ନୂଆଦିଲ୍ଲୀ,୧୦-୧୧: ଗତ ବର୍ଷ ବିଶ୍ୱସ୍ତରରେ ବିଲିୟନେୟାରଙ୍କ ସମ୍ପତ୍ତିରେ ୩୮୮ ବିଲିୟନ ଡଲାର(ପ୍ରାୟ ୨୭ ଲକ୍ଷ କୋଟି ଟଙ୍କା) ହ୍ରାସ ଘଟିଛି। ଗତ ୧୫ ବର୍ଷ ମଧ୍ୟରେ ଏଭଳି ପ୍ରଥମଥର ଲାଗି ହୋଇଥିବା ୟୁବିଏସ୍ ଏବଂ ପିଡବ୍ଲ୍ୟୁସି ବିଲିୟନାରିଜ ରିପୋର୍ଟରୁ ଏହା ଜଣାପଡିଛି। ଏହି ସମୟରେ ବିଲିୟନେୟାରଙ୍କ ମୋଟ ସମ୍ପତ୍ତିରେ ୪.୫% କମିବା ଦ୍ୱାରା ୮.୫ ଟ୍ରିଲିୟନ ଡଲାରକୁ ଖସିଛି। ଗତ ପାଞ୍ଚ ବର୍ଷ ଧରି ଏମାନଙ୍କ ସମ୍ପତ୍ତିରେ ବୃଦ୍ଧି ହେଉଥିଲା ମାତ୍ର ଗତ ବର୍ଷ ଏଥିରେ ହ୍ରାସ ଘଟିଥିବା ୟୁବିଏସ୍ ଗ୍ଲୋବାଲ ଓ୍ବେଲ୍ଥ ମ୍ୟାନେଜମେଣ୍ଟର ଅଲ୍ଟା ହାଇନେଟ ଓର୍ଥ ବିଭାଗ ମୁଖ୍ୟ ଜୋଶେଫ ଷ୍ଟାଡଲର କହିଛନ୍ତି। ଡଲାର ଦୃଢ ହେବା ସାଙ୍ଗକୁ ପୁଞ୍ଜି ବଜାରରେ ଅନିଶ୍ଚିତତା ,ଭୌଗୋଳିକ କାରଣ ଏବଂ ବିଶ୍ୱସ୍ତରର ରାଜନୀତି ଯୋଗୁ ଅତିଧନିଙ୍କ ସମ୍ପତ୍ତିରେ ଏଭଳି ହ୍ରାସ ପରିଲକ୍ଷିତ ହୋଇଛି।
ଏହି ରିପୋର୍ଟ ମୁତାବକ, ଚାଇନା, ହଂକଂ ଏବଂ ଏସିଆ ପାସିଫିକ ରିଜିଅନରେ ଅତିଧନୀଙ୍କ ସମ୍ପତ୍ତି ଅତିମାତ୍ରାରେ ହ୍ରାସ ଘଟିଛି। ହଂକଂରେ ଏହା ୪% କମିଥିବା ଘଟିଥିବା ବେଳେ ୩୧୯.୮ ବିଲିୟନ ଡଲାରକୁ ଖସିଛି। ସେହିଭଳି ଚାଇନାରେ ଧନୀଙ୍କ ସମ୍ପତ୍ତିରେ ୧୨% ହ୍ରାସ ଘଟିଛି। ଶେୟାର ବଜାରରେ ହ୍ରାସ ଧାରା ଜାରି ଏବଂ ଜିଡିପି ଅଭିବୃଦ୍ଧି ହ୍ରାସ ହେବା ଭଳି କାରଣରୁ ସମ୍ପତ୍ତି କମିଥିବା ଜଣାପଡିଛି। ଏଭଳି ବିଭିନ୍ନ କାରଣରୁ ସେଠାକାର ବିଲିୟନେୟାର ତାଲିକାରୁ ୪୮ ଜଣ ବାଦ ପଡିଛନ୍ତି। ଏଭଳି ସ୍ଥିତି ପରେ ଚାଇନାରେ ପ୍ରତି କିଛି ସମୟ ବ୍ୟବଧାନରେ ନୂଆ ବିଲିୟାନେୟାର ସୃଷ୍ଟି ହେଉଛନ୍ତି। କେବଳ ଚାଇନା ନୁହେଁ ଭାରତ ସମେତ ଏସିଆ ପାସିଫିକ ଅଞ୍ଚଳରେ ଧନୀଙ୍କ ସମ୍ପତ୍ତିରେ ହ୍ରାସ ଧାରା ଦେଖାଯାଇଛି।
ଆମେରିକା-ଚାଇନା ବାଣିଜ୍ୟ ଯୁଦ୍ଧ ଯୋଗୁ ଏହାର ପ୍ରଭାବ ବିଶ୍ୱର ବିଭିନ୍ନ ବଜାର ଉପରେ ପଡିଛି। ଏଥି ଯୋଗୁ ବିଲିୟନେୟାରଙ୍କ ସମ୍ପତ୍ତି ମଧ୍ୟ କ୍ଷତିଗ୍ରସ୍ତ ହୋଇଥିବା ବଜାର ବିଶେଷଜ୍ଞ କହିଛନ୍ତି। ବାଣିଜ୍ୟ ଯୁଦ୍ଧ ଯୋଗୁ ନିବେଶକମାନେ ଶେୟାର ବଜାରରୁ ଦୂରେଇ ରହିଛନ୍ତି। ଆମେରିକାକୁ ବାଦଦେଲେ ବିଶ୍ୱ ସ୍ତରର ବିଲିୟନେୟାରଙ୍କ ସମ୍ପତ୍ତି ହ୍ରାସ ଘଟିଛି। ଟେକ୍ନେଲୋଜି ବ୍ୟବସାୟ ସହ ଜଡିତ ବ୍ୟକ୍ତି ବିଶେଷ ଅଧିକ ସଂଖ୍ୟକ ବିଲିୟନେୟାର ସୂଚୀରେ ନିଜ ନାମକୁ ଯୋଡୁଛନ୍ତି। ୨୦୧୮ ଶେଷ ପର୍ଯ୍ୟନ୍ତ ଆମେରିକାରେ ବିଲିୟନେୟାରଙ୍କ ସଂଖ୍ୟା ୭୪୯ ରହିଛି। ୨୦୧୪ରେ ବିଲିୟନେୟାରଙ୍କ ସଂଖ୍ୟା ୧୭୫୧ ରହିଥିବା ବେଳେ ଏହା ଏହା ୨୦୧୮ରେ ୨୨୦୧କୁ ବଢିଥିବା ରିପୋର୍ଟରେ ଉଲ୍ଲେଖ ରହିଛି।
