ଲକ୍ଷ୍ନୌ,୩ା୬(ଆଇଏଏନ୍ଏସ୍): ଉତ୍ତରପ୍ରଦେଶରେ ସମାଜବାଦୀ ପାର୍ଟି (ଏସ୍ପି)ର ପରାଜୟ ପରେ ଦଳ ଶିକ୍ଷାଲାଭ କରିଛି। ଏବେ ଭାଇ ଶିବପାଲ୍ ଯାଦବଙ୍କ ସମେତ ବରିଷ୍ଠ ନେତାମାନଙ୍କୁ ଦଳକୁ ଫେରାଇ ଆଣିବା ସହ ଅଣଯାଦବ ନେତାମାନଙ୍କୁ ଦଳରେ ନେବା ଲାଗି ପ୍ରୟାସ ଆରମ୍ଭ ହୋଇଛି। ଅଢ଼େଇ ବର୍ଷରୁ ଊର୍ଦ୍ଧ୍ୱ ଦଳୀୟ କାର୍ଯ୍ୟକ୍ରମରୁ ଦୂରେଇ ରହିବା ପରେ ଏସ୍ପି ପ୍ରତିଷ୍ଠାତା ମୁଲାୟମ ସିଂ ଯାଦବ ଏବେ ସ୍ଥିତି ସମୀକ୍ଷା କରୁଥିବା ଜଣାପଡିଛି। ଅଖିଳେଶ ଯାଦବ ମୁଖ୍ୟମନ୍ତ୍ରୀ ଥିବାବେଳେ ୨୦୧୪ ଲୋକ ସଭା ନିର୍ବାଚନରେ ଏସ୍ପିକୁ ମାତ୍ର ୫ଟି ଆସନ ମିଳିଥିଲା। ୨୦୧୭ରେ ସେ ଦଳ ଅଧ୍ୟକ୍ଷ ହେବା ପରେ ୪୦୩ ଆସନ ବିଶିଷ୍ଟ ଉତ୍ତରପ୍ରଦେଶ ବିଧାନସଭାରେ ତାଙ୍କ ଦଳ ୪୭ ଆସନକୁ ଖସିଆସିଥିଲା। ୨୦୧୯ ନିର୍ବାଚନରେ ବିଏସ୍ପି ସହ ମେଣ୍ଟ ସତ୍ତ୍ୱେ ଏହି ଦଳ ୫ଟି ଆସନରେ ସୀମିତ ରହିଛି। ପରାଜୟ ପରେ ଦଳକୁ ସଜାଡିବା ଲାଗି ଅଖିଳେଶ ଏବେ ମୁଲାୟମଙ୍କ ପରାମର୍ଶ ଲୋଡିଛନ୍ତି। ଏସ୍ପି ଯାଦବମାନଙ୍କର ଦଳ ବୋଲି ଯେଉଁ ଧାରଣା ରହିଛି ତାହାକୁ ବଦଳାଇବାକୁ ହେଲେ ଦଳରେ ଅଣଯାଦବ ନେତାମାନଙ୍କୁ ସାମିଲ କରିବା ଲାଗି ମୁଲାୟମ ପରାମର୍ଶ ଦେଇଛନ୍ତି। ବରିଷ୍ଠ ନେତା ରେଓତି ରମଣ ସିଂ, ଭଗଓ୍ବତି ସିଂ, ଓମ୍ପ୍ରକାଶ ସିଂ, ମନୋଜ ପାଣ୍ଡେ, ଅରବିନ୍ଦ ସିଂ ଗୋପେ, ନାରଦ ରାୟ ଏବଂ ରାଧେଶ୍ୟାମ ସିଂ ପ୍ରମୁଖ ବରିଷ୍ଠ ନେତାଙ୍କୁ ଫେରାଇ ଆଣିବାକୁ ଆଲୋଚନା ପାଇଁ ଡକାଯାଇଛି। ଗତ ଦୁଇ ବର୍ଷରେ ଯେଉଁମାନେ ଦଳ ଛାଡିଛନ୍ତି ସେମାନଙ୍କୁ ଫେରାଇ ଆଣିବା ଲାଗି ମୁଲାୟମ ଅଖିଳେଶଙ୍କୁ ପରାମର୍ଶ ଦେଇଛନ୍ତି।
