ଧରାକୋଟ,୧୬ା୧(ଡି.ଏନ.ଏ.)-ଶିକ୍ଷାର ଗୁଣାତ୍ମକ ବିକାଶ ପାଇଁ ସରକାର ବିଭିନ୍ନ ପଦକ୍ଷେପ ହାତକୁ ନେଇଛନ୍ତି। ହେଲେ ଧରାକୋଟ ବ୍ଲକର ମୁଣ୍ଡମରାଇସ୍ଥିତ ପୁରାତନ ବାଳିକା ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ସୂର୍ଯ୍ୟନାରାୟଣ ସାହୁ ପିଲାଙ୍କୁ ପାଠ ପଢ଼ାଇବା ପାଇଁ ଏକ ଭିନ୍ନ ପଦକ୍ଷେପ ଆପଣେଇଛନ୍ତି।
ସୂଚନା ଓ ଯୋଗାଯୋଗ ଏବଂ ବୈଷୟିକ ଜ୍ଞାନ କୌଶଳ ମାଧ୍ୟମରେ ଶିକ୍ଷା ପ୍ରଦାନ କରାଯାଇ ଜଟିଳ ବିଷୟବସ୍ତୁକୁ ସରଳୀକରଣ କରି ଛାତ୍ରୀଛାତ୍ରଙ୍କୁ ଶିକ୍ଷାପ୍ରତି ଆକୃଷ୍ଟ କରାଇଛନ୍ତି। ଗରିବ ଶ୍ରେଣୀର ଛାତ୍ରୀଛାତ୍ରଙ୍କୁ ମୋବାଇଲ ଆପ୍ ମାଧ୍ୟମରେ କମ୍ପ୍ୟୁଟର ଦ୍ୱାରା ଶିକ୍ଷା ପ୍ରଦାନ କରିବା ସହ ଛାତ୍ରୀଛାତ୍ରମାନେ ଅତି ସହଜରେ ପାଠ ପଢୁଥିବା ଦେଖିବାକୁ ମିଳୁଛି। ଏହି କୌଶଳ ଆପଣାଇବା ପାଇଁ ଶିକ୍ଷକଙ୍କୁ ନିଜସ୍ବ ଖର୍ଚ୍ଚରୁ ଆର୍ଥିକ ବ୍ୟବସ୍ଥା କରିବାକୁ ପଡ଼ିଛି। ଏହି ପଦ୍ଧତି ଶିକ୍ଷଣ କାର୍ଯ୍ୟକୁ ଅଧିକ ଜୀବନ୍ତ କରିପାରିଛି। ଏହାଦ୍ୱାରା ଦୁର୍ବଳ ଛାତ୍ରୀଛାତ୍ରଙ୍କ ବିକାଶ ହୋଇପାରିବ। ସରକାର ଯଦି ଏହି ଅଭିନବ ପଦ୍ଧତିର ଉପଯୋଗ କରନ୍ତି ତା’ହେଲେ ଏହା ଛାତ୍ରୀଛାତ୍ରଙ୍କ ଭବିଷ୍ୟତ ଗଠନ ସହ ଶିକ୍ଷକମାନେ ମଧ୍ୟ ଏଥିରେ ବେଶ ଲାଭବାନ ହେବେ। ନିକଟରେ ଗଞ୍ଜାମ ଜିଲାର କନିଷି ଠାରେ ଅନୁଷ୍ଠିତ ବିଜ୍ଞାନ ମେଳାରେ ଏହାକୁ ପ୍ରଦର୍ଶିତ କରାଯାଇଥିବାବେଳେ ଗଞ୍ଜାମ ଜିଲା ଶିକ୍ଷାଧିକାରୀ ଡ଼. ସନାତନ ପଣ୍ଡାଙ୍କ ଦ୍ୱାରା ପ୍ରଶଂସିତ ହୋଇଥିଲା। ଏହାକୁ ପ୍ରଚଳନ କରିବା ପାଇଁ ଶିକ୍ଷାବିତ୍ ଓ ବୁଦ୍ଧିଜୀବୀମାନେ ଦାବି କରିଛନ୍ତି। ଗୋଟିଏ ସ୍ମାର୍ଟ ମୋବାଇଲ ସହ ଏଲ୍ଇଡି କିମ୍ବା କମ୍ପ୍ୟୁଟର, କି ବୋର୍ଡ ଏବଂ ଅତି କମ୍ ଖର୍ଚ୍ଚରେ ୱାଇଫାଇ କିମ୍ବା ବ୍ଲୁଟୁଥ୍ ମାଧ୍ୟମରେ ଏହି ଶିକ୍ଷାଦାନ ବ୍ୟବସ୍ଥା ହୋଇପାରିବ। ଏହି ପଦ୍ଧତିରେ ସମୟ ସାପେକ୍ଷ ରହିବା କଥା ଶିକ୍ଷକ ଜଣକ ଦାବି କରିଛନ୍ତି।
