ନୟାଗଡ଼ ଅଫିସ,୯।୧୧: ନୟାଗଡ଼ ସହରରେ ଦୁଇଜଣ ବ୍ୟବସାୟୀ ନକଲି ଜର୍ଦ୍ଦା ବିକ୍ରି କରୁଥିବା ଅଭିଯୋଗରେ ଟାଉନ ପୋଲିସ ଗୁରୁବାର ସେମାନଙ୍କୁ ଗିରଫ କରିଥିଲା। ସେମାନେ ହେଲେ ପୁରୁଣା ସହର ଦଣ୍ଡାସାହିର ସନ୍ତୋଷ କୁମାର ସାହୁ ଓ ଦଶପଲ୍ଲା ଥାନା ବାଘୁଆଫାସି ଗ୍ରାମର ସର୍ବେଶ୍ୱର ପ୍ରଧାନ। ସେମାନଙ୍କୁ କୋର୍ଟଚାଲାଣ କରାଯାଇଥିବାବେଳେ ଜାମିନ ନାମଞ୍ଜୁର ହେବାରୁ ଶୁକ୍ରବାର ଜେଲ ହାଜତକୁ ପଠାଇ ଦିଆଯାଇଛି। ସେମାନେ କେଉଁଠାରୁ ନକଲି ଜର୍ଦ୍ଦା ଆଣିଲେ ସେ ନେଇ ପୋଲିସ ପଚାରିବାରୁ ଫତେଗଡ଼ ଅଞ୍ଚଳରୁ କିଛି ଲୋକ ଆଣି ନକଲି ଜର୍ଦା ଦୋକାନରେ ଦେଇ ଯାଉଥିବା କହିଥିବା ଥାନା ଅଧିକାରୀ ଜୟଦୀପ ମହାନ୍ତି ସୂଚନା ଦେଇଛନ୍ତି।
ବର୍ଷ ଧରି ସେମାନେ ନକଲି ଜର୍ଦ୍ଦା ବିକ୍ରି କରି ଆସୁଥିଲେ ବି ପୋଲିସ କିମ୍ବା ଯୋଗାଣ ବିଭାଗ କାହା ପାଖରେ ଖବର ନ ଥିଲା। ଦିଲ୍ଲୀସ୍ଥିତ ଗୋପାଳ ଜର୍ଦ୍ଦା କମ୍ପାନୀର ସାଧାରଣ ପରିଚାଳକ କୈଳାସ ସିଂ ଚୌହାନ ଏ ନେଇ ନୟାଗଡ଼ ଟାଉନ ଥାନାରେ ଅଭିଯୋଗ କରିବା ପରେ ପୋଲିସ ସେମାନଙ୍କ ଦୋକାନରେ ଚଢ଼ାଉ କରି ଗିରଫ କରିଥିଲା। ଅନ୍ୟପକ୍ଷେ ଖାଲି ଯେ ଜର୍ଦ୍ଦା ନକଲି କରାଯାଉଛି ତାହା ନୁହେଁ ଖାଇବା ତେଲଠାରୁ ଆରମ୍ଭ କରି ଚିନି, ଚାଉଳ, ଗୁଡ଼ ଆଦି ବିଭିନ୍ନ ଖାଦ୍ୟ ଦ୍ରବ୍ୟର ନକଲି କରାଯାଇ ଜିଲାରେ ଅଧିକାଂଶ ଦୋକାନରେ ବିକ୍ରି ହେଉଛି।
ସହର ଉପକଣ୍ଠର ଏକ ସ୍ଥାନରେ ନିମ୍ନମାନର ନକଲି ତେଲ ପ୍ରସ୍ତୁତ କରାଯାଉଥିବା ଜଣାପଡ଼ିଛି। ଏ ନେଇ ମଧ୍ୟ ବିଭିନ୍ନ ସ୍ଥାନରେ ଅଭିଯୋଗ ହେଉଥିଲେ ମଧ୍ୟ ତେଲ କାରଖାନା କର୍ତ୍ତୃପକ୍ଷ ପ୍ରଭାବଶାଳୀ ବ୍ୟକ୍ତି ହୋଇଥିବାରୁ ସେଠାରେ କୌଣସି ଚଢ଼ାଉ ହେଉ ନ ଥିବା ଘଟଣା ପୋଲିସ ଓ ଯୋଗାଣ ବିଭାଗର ପାରିଲାପଣିଆକୁ ପଦାରେ ପକାଉଛି। ଉକ୍ତ ତେଲକୁ ଖାଇ ଲୋକମାନେ ବିଭିନ୍ନ ରୋଗରେ ସମ୍ମୁଖୀନ ହେଉଥିବା ଦେଖିବାକୁ ମିଳିଛୁ। ନକଲି ଜର୍ଦ୍ଦା ପରେ ବିଭିନ୍ନ ଦୋକାନରେ ଥିବା ନକଲି ଖାଇବା ତେଲ ଉପରେ ଚଢ଼ାଉ କରିବା ପାଇଁ ଖାଉଟିମାନେ ଦାବି କରିଛନ୍ତି। ଅନ୍ୟପଟେ ଯୋଗାଣ ବିଭାଗର ଅଧିକାରୀମାନେ ସମୟେ ସମୟେ ବିଭିନ୍ନ ଦୋକାନରେ ଚଢାଉ କରିବା ବଦଳରେ କୁମ୍ଭକର୍ଣ୍ଣ ନିଦ୍ରାରେ ଶୋଇଥିବା ଅଭିଯୋଗ ହେଉଛି। ଗୁରୁବାର ଚଢ଼ାଉ କରାଯାଇ ନକଲି ଜର୍ଦ୍ଦା ଜବତ ଖବର ବ୍ୟାପିବା ପରେ ଅନେକ ଦୋକାନରେ ଥିବା ନକଲି ଜର୍ଦ୍ଦାକୁ ଲୁଚାଇ ରଖାଯାଉଥିବା ଆଲୋଚନା ହେଉଛି। ପ୍ରଶାସନ ଏଥିପ୍ରତି ଦୃଷ୍ଟି ଦେଇ ବିକ୍ରି ହେଉଥିବା ନକଲି ଦ୍ରବ୍ୟ ଉପରେ ଚଢ଼ାଉ କରାଯିବା ପାଇଁ ସାଧାରଣରେ ଦାବି ହେଉଛି।
