ବ୍ରହ୍ମପୁର ଅଫିସ,୨୨।୨: ସହରର ଉନ୍ନତି ନେଇ ବ୍ରହ୍ମପୁର ମହାନଗର ନିଗମ (ବିଇଏମ୍ସି) ନୂତନ ସମ୍ମିଳନୀ କକ୍ଷରେ ମଙ୍ଗଳବାର ଏକ ସମନ୍ବୟ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ମେୟର ସଂଘମିତ୍ରା ଦଳେଇ ଅଧ୍ୟକ୍ଷତା କରିଥିଲେ।
୪୭ ପ୍ରସ୍ତାବ ଉପରେ ଆଲୋଚନା ହୋଇଥିଲା। ସହରର ରାସ୍ତାଘାଟ ଓ ଡ୍ରେନ୍ ମରାମତି ଓ ନୂତନ ନିର୍ମାଣ ନେଇ ନିଷ୍ପତ୍ତି ନିଆଯାଇଥିଲା। ସହରରେ ୨୯୬ କି.ମି.ଡ୍ରେନ୍ ରହିଛି, ଏହାକୁ ବର୍ଷାଦିନ ପୂର୍ବରୁ ମରାମତି ସହ ନୂତନ ଡ୍ରେନ୍ ତିଆରି ନିଷ୍ପତ୍ତି ହୋଇଥିଲା। ଆଗାମୀ ଦିନରେ ଡ୍ରେନ ପାଇଁ ମାଷ୍ଟର ପ୍ଲାନ ପ୍ରସ୍ତୁତ କରାଯିବ। ଏଥିସହ ସହରରେ ପ୍ରାୟ ୧୦୨ କି.ମି.ରାସ୍ତା ନିଗମ ଅଧୀନରେ ରହିଛି। ସେଗୁଡିକୁ ମଧ୍ୟ ମରାମତି କରାଯିବ। ବେଢାବନ୍ଧ, ହରିଡାଖଣ୍ଡି, ଆଗୁଳା ବନ୍ଧ ଓ ଆଇନାବନ୍ଧର ସୌନ୍ଦର୍ଯ୍ୟକରଣ ନିମନ୍ତେ ପ୍ରାୟ ୩ କୋଟି ଟଙ୍କା ବ୍ୟୟ ଅଟକଳରେ ଦଳ ସଫେଇ ମେଶିନ କିଣାଯାଇଛି, ପହଞ୍ଚିବା ପରେ କାମ ଆରମ୍ଭ ହେବ। କେସି ଟାଉନ ହାଇସ୍କୁଲ, ସିଟି ହାଇସ୍କୁଲ, ଖଲ୍ଲିକୋଟ ବିଶ୍ୱବିଦ୍ୟାଳୟ ଓ ଇଞ୍ଜିନିୟରିଂ ସ୍କୁଲ ଖେଳ ପଡିଆର ଉନ୍ନତୀକରଣ କରାଯିବ ବୋଲି ନିଷ୍ପତ୍ତି ନିଆଯାଇଥିଲା। କମାପଲୀ ଓ ବିଜିପୁର ସମେତ ଅନ୍ୟାନ୍ୟ ସ୍ଥାନରେ ମାର୍କେଟ କମ୍ପ୍ଲେକ୍ସ ନିର୍ମାଣ ହେବ। ପରିବା ବ୍ୟବସାୟୀଙ୍କ ନିମନ୍ତେ ପ୍ରାୟ ୧୫ରୁ ୨୦ଟି ଭେଣ୍ଡିଂ ଜୋନ୍ ହେବ। ଶ୍ମଶାନ ଉନ୍ନତୀକରଣ ସାଙ୍ଗକୁ ଆସିକା ରୋଡଠାରୁ ବ୍ରହ୍ମପୁର ବଡ ଡାକ୍ତରଖାନା ଦେଇ ଆମ୍ବପୁଆ ପର୍ଯ୍ୟନ୍ତ ବାଇପାସ୍ ନିର୍ମାଣ କରିବା ପାଇଁ ପ୍ରସ୍ତାବ ରହିଥିଲା।
ଏଥିନିମନ୍ତେ ଯୋଜନା ପ୍ରସ୍ତୁତ ପରେ ଜମି ଅଧିଗ୍ରହଣ ନେଇ ପଦକ୍ଷେପ ନିଆଯିବ ବୋଲି କୁହାଯାଇଥିଲା। ଏଥିସହ ସହରରେ ଓଡିଶା ଆଦର୍ଶ ବିଦ୍ୟାଳୟ ପାଇଁ ଜାଗା ଚିହ୍ନଟ ଓ ଅତିରିକ୍ତ ଆଞ୍ଚଳିକ ପରିବହନ କାର୍ଯ୍ୟାଳୟ ଖୋଲିବା ନେଇ ଆଲୋଚନା ହୋଇଥିଲା। କିନ୍ତୁ ସମସ୍ତ କାର୍ଯ୍ୟ ଅନ୍ଲାଇନରେ ହେଉଥିବାରୁ କାର୍ଯ୍ୟାଳୟ ପରିବର୍ତ୍ତେ ତାଲିମ କେନ୍ଦ୍ର ଓ ଡ୍ରାଇଭିଂ ଟେଷ୍ଟିଂ ସେଣ୍ଟର ପ୍ରତିଷ୍ଠା କରାଯିବା ନେଇ ବିଭାଗ ପକ୍ଷରୁ ପରାମର୍ଶ ଦିଆଯାଇଥିଲା। ଅନ୍ୟମାନଙ୍କ ମଧ୍ୟରେ ଡେପୁଟି ମେୟର ଇ. ବିବେକ ରେଡ୍ଡୀ, କମିଶନର ଜେ. ସୋନାଲ, ଅତିରିକ୍ତ କମିଶନର ସମ୍ବିତ ରାଉତ ଓ ଡେପୁଟି କମିଶନର ବିନୋଦ କୁମାର ବେହେରା ଉପସ୍ଥିତ ଥିଲେ। ଏଥିସହ ପୂର୍ତ୍ତ, ଜନସ୍ବାସ୍ଥ୍ୟ, ପରିବହନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
