ରସୁଲପୁର,୨୦।।୮(ଡିଏନଏ)- ରସୁଲପୁର ବ୍ଲକ ରାଜେନ୍ଦ୍ରପୁର ପଞ୍ଚାୟତ ହାଟସାହି ଗ୍ରାମରେ ବିଷାକ୍ତ ଛତୁ ଖାଇ ୩ ପରିବାରର ୧୪ରୁ ଊର୍ଦ୍ଧ୍ୱ ବ୍ୟକ୍ତି ଅସୁସ୍ଥ ହୋଇ ଧର୍ମଶାଳା ଓ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଥିବା ଜଣାପଡ଼ିଛି। ପ୍ରକାଶ ଯେ ଏହି ଗ୍ରାମର ସୁକୁଟା ଆରଣଙ୍କ ବାଡିରେ ପାଳଗଦା ଉପରେ ଛତୁ ଫୁଟିଥିଲା। ଉକ୍ତ ଛତୁକୁ ଆରଣ ପରିବାର ତୋଳି ଆଣିବା ସହ ପଡୋଶୀ ଭାଗବତ ପାତ୍ର ଓ ବିଦ୍ୟାଧର ମହାନ୍ତିଙ୍କ ଘରେ ଦେଇଥିଲେ। ୩ପରିବାର ଉକ୍ତ ଛତୁକୁ ରାନ୍ଧି ମଧ୍ୟାହ୍ନ ଭୋଜନରେ ଖାଇଥିଲେ। ଛତୁ ତରକାରୀ ଖାଇବା ପରେ ସମସ୍ତଙ୍କର ମୁଣ୍ଡ ବୁଲାଇ ବାନ୍ତି ହୋଇଥିଲା। ଫଳରେ ବିଦ୍ୟାଧର ମହାନ୍ତି(୫୫), ରମା ମହାନ୍ତି(୫୨), କଳ୍ପନା ରାଉତ(୨୮), ସ୍ମୃତିରେଖା ମହାନ୍ତି(୧୦) ପ୍ରମୁଖ ସଦସ୍ୟ ଅସୁସ୍ଥ ହୋଇ ଚିକିତ୍ସା ପାଇଁ ଧର୍ମଶାଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଯାଇଥିଲେ। ପ୍ରାଥମିକ ଚିକିତ୍ସା ପରେ ସ୍ବାସ୍ଥ୍ୟାବସ୍ଥାରେ ସାମାନ୍ୟ ଉନ୍ନତି ଘଟିବାରୁ ତାଙ୍କୁ ଘରକୁ ପଠାଇ ଦିଆଯାଇଛି। ସେହିପରି ସୁକୁଟା ଆରଣ(୭୨), ତଅପୋଇ(୬୫) ବାବୁଲା(୪୦), କନକ(୩୫), କୁନି ଭାରତୀ(୨୭), ସାନ୍ତନୁ(୧୧), ଭାଗବତ ପାତ୍ର(୮୫), ଚକ୍ରଧର(୪୦), ତିଳୋତମା(୩୬), ରଶ୍ମିକଳା(୧୭), ସୋମ୍ୟରଞ୍ଜନ(୧୫), ନୟନା ଲେଙ୍କା(୫୨), ଛବିଳା ଭଦ୍ର(୩୩) ସତ୍ୟଭାମା ପାତ୍ର(୩୦) ପ୍ରମୁଖ ଅସୁସ୍ଥ ହୋଇ ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ। ଛତୁ ଖାଇଥିବାରୁ ଏଭଳି ଘଟିଛି ବୋଲି ପରିବାର ଲୋକେ କହୁଥିବାବେଳେ ଖାଦ୍ୟରେ ବିଷକ୍ରୀୟା କାରଣରୁ ରୋଗୀମାନେ ଅସୁସ୍ଥ ହୋଇପଡିଥିଲେ ବୋଲି ଡାକ୍ତରଖାନା ସୂତ୍ରରୁ ଜଣାପଡିଛି।
