କୋଲକାତା,୨୪।୬: ଅଭିନେତ୍ରୀରୁ ଏମ୍ପି ହୋଇଥିବା ନୁସରତ ଜହାଁ କୋଲକାତାର ବ୍ୟବସାୟୀ ନିଖିଲ ଜୈନଙ୍କୁ ଜୁନ ୧୯ରେ ତୁର୍କୀର ବୋଡ୍ରମ ସହରରେ ବିବାହ କରିଛନ୍ତି। ବିବାହ ସମୟର କିଛି ଫଟୋ ନୁସରତ ନିଜ ଇନ୍ଷ୍ଟାଗ୍ରାମରେ ଶେୟାର କରିଥିଲେ। ସୋସିଆଲ ମିଡିଆରେ ଭାଇରାଲ ହୋଇଥିବା ଏହି ଫଟୋରେ କେତେକ ପ୍ରଶଂସକ ଶୁଭେଚ୍ଛା ଜଣାଇଥିବା ବେଳେ ଆଉ କେତେକ ତାଙ୍କୁ ସମାଲୋଚନା କରିଥିଲେ। ଲୋକ ସଭା ନିର୍ବାଚନ ପରେ ସଂସଦରେ ପ୍ରଥମ ଅଧିବେଶନ ଆରମ୍ଭ ହୋଇଯାଇଛି। ଏହି ପରିପ୍ରେକ୍ଷୀରେ ବିବାହ କାର୍ଯ୍ୟକ୍ରମରେ ବ୍ୟସ୍ତ ଥିବା ନୁସରତ ସଂସଦରେ ପହଞ୍ଚି ନ ଥିବା ବେଳେ ଏମ୍ପି ଭାବେ ଶପଥ ଗ୍ରହଣ ମଧ୍ୟ କରିନାହାନ୍ତି। ଫଳରେ ତାଙ୍କ ଫଟୋରେ ଜଣେ ୟୁଜର୍ସ କମେଣ୍ଟ ଦେଇ ଲେଖିଛନ୍ତି ଆପଣଙ୍କ ପାଖରେ ବିବାହ ଓ ରିସେପଶନ୍ ପାଇଁ ସମୟ ଅଛି କିନ୍ତୁ ଏମ୍ପି ଭାବେ ଶପଥ ଗ୍ରହଣ କରିବାକୁ ସମୟ ନାହିଁ। ଏଭଳି ସ୍ଥଳରେ ଆପଣ ନିଜର ନିର୍ବାଚନମଣ୍ଡଳୀର କିଭଳି ଦାୟିତ୍ୱ ତୁଲାଇବେ। ଏଥିସହ ଆଉ ଜଣେ ୟୁଜର୍ସ କମେଣ୍ଟ କରିଛନ୍ତି ଯଦି ଆପଣ ଆଗରୁ ସଂସଦ ଅଧିବେଶନ ବିଷୟରେ ଜାଣିଥିଲେ ତାହେଲେ ବିବାହ ତାରିଖକୁ ଆଗକୁ ଘୁଞ୍ଚାଇଦେଲେନି କାହିଁକି। ସୂଚନାଯୋଗ୍ୟ, ନୁସରତ ଓ ନିଖିଲଙ୍କ ରିସେପଶନ୍ ଜୁଲାଇ ୫ରେ ଆୟୋଜନ କରାଯାଇଛି। ଏଥିରେ ଟଲିଉଡ୍ ଜଗତରୁ ଆରମ୍ଭ କରି ରାଜନୈତିକ ବ୍ୟକ୍ତି ମଧ୍ୟ ସାମିଲ ହେବେ ବୋଲି ଚର୍ଚ୍ଚା ହେଉଛି।
