ଜେନେଭା,୨୦ା୬(ଆଇଏଏନ୍ଏସ୍): ହିଂସାକାଣ୍ଡ, ମାଲିମକଦ୍ଦମା, ବିବାଦ ଆଦି ବିଭିନ୍ନ କାରଣରୁ ୨୦୧୮ରେ ସାରା ବିଶ୍ୱରୁ ୭ କୋଟିରୁ ଅଧିକ ଲୋକ ଦେଶାନ୍ତର ହେବାକୁ ବାଧ୍ୟ ହୋଇଛନ୍ତି। ଗତ ୭୦ ବର୍ଷ ମଧ୍ୟରେ ଏହା ସର୍ବାଧିକ ବୋଲି ଜାତିସଂଘର ଶରଣାର୍ଥୀ ଉଚ୍ଚାୟୁକ୍ତଙ୍କ କାର୍ଯ୍ୟାଳୟ (ୟୁଏନ୍ଏଚ୍ସିଆର୍) ରିପୋର୍ଟରୁ ଜଣାପଡିଛି। ଉକ୍ତ ଏଜେନ୍ସିର ବାର୍ଷିକ ଅନ୍ତର୍ଜାତୀୟ ଦେଶାନ୍ତର ରିପୋର୍ଟ ବୁଧବାର ପ୍ରକାଶ ପାଇଛି। ଗତବର୍ଷ ୭ କୋଟି ୮ ଲକ୍ଷ ଲୋକ ବିସ୍ଥାପିତ ହେବାକୁ ବାଧ୍ୟ ହୋଇଥିବା କୁହାଯାଉଛି। ଏହା ୨୦ ବର୍ଷ ତଳର ରେକର୍ଡର ଦୁଇଗୁଣ ଏବଂ ଗତବର୍ଷ ତୁଳନାରେ ୨୩ ଲକ୍ଷ ଅଧିକ। ତେବେ ରିପୋର୍ଟ ତୁଳନାରେ ବାସ୍ତବ ବିସ୍ଥାପିତଙ୍କ ସଂଖ୍ୟା ଯଥେଷ୍ଟ ଅଧିକ ହେବ ବୋଲି କୁହାଯାଉଛି। କାରଣ ଭେନିଜୁଏଲାରେ ସଙ୍କଟ ଲାଗି ରହିଥିବାବେଳେ ସେଠାରୁ ଯେତିକି ଲୋକ ଅନ୍ୟ ଦେଶରେ ଶରଣାର୍ଥୀ ହେଉଛନ୍ତି ତାହାର କିଛି ଅଂଶ ୟୁଏନ୍ଏଚ୍ସିଆର୍ ରିପୋର୍ଟରେ ସ୍ଥାନ ପାଇଛି।
ଭେନିଜୁଏଲାରୁ ୪ ନିୟୁତରୁ ଅଧିକ ଲୋକ ଦେଶ ଛାଡ଼ିଥିବା ସେଠାକାର ସରକାରଙ୍କ ପାଖରେ ଥିବା ତଥ୍ୟରୁ ଜଣାପଡିଛି। ନିକଟରେ ବିଶ୍ୱରେ ଏହା ସର୍ବାଧିକ ବିସ୍ଥାପନ ସମସ୍ୟା ବୋଲି କୁହାଯାଉଛି। ଯଦିଓ ସେମାନଙ୍କ ମଧ୍ୟରୁ ଅଧିକାଂଶ ଅନ୍ତର୍ଜାତୀୟ ଶରଣାର୍ଥୀ ସୁରକ୍ଷା ଆବଶ୍ୟକ କରନ୍ତି ତେବେ ସେମାନଙ୍କ ମଧ୍ୟରୁ ମାତ୍ର ୫ ଲକ୍ଷ ଏଥିପାଇଁ ଆବେଦନ କରିଥିବା ଜଣାପଡିଛି। ଅସୁବିଧାରେ ପଡ଼ି ଦେଶ ଛାଡୁଥିବା ସମସ୍ତଙ୍କର ସୁରକ୍ଷା ଆବଶ୍ୟକ ବୋଲି ଜାତିସଂଘ ଶରଣାର୍ଥୀ ଉଚ୍ଚାୟୁକ୍ତ ଫିଲିପୋ ଗ୍ରାଣ୍ଡି କହିଛନ୍ତି। ଶରଣାର୍ଥୀ ଓ ଦେଶାନ୍ତରୀ ଭାଷାକୁ ନେଇ ବିଭେଦ ରହିଥିବାବେଳେ ବିଭିନ୍ନ ଦେଶରୁ ସେମାନଙ୍କ ପ୍ରତି ଉଦାରତା ଓ ଐକ୍ୟଭାବ ବୃଦ୍ଧି ପାଉଥିବା ଦେଖାଯାଉଛି। ବିଶେଷ କରି ନିର୍ଦ୍ଦିଷ୍ଟ ସମ୍ପ୍ରଦାୟ ବହୁସଂଖ୍ୟାରେ ଶରଣାର୍ଥୀଙ୍କୁ ଆଶ୍ରୟ ଦେଉଛନ୍ତି।
