ଜୟପୁର, ୧୬।୧୦ (ପି.ଟି.): ବିସିସିଆଇ ଆନୁକୂଲ୍ୟରେ ଚାଲିଥିବା ଚଳିତ ବିଜୟ ହଜାରେ ଟ୍ରଫିରେ ତାମିଲନାଡ଼ୁ ଦଳ କ୍ରମାଗତ ୯ମ ବିଜୟ ଲାଭ କରିଛି। ବୁଧବାର ଏଠାରେ ଖେଳାଯାଇଥିବା ଗ୍ରୁପ୍-ସି’ର ଏକ ମ୍ୟାଚ୍ରେ ତାମିଲନାଡ଼ୁ ୭୮ ରନରେ ଗୁଜରାଟକୁ ପରସ୍ତ କରିଛି। ଏଥିସହ ଏହି ଗ୍ରୁପ୍ରେ ତାମିଲନାଡ଼ୁ ରେକର୍ଡ ସମସ୍ତ ୯ ମ୍ୟାଚ୍ ଜିତି ୩୬ ପଏଣ୍ଟ ସହ ଶୀର୍ଷ ସ୍ଥାନରେ ରହି ନକ୍ଆଉଟ୍କୁ ପ୍ରବେଶ କରିଛି। ପରାଜୟ ସତ୍ତ୍ୱେ ଗୁଜରାଟ ୩୨ ପଏଣ୍ଟ ସହ ୨ୟ ଦଳ ଭାବେ ଏହି ଗ୍ରୁପ୍ର ନକ୍ଆଉଟ୍ରେ ସ୍ଥାନ ପକ୍କା କରିଛି। ଆସନ୍ତା ୨୦ରୁ ବେଙ୍ଗାଲୁରୁରେ ନକ୍ଆଉଟ୍ ପର୍ଯ୍ୟାୟ ଆରମ୍ଭ ହେବ।
ମ୍ୟାଚ୍ରେ ଟସ୍ ହାରି ବ୍ୟାଟିଂ ଆମନ୍ତ୍ରଣ ପାଇଥିବା ତାମିଲନାଡ଼ୁ ଓପନର୍ ଅଭିନବ ମୁକୁନ୍ଦ (୭୯), ମୁରଲୀ ବିଜୟ (୯୪) ଓ ଓ୍ବାଶିଂଟନ ସୁନ୍ଦର (୪୨)ଙ୍କ ଉପଯୋଗୀ ଇନିଂସ ବଳରେ ୫୦ ଓଭରରେ ୯ ଉଇକେଟ୍ ହରାଇ ୨୭୪ ରନ କରିଥିଲା। ଗୁଜରାଟ ପକ୍ଷରୁ ରସ୍ କଲାରିଆ ଓ ଅର୍ଜନା ନାଗଓ୍ବାସଓ୍ବାଲା ୩ଟି ଲେଖାଏ ଓ ପିୟୂଷ ଚାଓ୍ବାଲ ୨ଟି ଉଇକେଟ୍ ନେଇଥିଲେ। ଜବାବରେ ଗୁଜରାଟ ୪୨.୨ ଓଭରରେ ୧୯୬ ରନ କରି ଅଲ୍ଆଉଟ୍ ହୋଇଯାଇଥିଲା। ଅକ୍ଷର ପଟେଲ ୫୫, ଭାର୍ଗବ ମେରାଇ ୪୪ ରନ କରିଥିବାବେଳେ ଅଧିନାୟକ ପାର୍ଥିବ ପଟେଲ (୬) ନିରାଶ କରିଥିଲେ। ଏମ୍. ମହମ୍ମଦ ୩ ଓ ମୁରୁଗାନ ଅଶ୍ୱିନ ୨ଟି ଉଇକେଟ୍ ହାସଲ କରିଥିଲେ।
