ବନ୍ତଳା, ୭ା୭(ଡି.ଏନ.ଏ.) – ଅନୁଗୋଳ ଜିଲା ବନ୍ତଳା ମହାବିଦ୍ୟାଳୟ ସମ୍ମୁଖରେ ଥିବା ଏକ ବିଦ୍ୟୁତ୍ ଖୁଣ୍ଟ ଦୀର୍ଘ ୧୫ ଦିନ ହେଲାଣି ବିପଦସଙ୍କୁଳ ଅବସ୍ଥାରେ ରହିଛି। କାଳବୈଶାଖୀରେ ଏହି ଖୁଣ୍ଟ ମୂଳରୁ ଅଧା ଭାଙ୍ଗି ଯାଇଥିଲେ ଏହାକୁ ସେଠାରୁ ହଟାଯାଉନାହିଁ। ଗୋଟିଏ ପଟକୁ ନଇଁ ପଡିଥିବା ଖୁଣ୍ଟଟି ଯେ କୌଣସି ମୁହୂର୍ତ୍ତରେ ସମ୍ପୂର୍ଣ୍ଣ ଭାଙ୍ଗି ପଡିବା ଆଶଙ୍କାରେ ରହିଛନ୍ତି କଲେଜ ଛାତ୍ରୀଛାତ୍ର। ଏ ନେଇ ସେସୁ, ଏନ୍ଜେନ ନିକଟରେ ଅଭିଯୋଗ ସତ୍ତ୍ୱେ ଏହାକୁ ଅଣଦେଖା କରାଯାଉଥିବା ଅଭିଯୋଗ ହୋଇଛି।
ଅଭିଯୋଗ ମୁତାବକ, ମହାବିଦ୍ୟାଳୟର ଛାତ୍ରୀଛାତ୍ରଙ୍କ ସମେତ ଦୈନିକ ହଜାର ହଜାର ଲୋକେ କଲେଜ ଦେଇ ଯାଇଥିବା ପୂର୍ତ୍ତ ବିଭାଗ ରାସ୍ତାରେ ଯାତାୟାତ କରୁଛନ୍ତି। ହେଲେ ପ୍ରାୟ ୧୫ ଦିନ ହେବ ବିପଦସଙ୍କୁଳ ଅବସ୍ଥାରେ ଥିବା ଖୁଣ୍ଟକୁ ସେଠାରୁ ହଟାଯାଉନାହିଁ। ଫଳରେ କୌଣସି ସମୟରେ ଖୁଣ୍ଟ ପଡି କ୍ଷୟକ୍ଷତି ହେବାର ଆଶଙ୍କା ଥିଲେ ହେଁ ବିଦ୍ୟୁତ କର୍ତ୍ତୃପକ୍ଷ ଚୁପ ହୋଇ ବସି ରହିଛନ୍ତି। ଏ ନେଇ ସେସୁ ଓ ଏନ୍ଜେନର କନିଷ୍ଠ ଯନ୍ତ୍ରୀଙ୍କ ସମେତ ଏନଜେନ ଅନୁଗୋଳ ଜିଲାର ମୁଖ୍ୟଙ୍କୁ ଅବଗତ କରାଯିବା ସତ୍ତ୍ୱେ କୌଣସି ପଦକ୍ଷେପ ନିଆଯାଉନାହିଁ। ତୁରନ୍ତ ଏହାକୁ ସେଠାରୁ ହଟାଯାଇ ନୂତନ ଖୁଣ୍ଟ ପୋତାଯିବାକୁ ଦାବି ହୋଇଛି।
କେବଳ କଲେଜ ନିକଟରେ ନୁହେଁ, ଅନେକ ସ୍ଥାନରେ ବିଦ୍ୟୁତ୍ ଖୁଣ୍ଟଗୁଡିକ ବିପଦ ସଙ୍କୁଳରେ ଥିବା, ପୁରୁଣା ତାରରେ ବିଦ୍ୟୁତ ସଂଯୋଗ, ଅଘୋଷିତ ବିଦ୍ୟୁତ୍ କାଟ କରାଯାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। କେବଳ ବିଲ୍ ଆଦାୟକୁ ଗୁରୁତ୍ୱ ନ ଦେଇ ଉପଭୋକ୍ତାଙ୍କୁ ଠିକ୍ ଭାବେ ସେବା ପ୍ରଦାନ କରାଯିବାକୁ ଦାବି ହୋଇଛି। ଏ ସମ୍ପର୍କରେ ସେସୁ ବିଭାଗର ବନ୍ତଳା ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ନିର୍ମଳ କୁମାର ମହନ୍ତ କୁହନ୍ତି, ବାରମ୍ବାର ଶରଧାପୁରଠାରେ ୩୩ କେଭି ତାରରେ ଜାଣିଶୁଣି ଦୁର୍ବୃତ୍ତମାନେ ଚେନ ପକାଇ ଅସୁବିଧା କରୁଥିଲେ ହେଁ ଅନୁଗୋଳ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଉନାହିଁ। ଏଲ୍ଟି ଲାଇନ, ବିଦ୍ୟୁତ୍ ଖୁଣ୍ଟ ବାବଦରେ ଏନ୍ଜେନ ଦାୟିତ୍ୱ ନେଇଛି। ଏ ବିଷୟରେ ଏନଜେନ ଜିଲା ମୁଖ୍ୟ ଚିତ୍ତରଞ୍ଜନ ରାଉତ କୁହନ୍ତି, କଲେଜ ନିକଟରେ ଖୁଣ୍ଟ ଭାଙ୍ଗିଥିବା ନେଇ ଅଭିଯୋଗ ଆସିଛି। ସେଠାରେ ତୁରନ୍ତ ବିଦ୍ୟୁତ ଖୁଣ୍ଟ ପୋତାଯିବ। ଏ ନେଇ ସ୍ଥାନୀୟ ଜେଇଙ୍କୁ ଦାୟିତ୍ୱ ଦିଆଯାଇଛି ବୋଲି ସେ କହିଛନ୍ତି।
