ଭୁବନେଶ୍ୱର,୩୧।୧(ବ୍ୟୁରୋ): ବାଂଲାଦେଶରୁ ଓଡ଼ିିଶାକୁ ଯୁବତୀ ଚାଲାଣ ର଼୍ୟାକେଟର ମୂଳ ଚେରକୁ ଖୋଜୁଛି ଏସ୍ଟିଏଫ୍। ଏହି ର଼୍ୟାକେଟ ପଛରେ କେଉଁମାନେ ସମ୍ପୃକ୍ତ ଅଛନ୍ତି ତାହା ଜାଣିବା ପାଇଁ ଏସ୍ଟିଏଫ୍ କିଙ୍ଗପିନ୍ ଅଞ୍ଜଳି ଦିଦି ଏବଂ ଇବ୍ରାହିମ୍ଙ୍କୁ ୨ଦିନିଆ ରିମାଣ୍ଡରେ ନେବ। ଏସ୍ଟିଏଫ୍ ପକ୍ଷରୁ ୫ଦିନ ପାଇଁ ସ୍ଥାନୀୟ ଏସ୍ଡିଜେଏମ୍ କୋର୍ଟରେ ରିମାଣ୍ଡ ଲାଗି ଆବେଦନ କରାଯାଇଥିବାବେଳେ ଗୁରୁବାର କୋର୍ଟ ଉଭୟଙ୍କୁ ୨ଦିନ ଲାଗି ଅନୁମତି ଦେଇଛନ୍ତି। ଶୁକ୍ରବାରଠାରୁ ଏସ୍ଟିଏଫ୍ ଉଭୟଙ୍କୁ ରିମାଣ୍ଡରେ ନେବ। ଏସ୍ଟିଏଫ୍ ଡିଆଇଜିଙ୍କ ନେତୃତ୍ୱରେ ଗଠିତ ଏକ ଟିମ୍ ସେମାନଙ୍କୁ ପଚରାଉଚରା କରିବ।
ଅଞ୍ଜଳି ଦିଦି ଏବଂ ଇବ୍ରାହିମ୍ଙ୍କୁ ଜେରା ପରେ ଏହି ର଼୍ୟାକେଟରେ ଅନ୍ୟ କେଉଁମାନେ ଜଡ଼ିତ ଅଛନ୍ତି ତାହାର ପର୍ଦ୍ଦାଫାଶ୍ ହେବ। ଏପରିକି ବାଂଲାଦେଶରୁ ଭାୟା କୋଲକାତା ଦେଇ ଯୁବତୀଙ୍କୁ କିପରି ଭୁବନେଶ୍ୱରକୁ ଅଣାଯାଉଥିଲା ତାହାର ରୁଟ୍ ମ୍ୟାପ୍ ଜାଣିବା ପାଇଁ ଏସ୍ଟିଏଫ୍ ଉଭୟଙ୍କୁ ପଚରାଉଚରା କରିବ। ଅଞ୍ଜଳି ଦିଦି ଏବଂ ଶର୍ଟ ଷ୍ଟେ ହୋମ୍ରେ ରହିଥିବା ୬ ଯୁବତୀଙ୍କୁ ମୁହଁାମୁହିଁ ଜେରା କରାଯିବ। ଫଳରେ ସେମାନଙ୍କ କଥାବାର୍ତ୍ତାରେ ତାଳମେଳ ରହୁଛି କି ନାହିଁ ତାହା ଧରାପଡ଼ିଯିବ। ବାଂଲାଦେଶୀ ଯୁବତୀଙ୍କୁ କୋଲକାତାରୁ ଓଡ଼ିଶା ଆଣିବା ପରେ ତାଙ୍କର ଦେଖାରଖା କରୁଥିଲେ ଦଲାଲ ସମ୍ବିତ। ଉଦ୍ଧାର ୬ ଯୁବତୀଙ୍କ ବୟାନ ଅନୁସାରେ ଏସ୍ଟିଏଫ୍ ୪ ଦିନ ହେବ ସମ୍ବିତ ଓରଫ ଉମାକାନ୍ତ ଓରଫ ପୁଅଙ୍କୁ ଉଠାଇ ଆଣି ଏକ ଗୁପ୍ତ ସ୍ଥାନରେ ରଖି ପଚରାଉଚରା କରୁଛି। ତାଙ୍କ ଘର ଭୁବନେଶ୍ୱର ଉପକଣ୍ଠରେ। ବାଂଲାଦେଶୀ ଯୁବତୀ କୋଲକାତାରେ ପହଞ୍ଚିବା ପରେ ସେମାନଙ୍କୁ ସମ୍ବିତ ଭୁବନେଶ୍ୱର ଆଣୁଥିଲେ। ଏଠାରେ ହୋଟେଲ କିମ୍ବା ଭଡ଼ାଘରେ ରଖୁଥିଲେ। ସେମାନଙ୍କ ଖାଇବା ପିଇବା ବୁଝିବା ସହ ନକଲି ଆଧାରକାର୍ଡ ମଧ୍ୟ ପ୍ରସ୍ତୁତ କରୁଥିଲେ। ଏହାପରେ ଯୁବତୀମାନଙ୍କ ପାଇଁ ଲୋକାଲ ପର୍ଣ୍ଣ ସାଇଟ୍ ଏବଂ ଅନ୍ଲାଇନ ଜରିଆରେ ଗ୍ରାହକ ଖୋଜୁଥିଲେ। ଗ୍ରାହକ ଠିକ ହେବା ପରେ କାରରେ ସ୍ଥିରୀକୃତ ହୋଟେଲକୁ ଯୁବତୀଙ୍କୁ ନେଉଥିଲେ ଏବଂ ପୁଣି ରୁମ୍ରେ ଆଣି ଛାଡୁଥିଲେ। ଗ୍ରାହକଙ୍କଠାରୁ ଯାହା ଟଙ୍କା ମିଳୁଥିଲା ସେଥିରୁ ଯୁବତୀଙ୍କୁ ୩୦ ପ୍ରତିଶତ ଦେଉଥିବାବେଳେ ବାକି ଟଙ୍କା ଅଞ୍ଜଳି ଦିଦି ଏବଂ ଅନ୍ୟ ଦଲାଲମାନେ ନେଉଥିଲେ। ୫୦ରୁ ଊର୍ଦ୍ଧ୍ୱ ଯୁବତୀଙ୍କୁ ଭୁବନେଶ୍ୱର ଅଣାଯାଇଥିଲା ବୋଲି ଜଣାପଡ଼ିଛି। ଏସ୍ଟିଏଫ୍ ପକ୍ଷରୁ ଧରପଗଡ଼ ହେବା ପରେ ଅନ୍ୟ ଜଣେ ଦଲାଲ ସମ୍ପୃକ୍ତ ଯୁବତୀମାନଙ୍କୁ ପଡୋଶୀ ରାଜ୍ୟକୁ ପଠାଇ ଦେଇଥିବା କୁହାଯାଉଛି। ଏହି ଦଲାଲ ଜଣକ କିଏ ସେ ନେଇ ଏସ୍ଟିଏଫ୍ ଅନୁସନ୍ଧାନ ଆରମ୍ଭ କରିଛି।
