ନୂଆଦିଲ୍ଲୀ,୧୧-୧୦: ଭାରତ ସଞ୍ଚାର ନିଗମ ଲିମିଟେଡ(ବିଏସ୍ଏନ୍ଏଲ୍) ଏବଂ ମହାନଗର ଟେଲିକମ୍ ନିଗମ(ଏମ୍ଟିଏନ୍ଏଲ୍)ର କର୍ମଚାରୀ ସଂଘ ପକ୍ଷରୁ ଦିପାବଳୀ ପରେ ଦେଶବ୍ୟାପି ଧର୍ମଘଟ ନେଇ ଚେତାବନୀ ଦିଆଯାଇଛି। କର୍ମଚାରୀଙ୍କୁ ଅଗଷ୍ଟ ଏବଂ ସେପ୍ଟେମ୍ବର ମାସ ଦରମା ମିଳି ନ ଥିବାରୁ ସେମାନେ ଅସନ୍ତୋଷ ପ୍ରକାଶ କରିଛନ୍ତି। ବେତନ ଶୀଘ୍ର ନ ମିଳିଲେ କର୍ମଚାରୀମାନେ ଧର୍ମଘଟକୁ ଓହ୍ଲାଇବେ ବୋଲି ସଂଘ ପକ୍ଷରୁ ଗଣମାଧ୍ୟମକୁ ସୂଚନା ରହିଛି। ଦାବି ଉପରେ ଶୀଘ୍ର ବିଚାର କରାନ ଗଲେ ସଂଘ ହାତବାନ୍ଧି ବସିବ ନାହିଁ। ପ୍ରଧାମମନ୍ତ୍ରୀଙ୍କ କାର୍ଯ୍ୟାଳୟ ସାମ୍ନାରେ ମଧ୍ୟ ଧର୍ମଘଟ କରାଯିବ ବୋଲି ଏମ୍ଟିଏନ୍ଏଲ୍ ଫୋରମ ଆଣ୍ଡ ଆସୋସିଏଶନ ଆବାହକ ଧରମ ରାଜ ସିଂ କହିଛନ୍ତି। କମ୍ପାନୀର ପୁନରୁଦ୍ଧାର ନେଇ ସରକାର ରଖିଥିବା ଯୋଜନା ସମ୍ପର୍କରେ ସଂଘ ବୁଝିବାକୁ ଚାହୁଁଛି ବୋଲି ବିଏସ୍ଏନ୍ଏଲ୍ ସଂଘର ନେତା କେ. ସେବାଷ୍ଟିଆନ କହିଛନ୍ତି। ଧର୍ମଘଟରେ ସଂଘ ସାମିଲ ହେବ ବୋଲି ସେ ସ୍ପଷ୍ଟ କରିଛନ୍ତି।
ବିଏସ୍ଏନ୍ଏଲ୍ର ପୁନରୁଦ୍ଧାର ନେଇ ଟେଲିକମ୍ ମନ୍ତ୍ରଣାଳୟ ଏକ ଯୋଜନା ରଖିଥିବା ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି। ଏସଂକ୍ରାନ୍ତରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସହ ଆଲୋଚନା କରାଯାଇଛି। ଏକ ରିପୋର୍ଟ ମୁତାବକ ମୁମ୍ବାଇ ଏବଂ ନୂଆଦିଲ୍ଲୀରେ କର୍ମଚାରୀ ମାନେ ଚଳିତ ମାସ ୧୬ ମଧ୍ୟାହ୍ନରେ ହରତାଳ କରିବେ। ପେମେଣ୍ଟ ପ୍ରସଙ୍ଗ ବାଦ ଅବସର ବୟସ ୬୦ ବର୍ଷକୁ ବୃଦ୍ଧି ଏବଂ ୨ ରାଷ୍ଟ୍ରାୟତ୍ତ ଟେଲିକମ୍ କମ୍ପାନୀ ମିଶ୍ରଣକୁ ବିରୋଧ କରୁଛନ୍ତି।
ବିଏସ୍ଏନ୍ଏଲ୍ ବନ୍ଦ ହେବା ଖବର ଖୁଜବ
ବିଏସ୍ଏନ୍ଏଲ୍ ବନ୍ଦ ହେବା ନେଇ ଏକ ଖବର ପ୍ରେସ ମିଡିଆ ଏବଂ ସୋସିଆଲ ମିଡିଆରେ ପ୍ରକାଶ ପାଇଛି। ଏହାକୁ ନେଇ ବିଏସ୍ଏନ୍ଏଲ୍ ଓଡ଼ିଶା ଶାଖା ମୁଖ୍ୟ ମହାପ୍ରବନ୍ଧକ ଉଦୟ ଶଙ୍କର ପଣ୍ଡା ପ୍ରତିକ୍ରିୟା ରଖିଛନ୍ତି। ଏହି ଖବର ସମ୍ପୂର୍ଣ୍ଣ ମିଥ୍ୟା ଏବଂ ନିରାଧାର ବୋଲି ସେ କହିଛନ୍ତି। ସରକାର ଏଭଳି କିଛି ଆଭିମୂଖ୍ୟ କିମ୍ବା ପ୍ରସ୍ତାବ ରଖି ନାହାନ୍ତି ବୋଲି ସେ ସ୍ପଷ୍ଟ କରିଛନ୍ତି। କେତେକ ନ୍ୟସ୍ତ ସ୍ବାର୍ଥ ବ୍ୟକ୍ତି ବିଏସ୍ଏନ୍ଏଲ୍ ବିରୋଧରେ ଅପପ୍ରଚାର କରି କମ୍ପାନୀର ଗ୍ରାହକଙ୍କୁ ହାତେଇବାକୁ ଷଡଯନ୍ତ୍ର କରିଥିବା ସେ ପ୍ରକାଶ କରିଛନ୍ତି। ଏଭଳି ପ୍ରସଙ୍ଗ ପ୍ରତି ଧ୍ୟାନ ନ ଦେବାକୁ କମ୍ପାନୀ ପକ୍ଷରୁ କୁହାଯାଇଛି। କମ୍ପାନୀ ଏହାର ଗ୍ରାହକଙ୍କୁ ସୁଲଭ ଦରରେ ସେବା ଯୋଗାଣ ନେଇ ପ୍ରତିଶ୍ରୁତିବଦ୍ଧ ବୋଲି ପଣ୍ଡା କହିଛନ୍ତି।
