କରାଚୀ,୧୮।୫ (ପି.ଟି.): ଭାରତୀୟ ଅଧିନାୟକ ବିରାଟ କୋହଲିଙ୍କ ସହ ବର୍ତ୍ତମାନ ବାବର ଆଜମଙ୍କୁ ତୁଳନା କରାଯିବା ବହୁତ ଶ୍ରୀଘ ହେବ ବୋଲି ପୂର୍ବତନ ବ୍ୟାଟ୍ସମ୍ୟାନ ୟୁନିସ୍ ଖାନ କହିଛନ୍ତି। ପାକିସ୍ତାନର ବାବର ଜଣେ ଉଚ୍ଚକୋଟୀର ପ୍ରତିଭାସମ୍ପନ୍ନ ବ୍ୟାଟ୍ସମ୍ୟାନ ହୋଇଥିଲେ ମଧ୍ୟ ୫ ବର୍ଷ ପରେ ତାଙ୍କୁ କୋହଲିଙ୍କ ସହ ତୁଳନା କରାଯାଇପାରିବ। କୋହଲି ସବୁ ଫର୍ମାଟରେ ଓ ସବୁ ପ୍ରକାର ପରିସ୍ଥିତିରେ ନିଜର ଦକ୍ଷତା ପ୍ରମାଣ କରିବାରେ ସଫଳ ହୋଇଛନ୍ତି। କିନ୍ତୁ ବାବର ଏଥିରେ ବହୁତ ପଛରେ ରହିଛନ୍ତି ବୋଲି ୟୁନିସ୍ ସ୍ପଷ୍ଟ କରିଛନ୍ତି। ଅଭିଜ୍ଞତାରେ ମଧ୍ୟ କୋହଲି ବହୁତ ଆଗରେ ରହିଛନ୍ତି। ଶ୍ରେଷ୍ଠ କ୍ରିକେଟ ଖେଳିବାରେ କୋହଲିଙ୍କର ଅଧିକ ୫ ବର୍ଷର ଅଭିଜ୍ଞତା ରହିଛି। ପୁଣି କୋହଲି ଏବେ କ୍ୟାରିୟରର ଶ୍ରେଷ୍ଠ ସମୟ ଦେଇ ଗତି କରୁଛନ୍ତି। ସବୁ ପ୍ରକାର ସ୍ଥିତିରେ ଭଲ ଖେଳି କୋହଲି ୭୦ଟି ଅନ୍ତର୍ଜାତୀୟ ଶତକ ହାସଲ କରିଛନ୍ତି। ବାବରଙ୍କୁ ଆହୁରି ବହୁତ ବାଟ ଯିବାକୁ ପଡିବ ବୋଲି ସେ କହିଛନ୍ତି।
ବାବର ମଧ୍ୟ ୩ଟି ଫର୍ମାଟରେ ଭଲ ପ୍ରଦର୍ଶନ କରୁଛନ୍ତି ଓ ତାଙ୍କର ବ୍ୟାଟିଂ ଆଭରେଜ୍ ମଧ୍ୟ ଭଲ ରହିଛି। ଦିନକୁ ଦିନ ତାଙ୍କ ପ୍ରଦର୍ଶନରେ ଉନ୍ନତି ହେଉଛି। କୋହଲିଙ୍କ ଭଳି ଟେକ୍ନିକ୍ ଓ କ୍ୱାଲିଟି ବାବରଙ୍କ ପାଖରେ ରହିଛି ବୋଲି ୟୁନିସ୍ କହିଛନ୍ତି। ୩୧ ବର୍ଷୀୟ କୋହଲି ୨୦,୦୦୦ ଅନ୍ତର୍ଜାତୀୟ ରନ ସଂଗ୍ରହ କରିଛନ୍ତି। ଅନ୍ୟପଟେ ୨୫ ବର୍ଷୀୟ ପାକିସ୍ତାନ ଦିନିକିଆ ଅଧିନାୟକ ବାବର ଅପେକ୍ଷାକୃତ କମ୍ ମ୍ୟାଚ୍ ଖେଳି ୬୬୮୦ ରନ ସଂଗ୍ରହ କରିଛନ୍ତି।
