ନୂଆଦିଲ୍ଲୀ,୨୪।୧: ସାଧାରଣତନ୍ତ୍ର ଦିବସ ଅବ୍ୟବହିତ ପୂର୍ବରୁ ରାଷ୍ଟ୍ରପତି ଭବନରେ ଆୟୋଜିତ ଏକ ସ୍ବତନ୍ତ୍ର ଉତ୍ସବରେ ରାଷ୍ଟ୍ରପତି ରାମନାଥ କୋବିନ୍ଦ ୪୯ଜଣଙ୍କୁ ‘ପ୍ରଧାନମନ୍ତ୍ରୀ ରାଷ୍ଟ୍ରୀୟ ବାଲ୍ ପୁରସ୍କାର’ ପ୍ରଦାନ କରିଛନ୍ତି। ଚଳିତବର୍ଷ ପୁରସ୍କାର ବିଜେତାଙ୍କୁ ଶୁକ୍ରବାର ଭେଟିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହି ଅବସରରେ ସେ କହିଛନ୍ତି, ଆଜିକାଲି ପିଲାମାନଙ୍କ ସମାଜ ଏବଂ ରାଷ୍ଟ୍ର ପ୍ରତି ସଚେତନ ଭାବ ଦେଖି ନିଜକୁ ଗର୍ବିତ ମନେ କରୁଛି। ଏତେ କମ ବୟସରେ ବିଭିନ୍ନ କ୍ଷେତ୍ରରେ ତୁମେମାନେ ଯେଉଁଭଳି ନିଜର ପ୍ରତିଭା ଦେଖାଇଛ, ତାହା ମୋତେ ଆଶ୍ଚର୍ଯ୍ୟ କରିଛି। ତୁମମାନଙ୍କଠାରୁ ଅନେକ କିଛି ପ୍ରେରଣା ମିଳିଛି ବୋଲି ପୁରସ୍କୃତ ପିଲାମାନଙ୍କୁ ମୋଦି କହିଥିଲେ। ସୂଚନାଯୋଗ୍ୟ, ସମାଜସେବା, କଳା, ସଂସ୍କୃତି ଓ କ୍ରୀଡ଼ା କ୍ଷେତ୍ରରେ ଉତ୍କର୍ଷ ଓ ଉଲ୍ଲେଖନୀୟ କୃତିତ୍ୱ ପାଇଁ ଛାତ୍ରୀଛାତ୍ରଙ୍କୁ ‘ପ୍ରଧାନମନ୍ତ୍ରୀ ରାଷ୍ଟ୍ରୀୟ ବାଲ୍ ପୁରସ୍କାର’ ଦିଆଯାଇଥାଏ।
