ନୂଆଦିଲ୍ଲୀ,୧୬।୮(ପିଟି): ଏସିଆନ୍ ଗେମ୍ସ ଓ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ପଦକ ବିଜେତା ବଜରଙ୍ଗ ପୁନିଆ ଶୁକ୍ରବାର ଦେଶରେ କ୍ରୀଡ଼ା ଜଗତର ସବୁଠୁ ବଡ଼ ସମ୍ମାନ ରାଜୀବ ଗାନ୍ଧୀ ଖେଳରତ୍ନ ପାଇଁ ମନୋନୀତ ହୋଇଛନ୍ତି। କ୍ରୀଡ଼ା ମନ୍ତ୍ରଣାଳୟର ୧୨ ଜଣିଆ ଚୟନ କମିଟି ତାଙ୍କ ନାମ ଚୂଡ଼ାନ୍ତ କରିିଛି। ସମସ୍ତ ସମର୍ଥନ କ୍ରମେ କମିଟି ତା’ର ପ୍ରଥମ ଦିନରେ ଏହି ନିଷ୍ପତ୍ତି ନେଇଛି। କମିଟିରେ ଅବସରପ୍ରାପ୍ତ ଜଷ୍ଟିସ ମୁକୁନ୍ଦାକାମ ଶର୍ମା, ପୂର୍ବତନ ଫୁଟ୍ବଲ ଅଧିନାୟକ ବାଇଚୁଙ୍ଗ ଭୂତିଆ ଓ ୬ ଥର ମହିଳା ବିଶ୍ୱ ବକ୍ସିଂ ଚାମ୍ପିୟନ ଏମ୍. ସି. ମେରୀକମ୍ ରହିଛନ୍ତି। ଗତ ବର୍ଷ ଏସିଆନ ଓ କମନଓ୍ବେଲଥ ଗେମ୍ସରେ ସ୍ବର୍ଣ୍ଣ ପଦକ ହାସଲ କରିବା ସତ୍ତ୍ୱେ ବଜରଙ୍ଗ ସମାନ ପୁରସ୍କାର ପାଇବାରୁ ବଞ୍ଚତ୍ତ ହୋଇଥିଲେ। ଏଥିନେଇ ତୁମ୍ବିତୋଫାନ କରିଥିଲେ। ଏପରି କି କ୍ରୀଡ଼ା ମନ୍ତ୍ରଣାଳୟକୁ କୋର୍ଟରେ ଚ୍ୟାଲେଞ୍ଜ କରିବେ ବୋଲି ଧମକ ଦେଇଥିଲେ। କିନ୍ତୁ ଶୁକ୍ରବାର ପୁରସ୍କାର ପାଇବା ନିଶ୍ଚିତ ହେବା ପରେ ବଜରଙ୍ଗ କହିଛନ୍ତି, ମୁଁ ଏହି ସମ୍ମାନ ପାଇଁ ଯୋଗ୍ୟ। ମୋ କାର୍ଯ୍ୟ ହେଲା କଠିନ ଟ୍ରେନିଂ ଓ ମ୍ୟାଚ୍ରେ ଶେଷ ପର୍ଯ୍ୟନ୍ତ ପ୍ରତିଦ୍ୱନ୍ଦ୍ୱିତା କରିବା। ମୁଁ ପୁରସ୍କାରକୁ ନୁହେଁ, ମୋ ପ୍ରଦର୍ଶନକୁ ସର୍ବଦା ଗୁରୁତ୍ୱ ଦିଏ। ହେଲେ ଭଲ ପ୍ରଦର୍ଶନ କଲେ ସମ୍ମାନ ଆପେ ଆପେ ଆସେ। ସେ ଏବେ ବିଶ୍ୱ ଚାମ୍ପିୟନନଶିପ ଲାଗି ପ୍ରଶିକ୍ଷଣ ନେଉଛନ୍ତି। ତେବେ ସେ ଦେଶର ୪ର୍ଥ ରେସଲର ଭାବେ ରାଜୀବ ଗାନ୍ଧୀ ଖେଳରତ୍ନ ପାଇବାକୁ ଯାଉଛନ୍ତି। ତାଙ୍କ ପୂର୍ବରୁ ଅଲିମ୍ପିକ୍ସ ପଦକ ବିଜେତା ସୁଶୀଲ କୁମାର, ଯୋଗେଶ୍ୱର ଦତ୍ତ ଓ ସାକ୍ଷୀ ମଲିକ ଖେଳରତ୍ନ ପାଇ ସାରିଛନ୍ତି। ଏହି ପୁରସ୍କାର ସହ ଆଥ୍ଲେଟଙ୍କୁ ଏକ ସ୍ନାତକପତ୍ର ଓ ସାଢ଼େ ୭ ଲକ୍ଷ ଟଙ୍କାର ପୁରସ୍କାର ରାଶି ମିଳିବ। ଏହି ସମ୍ମାନ ଚଳିତ ମାସ ୨୯ ତାରିଖରେ ଜାତୀୟ କ୍ରୀଡ଼ା ଦିବସ ଅବସରରେ ରାଷ୍ଟ୍ରପତି ଭବନରେ ରାଷ୍ଟ୍ରପତି ପ୍ରଦାନ କରିବେ। ଉଲ୍ଲେଖଥାଉ କି, ହକି କିମ୍ବଦନ୍ତୀ ମେଜର ଧ୍ୟାନ ଚାନ୍ଦଙ୍କ ଜନ୍ମବାର୍ଷିକୀକୁ ଦେଶରେ ଜାତୀୟ କ୍ରୀଡ଼ା ଦିବସ ଭାବେ ପାଳନ କରାଯାଏ।
