ଭୁବନେଶ୍ୱର,୩ା୩(ବ୍ୟୁରୋ): ପିଲାବେଳୁ ସ୍ବପ୍ନ ଥିଲା ପ୍ୟାରିସ୍ର ଏଫିଲ୍ ଟାଓ୍ବାର ଥରେ ଦେଖିବା, ଆଗ୍ରାର ତାଜମହଲ ଆଗରେ ଫଟୋ ଉଠାଇବା, ଆଉ ଇଜିପ୍ଟର ପିରାମିଡ୍ ବୁଲିବା। ହେଲେ ଗରିବ ପରିବାରରେ ଜନ୍ମ ହୋଇଥିବାରୁ ଏହି ସ୍ବପ୍ନ ସ୍ବପ୍ନ ହୋଇ ରହିଗଲା। ଆର୍ଥିକ ଅବସ୍ଥା ସ୍ବଚ୍ଛଳ ନ ଥିବାରୁ ଅଧାରୁ ପାଠ ଛାଡ଼ିବାକୁ ପଡ଼ିଥିଲା ଗଞ୍ଜାମ ଜିଲା ହିଞ୍ଜିଳିକାଟୁ ଅନ୍ତର୍ଗତ କଣ୍ଟେଇକୋଳି ଗ୍ରାମର ଅରୁଣ ସାହୁଙ୍କୁ। ନିଜ ସ୍ବପ୍ନ ପୂରଣ ହୋଇପାରି ନ ଥିଲେ ମଧ୍ୟ ସେହିସବୁ ସ୍ଥାନର ପ୍ରତିକୃତିକୁ ନିର୍ମାଣ କରିବାକୁ ସେ ସ୍ଥିର କରିଥିଲେ। ବାପା ଜଣେ କାଠ କାରିଗର। ତେଣୁ ପିଲାବେଳୁ କାଠ କାମ ସହ ଜଡ଼ିତ ଥିଲେ ଅରୁଣ। ଫଳରେ ସେ କାଠକୁ ଖୋଦେଇ କରି ସୃଷ୍ଟି କରିଛନ୍ତି ବିସ୍ମୟ। ଆଜି ତାଙ୍କ ଦ୍ୱାରା ନିର୍ମିତ ତାଜମହଲ, ପ୍ରସିଦ୍ଧ ପିରାମିଡ୍, ଏଫିଲ୍ ଟାଓ୍ବାର ଦେଖଣାହାରିଙ୍କ ପାଇଁ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। ତାଙ୍କ ନିଖୁଣ କାରିଗରି ଓ ହାତର ଯାଦୁରେ ସ୍ବପ୍ନ ନେଇଛି ବାସ୍ତବ ରୂପ। ୟୁନିଟ୍-୩ ପ୍ରଦର୍ଶନୀ ପଡ଼ିଆରେ ଚାଲିଥିବା ରାଜ୍ୟସ୍ତରୀୟ ହସ୍ତଶିଳ୍ପ ପ୍ରଦର୍ଶନୀରେ ଅରୁଣଙ୍କ କାରିଗରି ଦେଖିବାକୁ ପ୍ରବଳ ଭିଡ଼ ଜମୁଛି।
ଅରୁଣଙ୍କ ବାପା କାଠରେ ବିଭିନ୍ନ ଘରୋଇ ଆସବାବପତ୍ର ପ୍ରସ୍ତୁତ କରୁଥିବାବେଳେ ଅରୁଣ କିନ୍ତୁ କିଛି ଭିନ୍ନ କରିବାକୁ ଚାହିଁଥିଲେ। ଅରୁଣଙ୍କ ଦ୍ୱାରା ନିର୍ମିତ ଓଡ଼ିଶା ବିଧାନସୌଧ, ଧଉଳି ଶାନ୍ତିସ୍ତୂପ, ଦିଲ୍ଲୀର ଇଣ୍ଡିଆ ଗେଟ୍, ବମ୍ବେର ଗେଟ୍ ଓ୍ବେ ଅଫ୍ ଇଣ୍ଡିଆ ଆଦିର ନିଖୁଣ କଳାକୃତିକୁ ଦେଖିଲେ ଏହା ପ୍ରତିକୃତି ନୁହେଁ ବରଂ ସତ ମନେହେଉଛି। ଆଗାମୀଦିନରେ କାଠରେ ସେ ଭାରତର ପାର୍ଲାମେଣ୍ଟ ହାଉସ୍ କରିବାକୁ ଲକ୍ଷ୍ୟ ରଖିଛନ୍ତି। ଖୁବ୍ଶୀଘ୍ର ଏହା ସମ୍ପୂର୍ଣ୍ଣ ହେବ ବୋଲି ଅରୁଣ କହିଛନ୍ତି।
ଅରୁଣଙ୍କୁ ନିଜ କାରିଗରିର ରହସ୍ୟ ସମ୍ପର୍କରେ ପଚାରିବାରେ ସେ କହିଥିଲେ, ଏହି ସବୁ ସ୍ଥାନ ବୁଲିବା ପିଲାବେଳୁ ମୋର ସ୍ବପ୍ନ ଥିଲା। ହେଲେ ଘରର ଆର୍ଥିକ ଅବସ୍ଥା ଭଲ ନ ଥିବାରୁ ଯୁକ୍ତ ୨ ପରେ ଆଉ ପାଠ ପଢିପାରି ନ ଥିଲି। ତେଣୁ ଏସବୁ ସ୍ଥାନ ବୁଲିବି ବୋଲି ଆଶା ଛାଡିଦେଲି। ହେଲେ ନିଜେ ଦେଖିବା ପାଇଁ କାଠରେ ସବୁର ମିନିଏଚର୍ କଲି। ସମସ୍ତେ ଭଲ କହିବାରୁ ଏବେ ନୂଆ ନୂଆ ଡିଜାଇନ୍ କରୁଛି। ବାଘ ନ ଦେଖିଲେ ବିଲେଇ ଦେଖ ଭଳି ଏହା ମୋ ସ୍ବପ୍ନକୁ ବାସ୍ତବ ରୂପ ଦେଇଛି। ଏବେ କାଠରେ ସମସ୍ତ ବିଶ୍ୱ ଐତିହ୍ୟସ୍ଥଳୀ ଏବଂ ସପ୍ତାଶ୍ଚର୍ଯ୍ୟର ପ୍ରତିକୃତି ନିର୍ମାଣ କରି ଭୁବନେଶ୍ୱରରେ ଏକ ମ୍ୟୁଜିୟମ୍ କରିବାକୁ ଭାବୁଛି। ଯଦି ସରକାରଙ୍କଠାରୁ ଆର୍ଥିକ ସହାୟତା ମିଳନ୍ତା, ତାହେଲେ ମ୍ୟୁଜିୟମ୍ ସ୍ବପ୍ନ ପୂରଣ ହୁଅନ୍ତା। ରାଜ୍ୟ ଏବଂ ଦେଶ ବାହାରୁ ଆସୁଥିବା ପର୍ଯ୍ୟଟକଙ୍କ ପାଇଁ ତାହା ଆକର୍ଷଣର କେନ୍ଦ୍ରବିନ୍ଦୁ ପାଲଟନ୍ତା।
ସସ୍ମିତା ପାଇକରାୟ
