ଭୁବନେଶ୍ୱର, ୭ା୯(ବ୍ୟୁରୋ): ଇଣ୍ଡୋନେସିଆ ବାଲିର ପୂର୍ବତନ ଗଭର୍ନର ଆଇ ମେଡ୍ ମଙ୍ଗ୍କୁ ୧୦ଜଣିଆ ପ୍ରତିନିଧି ଦଳ ସହ ଶୁକ୍ରବାର ଓଡ଼ିଶା ଗସ୍ତରେ ଆସିଛନ୍ତି। ଏହି ଅବସରରେ ଆର୍ଯ୍ୟଭଟ୍ଟ ଟ୍ରଷ୍ଟ ଓ କଳିଙ୍ଗ ଇଣ୍ଟରନ୍ୟାଶନାଲ ୟୁଥ ଫାଉଣ୍ଡେଶନ ମିଳିତ ଆନୁକୂଲ୍ୟରେ ସାଂସ୍କୃତିକ କାର୍ଯ୍ୟକ୍ରମ ‘କଳିଙ୍ଗ-ବାଲି ସଙ୍ଗମ’ ଆୟୋଜିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବେ ରାଜ୍ୟପାଳ ପ୍ରଫେସର ଗଣେଶୀ ଲାଲ ଯୋଗଦେଇଥିଲେ। ଏହି କାର୍ଯ୍ୟକ୍ରମରେ ବିଭିନ୍ନ ପ୍ରତିଭାଧାରୀଙ୍କୁ ‘କଳିଙ୍ଗ-ବାଲି ସଙ୍ଗମ’ ସମ୍ମାନରେ ସମ୍ମାନିତ କରାଯାଇଛି। ସେମାନେ ହେଲେ ସ୍ବସ୍ତି ଗ୍ରୁପର ଚେୟାରମ୍ୟାନ ଜିତେନ୍ଦ୍ର କୁମାର ମହାନ୍ତି, ଗଞ୍ଜାମ ଆର୍ଟିଓ ସଞ୍ଜୟ କୁମାର ବିଶ୍ୱାଳ, ବାଲିର ଆଶ୍ରମ ଗାନ୍ଧିପୁରୀ ଚେୟାରମ୍ୟାନ ଅଗସ, ପ୍ଲାଷ୍ଟିକ ସର୍ଜନ ଡ. ଅକ୍ଷୟ ରାଉତ, ସୋ ଆମ ଆଇ ଫାଉଣ୍ଡେଶନ ଟ୍ରଷ୍ଟି ଅରବିନ୍ଦ ଅଗ୍ରଓ୍ବାଲ, ସାମାଜିକ କର୍ମୀ ଦିଲୀପ କୁମାର ନାୟକ, ଅଙ୍କୋଲୋଜି ଏମ୍ଡି ଡାକ୍ତର ସଞ୍ଜୀବ କୁମାର ମିଶ୍ର। ଏହି ଅବସରରେ ଶାସ୍ତ୍ରୀୟ, ଓଡ଼ିଶୀ ନୃତ୍ୟ ପରିବେଷଣ ସହ ନିଫ୍ଟ ଛାତ୍ରୀଙ୍କ ଦ୍ୱାରା ଏକ ରାମ୍ପ ଶୋ ଅନୁଷ୍ଠିତ ହୋଇଥିଲା। ଏଭଳି ସାଂସ୍କୃତିକ କାର୍ଯ୍ୟକ୍ରମ ଉଭୟ ଦେଶ ମଧ୍ୟରେ ସମ୍ପର୍କ ସୁଦୃଢ଼ କରିବ ବୋଲି ଆବାହକ ତଥା ‘ଆର୍ଯ୍ୟଭଟ୍ଟ’ ମ୍ୟାନେଜିଂ ଟ୍ରଷ୍ଟି ଚିଦାତ୍ମିକା ଖଟୁଆ କହିଛନ୍ତି। ଇଣ୍ଡୋନେସିଆରୁ ଗଭର୍ନର ମଙ୍ଗ୍କୁଙ୍କ ସହ ପତ୍ନୀ ପୁତୁ ଅଗସ ମହା ଉସାଧା, ଅଗସ ଇନ୍ଦ୍ର ଉଦୟନ, ଇଣ୍ଡୋନେସିଆ ଦୂତାବାସର ଶିକ୍ଷା ଓ ସଂସ୍କୃତି ବିଭାଗ ଆସିଷ୍ଟାଣ୍ଟ ମହମ୍ମଦ ଇକସାନ ପ୍ରମୁଖ ଯୋଗଦେଇଥିଲେ। କାର୍ଯ୍ୟକ୍ରମ ଶେଷରେ କଳିଙ୍ଗ ଇଣ୍ଟରନାଶନାଲ ୟୁଥ ଫାଉଣ୍ଡେଶନର ପ୍ରତିଷ୍ଠାତା ବିଭୁ ପ୍ରସାଦ ସ୍ବାଇଁ ଧନ୍ୟବାଦ ଦେଇଥିଲେ।
