ଗୋପ,୧୯।୫(ଡି.ଏନ୍.ଏ.): ପୁରୀ ଜିଲାରେ କରୋନା ସଂକ୍ରମିତ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଏ ନେଇ ଜିଲାବାସୀ ଭୟରେ ଥିବାବେଳେ ଗୋପ ବ୍ଲକ ଅଞ୍ଚଳରେ ପୁଣି ୪ ସୁରଟ ଫେରନ୍ତାଙ୍କ ପଜିଟିଭ ବାହାରିଥିବା ବିଡିଓ ଦୀପ୍ତିରାଣୀ ଦାସ ସୂଚନା ଦେଇଛନ୍ତି। ଏମାନଙ୍କ ମଧ୍ୟରୁ ଜଣେ ଧୂମାଳ ପଞ୍ଚାୟତର କ୍ୱାରାଣ୍ଟାଇନ ସେଣ୍ଟର ଥିବାବେଳେ ଅନ୍ୟ ୩ ଜଣ ବଉଲାଙ୍ଗ ପଞ୍ଚାୟତର କ୍ୱାରାଣ୍ଟାଇନ ସେଣ୍ଟରରେ ରହିଥିଲେ। ଏମାନଙ୍କ ରିପୋର୍ଟ ପଜିଟିଭ ଆସିବା ପରେ ୪ଜଣଙ୍କୁ ଭୁବନେଶ୍ୱର କୋଭିଡ ହସ୍ପିଟାଲକୁ ପଠାଯାଇଛି। ତେବେ ବଉଲାଙ୍ଗ ପଞ୍ଚାୟତରେ ଏକାସଙ୍ଗେ ୩ ସଂକ୍ରମିତ ହୋଇଥିବାରୁ ସରପଞ୍ଚ କମଳାକାନ୍ତ କୁଅଁର ଜିଲାପାଳ କ୍ଷମତା ପ୍ରୟୋଗ କରି ମଙ୍ଗଳବାର ପଞ୍ଚାୟତକୁ ଶଟଡାଉନ ଘୋଷଣା କରିଛନ୍ତି। ଅନ୍ୟପଟେ ଏହି ବ୍ଲକ ଅଞ୍ଚଳରେ ଥିବା ୭୧ଟି କ୍ବାରାଣ୍ଟାଇନ ସେଣ୍ଟରରେ ଥିବା କେତେଜଣ ପ୍ରବାସୀଙ୍କ ସ୍ବାବ ଟେଷ୍ଟ ପାଇଁ ପଠାଯାଇଛି।
