ନୂଆଦିଲ୍ଲୀ,୨୨-୨: ଚଳିତ ଆର୍ଥତ୍କ ବର୍ଷରେ ଦେଶର ଜିଡିପି ବିକାଶ ହାର ୪.୯% ରହିବା ନେଇ ଅନୁମାନ କରାଯାଇଛି। ବିକାଶ ହାର ଚଳିତ ଆର୍ଥତ୍କ ବର୍ଷ ୫% ରହିବ ବୋଲି ଜାତୀୟ ପରିସଂଖ୍ୟାନ କାର୍ଯ୍ୟାଳୟ (ଏନ୍ଏସ୍ଓ) ପୂର୍ବରୁ କହିଛି। ଏହି ଆକଳନ ତୁଳନାରେ ଜିଡିପି ୪.୯%କୁ ଖସିବ ବୋଲି ନ୍ୟାଶନାଲ କାଉନସିଲ ଅଫ୍ ଆପ୍ଲାଏଡ ଇକୋନୋମିକ୍ସ ରିସର୍ଚ୍ଚ (ଏନ୍ସିଏଇଆର୍) ପକ୍ଷରୁ ଶୁକ୍ରବାର ଆକଳନ କରାଯାଇଛି। ଏହାର ପରବର୍ତ୍ତୀ ଆର୍ଥତ୍କ ବର୍ଷଗୁଡିକରେ ବିକାଶ ହାରରେ ଉନ୍ନତି ଆସିବା ନେଇ ଏହି ଏଜେନ୍ସି ଆଶାବାଦୀ ରହିଛି। ୨୦୨୦-୨୧ ଆର୍ଥତ୍କ ବର୍ଷରେ ଦେଶର ଅର୍ଥ ବ୍ୟବସ୍ଥାରେ ସୁଧାର ଆସିବା ସହ ଜିଡିପି ୫.୬% ଛୁଇଁବା ନେଇ ଏନ୍ସିଇଏଆର ଆଶାବାଦୀ ରହିଛି। ୨୦୧୮-୧୯ରେ ଭାରତର ଜିଡିପି ଅଭିବୃଦ୍ଧି ୬.୧% ରହିଥିଲା। ୨୦୧୯-୨୦ ତୃତୀୟ ତ୍ରୈମାସ ଲାଗି ବିକାଶ ଅନୁମାନ ୪.୯%, ଚତୁର୍ଥ ତ୍ରୈମାସ ଲାଗି ଅନୁମାନ ୫.୧% ଏବଂ ୨୦୧୯-୨୦ ଏବଂ ୨୦୨୦-୨୧ ଲାଗି ବାର୍ଷିକ ବିକାଶ ହାର ଅନୁମାନ ଯଥାକ୍ରମେ ୪.୯% ଏବଂ ୫.୬% ରହିବ ବୋଲି ଏହା ଏକ ବିବୃତ୍ତିରେ ପ୍ରକାଶ କରିଛି।
ବିକାଶ ହାର ୫% ରହିବା ନେଇ ଉଭୟ ରିଜର୍ଭ ବ୍ୟାଙ୍କ ଓ ଏନ୍ଏସ୍ଓ କହିଛନ୍ତି। ଚଳିତ ଆର୍ଥତ୍କ ବର୍ଷରେ ଅର୍ଥ ବ୍ୟବସ୍ଥାରେ କିଛି ସୁଧାର ଆସିବା ନେଇ ଏନସିଏଇଆର୍ ଆଶା ରଖିଛି। ମୌସୁମୀରେ ଉନ୍ନତ ବର୍ଷା, ମୌସୁମୀ ପରବର୍ତ୍ତୀ ସ୍ଥିତିରେ ଉନ୍ନତି, ଦେଶର ପ୍ରମୁଖ ଜଳ ଭଣ୍ଡାରଗୁଡିକରେ ଜଳ ସଂରକ୍ଷଣ ସ୍ଥିତିରେ ସୁଧାର ଯୋଗୁ କୃଷି କ୍ଷେତ୍ରର ଅଭିବୃଦ୍ଧି ଆଶା ଉଜ୍ଜ୍ୱଳ ରହିଛି। ଗତବର୍ଷ ତୁଳନାରେ ଚଳିତ ବର୍ଷ କୃଷି କ୍ଷେତ୍ର ଉତ୍ପାଦନ ଯଥେଷ୍ଟ ଭଲ ରହିବ ବୋଲି ବୋଲି କୃଷି ମନ୍ତ୍ରଣାଳୟ ଏବଂ ଏନ୍ସିଏଇଆର୍ ପୂର୍ବାନୁମାନରେ ମତ ପ୍ରକାଶ କରିଛନ୍ତି। ପନିପରିବା ଏବଂ ଖାଦ୍ୟ ସାମଗ୍ରୀ ଉତ୍ପାଦନ ବାଧାପ୍ରାପ୍ତ ହେବା ଯୋଗୁ ଏହାର ଦର ବଢିଛି। ଏଥିଯୋଗୁ ମୁଦ୍ରାସ୍ଫୀତି ମଧ୍ୟ ରିଜର୍ଭ ବ୍ୟାଙ୍କର ଧାର୍ଯ୍ୟ ଲକ୍ଷ୍ୟଠାରୁ ଢେର ଉଚ୍ଚରେ ରହିଛି। ଖାଦ୍ୟ ଶସ୍ୟ ଉତ୍ପାଦନ ଉନ୍ନତ ହେଲେ ଆଗାମୀ ମାସଗୁଡିକରେ ଦରଦାମ ହ୍ରାସ ହେବା ନେଇ ପୂର୍ବାନୁମାନ କରାଯାଇଛି।
ଚଳିତ ଆର୍ଥତ୍କ ବର୍ଷ ଦ୍ୱିତୀୟ ତ୍ରୈମାସରେ ଔଦ୍ୟୋଗିକ ଉତ୍ପାଦନ ସୂଚୀ (ଆଇଆଇପି) ୦.୪% ହ୍ରାସ ଘଟିଥିବା ବେଳେ ତୃତୀୟ ତ୍ରୈମାସରେ ୦.୯% ହ୍ରାସ ଘଟିଛି। ଏହି ସମୟରେ କ୍ୟାପିଟାଲ ଗୁଡ୍ସ ଏବଂ କଞ୍ଜ୍ୟୁମର ଡ୍ୟୁରେବଲ୍ସ ଆଇଆଇପି ଖସିଛି। ସେହିଭଳି ସେବା କ୍ଷେତ୍ର କାର୍ଯ୍ୟକଳାପ ଏବଂ କାର୍ଗୋ ଟ୍ରାଫିକରେ ଉନ୍ନତି ଆସୁଥିବା କୁହାଯାଇଛି। ମନ୍ଥର ଅଭିବୃଦ୍ଧିକୁ ଗତିଶୀଳ କରାଇବା ଲାଗି ସରକାର ବଜେଟରେ ବ୍ୟବସ୍ଥା କରିଥିବା କହିଛନ୍ତି। ଏହାବାଦ ରାଜସ୍ବ ନେଇ ହୋଇଥିବା ଲକ୍ଷ୍ୟ ଧାର୍ଯ୍ୟ ଆଶାତୀତ ବୋଲି ବଜାର ବିଶେଷଜ୍ଞ କହିଛନ୍ତି। ମାତ୍ର ପୂର୍ବ ଆର୍ଥତ୍କ ବର୍ଷ ତୁଳନାରେ ଏହା ଅଧିକ ବାସ୍ତବ ବୋଲି ବିଚାର କରାଯାଉଛି।
