ପାନୀୟ ବାବଦକୁ ବର୍ଷକୁ ୫ ଲକ୍ଷ ଟଙ୍କା ବିଶ୍ୱବିଦ୍ୟାଳୟ ପ୍ରାଣୀ ବିଭାଗକୁ ଦେବାକୁ ପଡୁଥିଲା ା
