ଗଞ୍ଜାମ,୪।୪(ଅନାଥ ତରାଇ): ଗଞ୍ଜାମ ବ୍ଲକ ଅନ୍ତର୍ଗତ ପାଳିବନ୍ଧ ପଞ୍ଚାୟତର ସୂର୍ଯ୍ୟନାରାୟଣପୁର ଓଡ଼ିଆର୍ପି କଲୋନୀରେ ବିପଦପୂର୍ଣ୍ଣ ଅବସ୍ଥାରେ ରହିଛି ଟ୍ରାନ୍ସଫର୍ମର। ଇଲେକ୍ଟ୍ରି ଟ୍ରାନ୍ସଫର୍ମର ସ୍ଥାନୀୟ ବାସିନ୍ଦା ସୁଦର୍ଶନ ପ୍ରଧାନଙ୍କ ଘରଠାରୁ ମାତ୍ର କିଛି ମିଟର ଦୂରରେ ଅସୁରକ୍ଷିତ ଭାବେ ରହିଛି। ଟ୍ରାନ୍ସଫର୍ମରଟି ଘରର ଅତି ନିକଟରେ ଥିବାରୁ ସୁଦର୍ଶନ ନିଜ ଘର ମରାମତି କାମ କରିବା ପାଇଁ ନାନା ହଇରାଣ ହେଉଥିବାବେଳେ ସବୁବେଳେ ଏକ ଅଜଣା ଭୟ ମଧ୍ୟରେ ଗତି କରୁଛନ୍ତି। ସାମାନ୍ୟ ଅସାବଧାନତା ବଡ଼ଧରଣର ଅଘଟଣ ଘଟାଇବାର ଆଶଙ୍କା ରହିଛି। ଏହି ସମସ୍ୟା ନେଇ ସ୍ଥାନୀୟ ବିଦ୍ୟୁତ୍ ବିଭାଗର କନିଷ୍ଠ ଯନ୍ତ୍ରୀଙ୍କୁ ବାରମ୍ବାର ଅନୁରୋଧ କରାଯାଇଥିଲେ ମଧ୍ୟ ସେ ଏଥିପ୍ରତି କୌଣସି କର୍ଣ୍ଣପାତ କରୁନାହାନ୍ତି। ଆମ କଥା କେହି ଶୁଣୁନାହାନ୍ତି ବୋଲି ଅସହାୟ ସୁଦର୍ଶନ କ୍ଷୋଭର ସହ କହିଛନ୍ତି। ସୁରକ୍ଷା ଦୃଷ୍ଟିରୁ ଟ୍ରାନ୍ସଫର୍ମର ଚାରିପଟେ ତୁରନ୍ତ ଏକ ଗାର୍ଡ ୱାଲ ନିର୍ମାଣ କରିବା ସହ ଏହାକୁ ସୁରକ୍ଷିତ କରିବାକୁ ସେ ସ୍ଥାନୀୟ ପ୍ରଶାସନ ନିକଟରେ ନିବେଦନ କରିଛନ୍ତି। ଯଥାଶୀଘ୍ର ପଦକ୍ଷେପ ନିଆଗଲେ ସେ ନିଜ ଘର କାମ ସମ୍ପୂର୍ଣ୍ଣ କରିବା ସହ ପରିବାର ସହ ସୁରକ୍ଷିତ ଭାବେ ରହିପାରନ୍ତେ ବୋଲି କହିଛନ୍ତି। ଏ ନେଇ ସ୍ଥାନୀୟ କନିଷ୍ଠ ଯନ୍ତ୍ରୀଙ୍କୁ ଟେଲିଫୋନ ଯୋଗେ ଯୋଗାଯୋଗ କରିଥିଲେ ବି ସେ ଫୋନ ଉଠାଇନଥିଲେ । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି।
