ଓଡ଼ାପଡ଼ା, ୨।୬(ଡି.ଏନ୍.ଏ.): ଢେଙ୍କାନାଳ ଜିଲା ୫୫ ନଂ. ଜାତୀୟ ରାଜପଥର ଗଉଡ଼ାକାଟେଣି ଛକ ନିକଟରେ ମଙ୍ଗଳବାର ସକାଳେ ଏକ ବୋଲେରୋ ଭିତରେ ଜଣେ ବ୍ୟକ୍ତିଙ୍କ ମୃତଦେହ ଥିବା ଅଞ୍ଚଳବାସୀ ଦେଖିବାକୁ ପାଇଥିଲେ। ଏହାକୁ ନେଇ ସମ୍ପୃକ୍ତ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକେ କିଛି ସମୟଧରି ଜାତୀୟ ରାଜପଥ ଅବରୋଧ କରିଥିଲେ। ଖବର ପାଇ ଉଭୟ କଣ୍ଟାବଣିଆ ଓ ମୋଟଙ୍ଗା ପୋଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ତଦନ୍ତ ଆରମ୍ଭ କରିଛି।
ପ୍ରାଥମିକ ତଦନ୍ତରୁ ମୃତ ବ୍ୟକ୍ତି ସ୍ଥାନୀୟ ଉପରବାଘଲୁଣ୍ଡା ଗ୍ରାମର ଆଦିକନ୍ଦ ବେହେରା (୩୮) ବୋଲି ଜଣାପଡ଼ିଛି। ସେ ସାମଲ ବିଲଡର୍ସ ନାମକ ଠିକା ସଂସ୍ଥାରେ ଡ୍ରାଇଭର ଭାବେ କାର୍ଯ୍ୟ କରୁଥିଲେ। ସୋମବାର ରାତିରେ ସେ ଟ୍ରକନେଇ ଜିଏମ୍ଆର କମ୍ପାନୀ ଆସପଣ୍ଡ ଅଞ୍ଚଳକୁ ପାଉଁଶ ପରିବହନ ପାଇଁ ଯାଇଥିଲେ। ତେବେ ସେଠାରେ କାର୍ଯ୍ୟରତ ସମୟରେ ତାଙ୍କ ଉପରେ ଉକ୍ତ ସଂସ୍ଥାର ଟ୍ରକ (ଓଡି୩୫ଡି୮୮୬୭) ଚଢ଼ିଯାଇଥିଲା। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ପରେ ଉକ୍ତ ଠିକାସଂସ୍ଥାର ଏକ ବୋଲୋରେ(ଓଡି୩୫ସି ୯୩୭୭) ଯୋଗେ ମୃତଦେହକୁ ସ୍ଥାନାନ୍ତର କରାଯାଉଥିବା ବେଳେ ଡ୍ରାଇଭର ଓ ଗାଡିରେ ଥିବା ଅନ୍ୟମାନେ ଗଉଡକାଟେଣି ନିକଟରେ ବୋଲେରୋ ଭିତରେ ମୃତଦେହ ଛାଡ଼ି ଫେରାର ହୋଇଯାଇଥିଲେ। ପ୍ରାଥମିକ ତଦନ୍ତରୁ ଏହା ଜଣାପଡ଼ିଥିବା ପୋଲିସ ପ୍ରକାଶ କରିଛି। ଏ ନେଇ କଣ୍ଟାବଣିଆ ଥାନାରେ ଏକ ମାମଲା(ନଂ. ୫୨/୨୦) ରୁଜୁ କରିଛି। ମୃତଦେହ ଏବଂ ସମ୍ପୃକ୍ତ ଗାଡ଼ିକୁ ଜବତ କରିବା ସହ ଘଟଣାର ତଦନ୍ତ ଚଳାଇଛି।
