ପାଲଲହଡ଼ା, ୧୩ା୮(ଡି.ଏନ.ଏ.)
ଅନୁଗୋଳ ଜିଲା ପାଲଲହଡ଼ା ଉପକଣ୍ଠରେ ବଢିଚାଲିଛି ମାନସିକ ବିକାରଗ୍ରସ୍ତଙ୍କ ସଂଖ୍ୟା। କେତେଜଣ ସ୍ଥାନୀୟ ଅଞ୍ଚଳର ହୋଇଥିବାବେଳେ ଆଉ କେତେକ ବାହାର ଜିଲାରୁ ଏଠାକୁ ଆସି ଏଣେତେଣେ ବୁଲୁଥିବା ଦେଖିବାକୁ ମିଳିଛି। ସେମାନଙ୍କ ପାଇଁ ସରକାରଙ୍କ ପକ୍ଷରୁ ଥଇଥାନ ବ୍ୟବସ୍ଥା କରାଯାଉ ନ ଥିବା ଅଞ୍ଚଳବାସୀ ପ୍ରକାଶ କରିଛନ୍ତି।
ଅଞ୍ଚଳବାସୀଙ୍କ କହିବା ମୁତାବକ, ବହୁ ସଂଖ୍ୟାରେ ମାନସିକ ବିକାରଗ୍ରସ୍ତ ଦିନବେଳା ରାସ୍ତାଘାଟରେ ବୁଲୁଥିବାରୁ ଟ୍ରାଫିକ ଜାମ ହେଉଛି। ଫିଙ୍ଗା ହୋଇଥିବା ଖାଦ୍ୟ ଖାଇବା ସହ ଛକ, ବସ୍ଷ୍ଟାଣ୍ଡ, ଯାତ୍ରୀ ପ୍ରତୀକ୍ଷାଳୟରେ ଶୋଉଛନ୍ତି। ଅନେକେ ଦୂଷିତ ଖାଦ୍ୟ ପାନୀୟ ପିଇ ବିଭିନ୍ନ ରୋଗରେ ଆକ୍ରାନ୍ତ ହୋଇ ଅବହେଳିତ ଅବସ୍ଥାରେ ପଡିରହୁଛନ୍ତି। ସେମାନଙ୍କ ମଧ୍ୟରୁ କେତେଜଣ ଲୋକଙ୍କୁ ଆକ୍ରମଣ ମଧ୍ୟ କରୁଛନ୍ତି। ଏଥିଯୋଗୁ ଅନେକ ସମୟରେ ରାସ୍ତାରେ ଛୋଟ ପିଲା ଓ ବୃଦ୍ଧା ବୃଦ୍ଧ ସୁରକ୍ଷିତ ନ ଥିବା ଅଭିଯୋଗ ହୋଇଛି। କିଛି ମାସ ପୂର୍ବରୁ ୩ରୁ ୪ ଜଣ ମାନସିକ ବିକାରଗ୍ରସ୍ତଙ୍କୁ ରାସ୍ତାରେ ବୁଲାବୁଲି କରୁଥିବା ଦେଖିବାକୁ ମିଳିଥିଲା। ଏବେ ୧୦/୧୨ ଜଣ ଏପରି ଅବସ୍ଥାରେ ଅଞ୍ଚଳରେ ଚଳପ୍ରଚଳ କରୁଥିବା ଦେଖାଯାଇଛି। ତେବେ ଏତେ ସଂଖ୍ୟାରେ ମାନସିକ ରୋଗୀ କିପରି ଓ କେଉଁଠୁ ଆସୁଛନ୍ତି ସେ ନେଇ କାହା ନିକଟରେ ଖବର ନାହିଁ।
ଏ ସମ୍ପର୍କରେ ବରିଷ୍ଠ ମନସ୍ତତ୍ତ୍ୱବିତ୍ ଲକ୍ଷ୍ମୀଧର ସାଠୁଆ କୁହନ୍ତି, ସେମାନଙ୍କୁ ଉପଯୁକ୍ତ ସ୍ଥାନରେ ଥଇଥାନ କରାଯିବା ସହ ଉପଯୁକ୍ତ ଯତ୍ନ ନିଆଯାଇପାରିଲେ ଅନେକେ ମୁଖ୍ୟସ୍ରୋତକୁ ଫେରି ପାରନ୍ତେ। ପାଲଲହଡ଼ା ଉପଜିଲାପାଳ ଅଜିତ କୁମାର ପ୍ରଧାନଙ୍କ ସହ ଯୋଗାଯୋଗ ହୋଇ ନ ପାରିବାରୁ ମତାମତ ମିଳିପାରିନାହିଁ। ଜିଲା ସାମାଜିକ ସୁରକ୍ଷା ଅଧିକାରୀ ମାଧବ ଚନ୍ଦ୍ର ବରାଳ କହିଛନ୍ତି, ମାନସିକ ବିକୃତ ରୋଗୀଙ୍କ ପାଇଁ ଅନୁଗୋଳରେ ସେପରି କିଛି ଚିକିତ୍ସା ବ୍ୟବସ୍ଥା ନାହିଁ। ମହିଳା ମାନସିକ ବିକାରଗ୍ରସ୍ତଙ୍କ ପାଇଁ ତାଳଚେରରେ ଏକ ଆଶ୍ରୟସ୍ଥଳୀ ରହିଛି। ଭୁବନେଶ୍ୱରରେ ଏବେ ଗୋଟିଏ ଆଶ୍ରୟସ୍ଥଳୀ ଖୋଲିବାକୁ ଯାଉଛି। ତେବେ ଏ ସଂକ୍ରାନ୍ତରେ ଆମ ପାଖରେ କିଛି ଅଭିଯୋଗ ନ ଥିଲା। ଯଦି ସେମିତି କେହି ଥାନ୍ତି ତା ହେଲେ ଖୁବ ଶୀଘ୍ର ସେମାନଙ୍କୁ ଏହି ଆଶ୍ରୟସ୍ଥଳୀଗୁଡିକରେ ଥଇଥାନ ଓ ଚିକିତ୍ସା ବ୍ୟବସ୍ଥା କରାଯିବ ବୋଲି ବରାଳ କହିଛନ୍ତି I