ବିସ୍ଥାପିତଙ୍କୁ ତିନି ଭାଗରେ ବିଭକ୍ତ କରାଯାଇଛି। ପ୍ରଥମ ହେଲା ଶରଣାର୍ଥୀ, ଯେଉଁମାନେ ଯୁଦ୍ଧ, ବିଦ୍ରୋହ କିମ୍ବା ମକଦ୍ଦମା ଆଦି କାରଣରୁ ଦେଶ ଛାଡିବାକୁ ବାଧ୍ୟ ହେଉଛନ୍ତି। ୨୦୧୮ରେ ବିଶ୍ୱବ୍ୟାପୀ ଶରଣାର୍ଥୀଙ୍କ ସଂଖ୍ୟା ୨ କୋଟି ୫୯ ଲକ୍ଷ ବୋଲି ଜଣାପଡିଛି, ଯାହା କି ୨୦୧୭ ତୁଳନାରେ ୫ ଲକ୍ଷ ଅଧିକ। ଏଥିରେ ୫୫ ଲକ୍ଷ ପାଲେଷ୍ଟାଇନ୍ ଶରଣାର୍ଥୀ ଅଛନ୍ତି। ଦ୍ୱିତୀୟ ଗୋଷ୍ଠୀ ହେଲେ ଆଶ୍ରୟ ଆଶାୟୀ। ସେମାନଙ୍କ ସଂଖ୍ୟା ୩୫ ଲକ୍ଷ। ସେମାନେ ନିଜ ଜନ୍ମଭୂମି ବାହାରେ ଅନ୍ତର୍ଜାତୀୟ ସୁରକ୍ଷା ଚାହାନ୍ତି। ସେମାନଙ୍କୁ ଏପର୍ଯ୍ୟନ୍ତ ଶରଣାର୍ଥୀ ମାନ୍ୟତା ଦିଆଯାଇ ନାହିଁ। ତୃତୀୟ ଗୋଷ୍ଠୀ ହେଲେ ଆଭନ୍ତରୀଣ ଭାବେ ବିସ୍ଥାପିତ ହେଉଥିବା ବ୍ୟକ୍ତିବିଶେଷ। ରିପୋର୍ଟ ଅନୁଯାୟୀ ଗତବର୍ଷ ସାରା ବିଶ୍ୱରେ ସେମାନଙ୍କ ସଂଖ୍ୟା ୪ କୋଟି ୧୩ ଲକ୍ଷ ରହିଛି। ଦୁଇତୃତୀୟାଂଶରୁ ଅଧିକ ଶରଣାର୍ଥୀ କେବଳ ସିରିଆ, ଆଫଗାନିସ୍ତାନ, ଦକ୍ଷିଣ ସୁଦାନ, ମ୍ୟାନ୍ମାର ଓ ସୋମାଲିଆରୁ ଆସିଥାନ୍ତି। ଏହାବ୍ୟତୀତ ଇରାକ, ୟେମେନ, କଙ୍ଗୋ, ସୁଦାନରେ ମଧ୍ୟ ବିଦ୍ରୋହ କାରଣରୁ ସେଠାକାର ଲୋକେ ଦେଶ ଛାଡୁଛନ୍ତି। ୨୦୧୭ ଶେଷ ଭାଗରେ ବହୁସଂଖ୍ୟାରେ ରୋହିଙ୍ଗ୍ୟା ଶରଣାର୍ଥୀ ମ୍ୟାନମାରର ରାଖାଇନ୍ ପ୍ରଦେଶରୁ ବିତାଡିତ ହେବା ପରେ ବାଂଲାଦେଶର ଶରଣ ନେଇଥିଲେ। ୨୦୧୮ରେ ସିରିଆରୁ ସର୍ବାଧିକ ୬୭ ଲକ୍ଷ ଏବଂ ଆଫଗାନିସ୍ତାନରୁ ୨୭ ଲକ୍ଷରୁ ଅଧିକ ଶରଣାର୍ଥୀ ଅନ୍ୟ ଦେଶକୁ ପଳାୟନ କରିଛନ୍ତି। ତେବେ ଗତବର୍ଷ ମାତ୍ର ୯୨,୪୦୦ ଶରଣାର୍ଥୀଙ୍କୁ ଆଶ୍ରୟ ପ୍ରଦାନ କରାଯାଇଛି, ଯାହା କି ୭ ପ୍ରତିଶତରୁ କମ୍। ଲୋକସଂଖ୍ୟା ବଢ଼ିବା ସହ ଦେଶାନ୍ତରୀଙ୍କ ସଂଖ୍ୟା ବଢ଼ିଚାଲିଛି। ୨୦୦୯ରେ ଦେଶାନ୍ତରୀଙ୍କ ସଂଖ୍ୟା ୪ କୋଟି ୩୩ ଲକ୍ଷ ଥିଲା।
