ବଳାତ୍କାର ଶିକାର ନାବାଳିକାଙ୍କୁ ବାପାଙ୍କ ଜିମା: ପ୍ରଶ୍ନ ଉଠାଇଲା ଶିଶୁ ମଙ୍ଗଳ ସମିତି
8:36 amAugust 11, 2019 / 21

ଅନୁଗୋଳ ଅଫିସ, ୧୧।୮ – ଅନୁଗୋଳ ବସ୍‌ଷ୍ଟାଣ୍ଡ ନିକଟରେ ଜୁଲାଇ ୨୧ରେ ବଳାତ୍କାରର ଶିକାର ହୋଇଥିବା ନାବାଳିକାଙ୍କୁ ଅନୁଗୋଳ ପୋଲିସ ଶନିବାର ମେଡିକାଲ ପରିସରରେ ତାଙ୍କ ବାପାଙ୍କ ଜିମା ଦେଇଛି। ହେଲେ ପୋଲିସର ଏପରି କାର୍ଯ୍ୟକୁ ନେଇ ପ୍ରଶ୍ନ ଉଠାଇଛି ଜିଲା ଶିଶୁ ମଙ୍ଗଳ ସମିତି। ପୋଲିସ ଏପରି କରିବା କିଶୋର ନ୍ୟାୟ ଆଇନ୍‌ ୨୦୧୫ (ଶିଶୁମାନଙ୍କ ଯତ୍ନ ଓ ସୁରକ୍ଷା)କୁ ଉଲ୍ଲଂଘନ କରୁଥିବା ସମିତି ଭାରପ୍ରାପ୍ତ ଅଧ୍ୟକ୍ଷ ଦେବାଶିଷ ପଟ୍ଟନାୟକ କହିଛନ୍ତି। ଏ ନେଇ ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ କହିଛନ୍ତି, ଦୋଷୀକୁ କିଭଳି ଦଣ୍ଡ ମିଳିବ ସେ ନେଇ ଆମେ କାର୍ଯ୍ୟ କରୁଛୁ। ନିୟମ କେଉଁଠି ଉଲ୍ଲଂଘନ କରାଗଲା ତାହା ଜାଣି ନାହିଁ।
ପ୍ରକାଶ ଯେ, ନାବାଳିକା ବଳାତ୍କାର ଘଟଣାରେ ଗିରଫ ପରେ କୋର୍ଟ ଚାଲାଣ ହୋଇଥିବା ଅଭିଯୁକ୍ତ ଶିବୁ ପଟ୍ଟନାୟକ(୫୫)ଙ୍କ ବିରୋଧରେ ପୋଲିସ ଅଦ୍ୟାବଧି ଚାର୍ଜଶିଟ୍‌ ଦାଖଲ କରିନାହିଁ। କୋର୍ଟ ଚାଲାଣ କରିବା ଦିନ ଅନୁଗୋଳ ଏସ୍‌ପି ୧୫ ଦିନ ମଧ୍ୟରେ ଚାର୍ଜଶିଟ୍‌ ଦାଖଲ କରାଯିବ ବୋଲି କହିଥିଲେ। ତେବେ ଚାର୍ଜଶିଟ୍‌ ଦାଖଲ ପାଇଁ ନାବାଳିକାଙ୍କ ଜାତିଗତ ପ୍ରମାଣପତ୍ର ଓ ବୟସ ପଞ୍ଜୀକରଣ ସହ ପରିବାର ଲୋକ ଆବଶ୍ୟକ ପଡ଼ୁଥିବାରୁ ୩ ଦିନ ତଳେ ପୋଲିସ ମହାରାଷ୍ଟ୍ର ଯାଇ ନାବାଳିକାଙ୍କ ବାପାଙ୍କୁ ଆଣିବା ସହ ପ୍ରମାଣପତ୍ର ସଂଗ୍ରହ କରିଛି। ଶନିବାର ମେଡିକାଲରେ ଚିକିତ୍ସାରତ ନାବାଳିକାଙ୍କୁ ପୋଲିସ ତାଙ୍କ ବାପାକୁ ହସ୍ତାନ୍ତର କରିଛି। ଏ ନେଇ ସନ୍ଧ୍ୟା ସାଢ଼େ ୫ଟାରେ ଡିଆର ନଂ ୨୩୪୮/୧୯ରେ ଜିଲା ଶିଶୁ ମଙ୍ଗଳ ସମିତିକୁ ଅବଗତ କରାଯାଇଛି। କିନ୍ତୁ ସମିତି ପକ୍ଷରୁ ଏଥିରେ ଅସନ୍ତୋଷ ବ୍ୟକ୍ତ କରାଯିବା ସହ ନାବାଳିକାଙ୍କୁ ଅଦୃତ ଶିଶୁ ଯତ୍ନ କେନ୍ଦ୍ରକୁ ପଠାଇବାକୁ ଶୁକ୍ରବାରଠାରୁ କୁହାଯାଇଥିଲେ ମଧ୍ୟ କାହିଁକି ପଠାଯାଇ ନ ଥିଲା ତାହାକୁ ନେଇ ପ୍ରଶ୍ନ କରାଯାଇଛି। ଏବେ ନାବାଳିକା ତାଙ୍କ ବାପାଙ୍କ ସହ ଅନୁଗୋଳ ଷ୍ଟାଡିୟମଠାରେ ଅସ୍ଥାୟୀ କ୍ୟାମ୍ପରେ ରହିଥିବାରୁ ସେ କେତେ ସୁରକ୍ଷିତ ଓ ଉଭୟଙ୍କୁ ରବିବାର ପୂର୍ବାହ୍ନ ୧୧ଟା ସୁଦ୍ଧା ହାଜର କରିବାକୁ ସମିତି ନଂ. ୪୨୬/୧୯ରେ ପୋଲିସକୁ ଚିଠି ଲେଖିଥିବା ଜଣାପଡ଼ିଛି।