ବର୍ଷାରେ ବେହାଲ ଅନୁଗୋଳ ଜିଲା
8:11 amSeptember 8, 2019 / 21

ଅନୁଗୋଳ ଅଫିସ, ୮।୯ – ଅନୁଗୋଳ ଜିଲାରେ ଶୁକ୍ରବାର ରାତିରୁ ବର୍ଷା ଲାଗି ରହିଥିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଶନିବାର ଅପରାହ୍ନ ପର୍ଯ୍ୟନ୍ତ ଜୋରଦାର ବର୍ଷା ଯୋଗୁ ସହରର ତଳିଆ ବ୍ରାହ୍ମଣୀଦେଈପଡ଼ା, ବଣିଆବାହାଳ, ରାଜକିଶୋରପଡ଼ା, ହେମସୁରପଡ଼ା, ଶିମିଳିପଡ଼ାର ତଳିଆ ଅଞ୍ଚଳରେ ପାଣି ପଶିଯାଇଛି। ସେହିପରି ଜାତୀୟ ରାଜପଥ ୫୫ର ଅନୁଗୋଳରୁ କାରଗିଲ ପେଟ୍ରୋଲ ପମ୍ପ, କରଡ଼ାଗାଡ଼ିଆ ଛକରେ ମଧ୍ୟ ପାଣିର ସୁଅ ଦେଖିବାକୁ ମିଳିଥିଲା।
ଜିଲାରେ ମୋଟ ୫୪୬ ମିଲିମିଟର ବର୍ଷା ହୋଇଥିବା ଜରୁରିକାଳୀନ ବିଭାଗ ପକ୍ଷରୁ ସୂଚନା ମିଳିଛି। ଆଠମଲ୍ଲିକରେ ସର୍ବାଧିକ ୧୬୬ ମିଲିମିଟର, କଣିହଁାରେ ୯୯.୨ ମିମି, ଅନୁଗୋଳରେ ୫୮.୦ ମିମି, ଛେଣ୍ଡିପଦାରେ ୫୧.୨ ମିମି, ପାଲଲହଡ଼ାରେ ୪୫.୦ ମିମି, ବଅଁରପାଳରେ ୪୪.୮ ମିମି, ତାଳଚେରରେ ୪୨.୦ ମିମି, କିଶୋରନଗରରେ ୪୦.୦ ମିମି ବର୍ଷା ହୋଇଛି। ଅନୁଗୋଳ ସହରରେ ୫୮.୦ ମିମି ବର୍ଷା ହେବା ଫଳରେ ବିଭିନ୍ନ ସ୍ଥାନରେ ପାଣି ଜମି ରହିଛି। ଏଥିପାଇଁ ଅନୁଗୋଳ ପୌରପାଳିକାକୁ ଦାୟୀ କରିଛନ୍ତି ଭାଜପାର କାର୍ଯ୍ୟକାରିଣୀ ସଦସ୍ୟ ପ୍ରତାପ ଚନ୍ଦ୍ର ପ୍ରଧାନ। ସେ କହିଛନ୍ତି, ପୌରପାଳିକା ପକ୍ଷରୁ ରାସ୍ତା ମରାମତି ହେଉନାହିଁ। ପାଣି ଜମୁଥିବା ସ୍ଥାନ ଗୁଡ଼ିକରେ ଡ୍ରେନ ବ୍ୟବସ୍ଥା ବିପର୍ଯ୍ୟସ୍ତ ଥିବାରୁ ଏପରି ପରିସ୍ଥିତି ଉପୁଜୁଛି। ତେଣୁ ଏଗୁଡ଼ିକ ପ୍ରତି ପୌରପ୍ରଶାସନ ଦୃଷ୍ଟି ଦେବା ଆବଶ୍ୟକ ବୋଲି ସେ କହିଛନ୍ତି। ସହରରୁ ତୁରନ୍ତ ପାଣି ନିଷ୍କାସନ ପାଇଁ ବ୍ୟବସ୍ଥା କରିବା ସହ ମଶା ତେଲ ଓ ବ୍ଲିଚିଂ ପକାଇବା ପାଇଁ ସେ ଦାବି କରିଛନ୍ତି।