ନୂଆଦିଲ୍ଲୀ,୩୧।୫: ମେ ୩୦ ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ସରକାରର ଦ୍ୱିତୀୟ ପାଳିର ପ୍ରଥମ ବର୍ଷ ପୂର୍ତ୍ତି। ଏହି ବର୍ଷଟି ପୁଞ୍ଜିବଜାର ନିବେଶକଙ୍କ ଲାଗି ବଡ଼ ଚ୍ୟାଲେଞ୍ଜିଂ ହୋଇ ରହିଛି। ଦଲାଲ ଷ୍ଟ୍ରିଟ୍ରେ ଏହି ସମୟରେ ନିବେଶକଙ୍କ କ୍ଷତି ୨୭ ଲକ୍ଷ କୋଟି ଟଙ୍କା ରହିଛି। ଏହା ଦେଶର ମୋଟ୍ ଘରୋଇ ଉତ୍ପାଦ(ଜିଡିପି)ର ପ୍ରାୟ ୧୩.୫% ବୋଲି ଜଣାପଡ଼ିଛି। ଏହି ସମୟ ମଧ୍ୟରେ ପ୍ରତି ୧୦ ଷ୍ଟକ୍ ମଧ୍ୟରୁ ୯ଟି ନେଗେଟିଭ୍ ରିଟର୍ନ ପ୍ରଦାନ କରିଛି। ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ରେ ସୂଚୀଭୁକ୍ତ ହୋଇଥିବା ମୋଟ କମ୍ପାନୀଙ୍କ ମଧ୍ୟରୁ ପ୍ରାୟ ୧୦% ଆଶାନୁରୂପ ରିଟର୍ନ ପ୍ରଦାନ କରିଛନ୍ତି। ନିକଟରେ ପ୍ରକାଶିତ ଜିଡିପି ଡାଟାକୁ ଦେଖିଲେ ୨୦୧୯-୨୦ ଆର୍ଥତ୍କ ବର୍ଷରେ ଏହା ୪.୨%କୁ ଖସିଛି, ଯାହା ୧୧ ବର୍ଷର ସର୍ବନିମ୍ନ ସ୍ତର। ଗତ ଆର୍ଥତ୍କ ବର୍ଷ ଚତୁର୍ଥ ତ୍ରୈମାସରେ ବିକାଶ ହାର ୩.୧%କୁ ଖସିଛି।
କରୋନାକୁ ରୋକିବା ପାଇଁ ହୋଇଥିବା ଲକ୍ଡାଉନର ପ୍ରଭାବ ଯୋଗୁ ଦେଶରେ ଆର୍ଥତ୍କ କାର୍ଯ୍ୟକଳାପ ଠପ୍ ହୋଇ ରହିଛି। ମାସିକ ପରଚେଜିଂ ମ୍ୟାନେଜର୍ସ ଇଣ୍ଡେକ୍ସ ରେକର୍ଡ ନିମ୍ନ ସ୍ତରକୁ ଖସିଛି। ଶିଳ୍ପ ଉତ୍ପାଦନ ଲଗାତର ଭାବେ ଖସୁଥିବାରୁ ଏହାର ପ୍ରଭାବ ନିବେଶକଙ୍କ ଉପରେ ପଡିଛି। ଏହି ଅବସରରେ ସାମ୍କୋ ସିକ୍ୟୁରିଟିଜର ରିସର୍ଚ୍ଚ ମୁଖ୍ୟ ଉମେଶ ଶାହା କହିଛନ୍ତି ଯେ, ସରକାର ଗ୍ରହଣ କରିଥିବା ବିଭିନ୍ନ ସଂସ୍କାର ପ୍ରକ୍ରିୟାର ପ୍ରଭାବ ବଜାର ଉପରେ ପଡୁଛି। ଜିଏସ୍ଟି ଏବେ ଯାଏ ତା’ର ଉଦ୍ଦେଶ୍ୟ ସାଧନ କରିପାରି ନାହିଁ। କିଛି ପଦକ୍ଷେପ ବଜାର ଉପରେ ଭଲ ପ୍ରଭାବ ଆଣୁଛି। ମାତ୍ର ଅନ୍ୟ କିଛି ବଜାର ଉପରେ ନକାରାତ୍ମକ ପ୍ରଭାବ ପକାଉଛି। ରିପୋର୍ଟ ମୁତାବକ କମ୍ପାନୀଗୁଡିକର ବଜାର ପୁଞ୍ଜୀକରଣ ୧୭.୭% ହ୍ରାସ ଘଟି ୧୨୭.୦୬ ଲକ୍ଷ କୋଟି ଟଙ୍କାକୁ ହ୍ରାସ ଘଟିଛି। ଏହା ଚଳିତ ବର୍ଷ ମେ ମାସ ୩୦ରେ ୧୫୪.୪୪ ଲକ୍ଷ କୋଟି ଟଙ୍କା ରହିଥିଲା। ଏହିଦିନ ମୋଦି ଦାୟିତ୍ୱ ଭାର ଗ୍ରହଣ କରିଥିଲେ।
ପୁଞ୍ଜିବଜାରରେ ୨୬୮୪ ସକ୍ରିୟ ଷ୍ଟକ୍ ମଧ୍ୟରୁ ୨୩୦୮ ନକାରାତ୍ମକ ରିଟର୍ନ ପ୍ରଦାନ କରିଛି। ୧୭ଟି ଷ୍ଟକ୍ କୌଣସି ଲାଭ ପ୍ରଦାନ କରିନାହିଁ। ୩୫୯ ଷ୍ଟକ୍ (୧୩%) ସକାରାତ୍ମକ ରିଟର୍ନ ପ୍ରଦାନ କରିଛି। ଏହା ମଧ୍ୟରୁ ୨୬୯(୧୦%) ଷ୍ଟକ୍ ୧୦%ରୁ ଊର୍ଦ୍ଧ୍ୱ ରିଟର୍ନ ଦେଇଥିବା ଜଣାପଡ଼ିଛି। ଷ୍ଟକ୍ ବଜାର ହ୍ରାସ କ୍ଷେତ୍ରରେ ଉଭୟ ସରକାରଙ୍କ ନୀତି, ବଜାର ଅବସ୍ଥା ସହ ଅନ୍ୟ ପ୍ରସଙ୍ଗ ନିର୍ଭର କରୁଛି। ସବୁ ଦୋଷ ସରକାରଙ୍କ ଉପରେ ଲଦି ହେବ ନାହିଁ ବୋଲି ଏଚ୍ଡିଏଫ୍ସି ସିକ୍ୟୁରିଟିଜର ଦୀପକ ଜସାନୀ କହିଛନ୍ତି। ସେହିଭଳି ପ୍ରଶାନ୍ତ ଜୈନ କହିଛନ୍ତି, ୨୦୨୦-୨୧ ଆର୍ଥତ୍କ ବର୍ଷ ଏତେ ଭଲ ରିଟର୍ନ ଦେବ ବୋଲି ଅଧିକାଂଶ ବଜାର ବିଶେଷଜ୍ଞ ଆଶା ରଖନ୍ତି ନାହିଁ। ଆଗାମୀ ବର୍ଷ କଥା ବିଚାରକୁ ନେବାକୁ ପଡ଼ିବ। ମ୍ୟୁଚୁଆଲ ଫଣ୍ଡର ସିଷ୍ଟମେଟିକ ଇନ୍ଭେଷ୍ଟମେଣ୍ଟ ପ୍ଲାନ୍ରେ ନିବେଶ ବଢ଼ାଇବା ବୁଦ୍ଧିମାନ ହେବ।
